Судот во Каталонија ја оспори одлуката на регионалната власт да воведе целосна забрана за движење на околу 200.000 луѓе кои живеат во градот Леида и околината, каде последните неколку дена има нагло зголемување на заразата со коронавирус.

Претседателката на судскиот совет, Елена Гарсија Муњоз изјави дека нема да го одобри воведувањето карантин, со образложение дека за тоа е неопходна согласност од Владата на Шпанија, пренесува Политико.

Таа изрази сомневање дека строгиот карантин е пропорционален одговор, особено поради фактот дека тој е неопределен, што може да има сериозни последици.

И јавниот обвинител во Леида се изјасни против целосната забрана за движење, и тој поднесе жалба поради одлуката на Владата на Каталонија да воведе карантин во седум општини во регионот на Сегрија.

Жителите на Леида и неговата околина не се во можност да патуваат надвор од областа од 4 јули, а судот денес не ја оспори таа одлука.Пред да биде донесена судската одлука, претседателот на Каталонија, Ким Тора, рече дека требало да се донесе тешка одлука врз основа на епидемиолошки податоци и мислење на експертите.

Косовскиот претседател Хашим Тачи по шест часовно испрашување ги напушти просториите на Специјалното јавно обвинителство во Хаг, а рочиштето ќе продолжи и денес, пишува Коха.

Во кратката изјава за медиумите по напуштањето на Специјалното обвинителство, Тачи потврди дека рочиштето ќе продолжи.

„Денеска слушнав размена на разни технички податоци помеѓу адвокатите и обвинителите, прашања од техничка природа и првични прашања од обвинителите поврзани со ОВК, а истите ќе продолжат во вторник“, рече Тачи.

По напуштањето на Обвинителството, претседателот на Косово им се обрати на медиумите само на албански, за разлика од обраќањето кога пристигна, кога зборуваше на англиски јазик, пренесува Косово онлајн.

Пред да влезе во седиштето на Специјалното обвинителство (СПО) во Хаг, основано за да се испитаат наводните воени злосторства извршени во Косово во 1999 година, за време на бунтот на косовските Албанци против владеењето на Слободан Милошевиќ, Тачи рече дека е посветен на вистината, помирувањето и мирот.

Обвинителот на СПО го смета Тачи за одговорен за убиствата на голем број луѓе во време кога тој беше еден од клучните команданти на Ослободителната војска на Косово (ОВК). Тачи претходно ја отфрли можноста за вмешаност во воени злосторства.

Покрај Тачи, хашкиот СПО го сомничи и Кадри Весели, кој беше командант на службата за разузнавање на ОВК за време на војната во Косово, a сега е еден од лидерите на косовската опозиција. Заедно со другите осомничени, СПО ги смета за одговорни за убистватa на речиси стотина луѓе, вклучувајќи косовски Албанци, Срби и Роми и луѓе од други националности, како и политички противници.

Ако обвинението во овој случај биде потврдено, на Тачи ќе му суди Специјалниот судски совет, според косовскиот закон. Тоа е совет составен од меѓународни судии во Хаг, што е оправдано, меѓу другото, и со потребата од заштита на сведоците.

За неговите 2,5 милиона следбеници на социјалните мрежи, Рамон Олорунва Абас (37), инаку познат како Хашпупи, водел екстравагантен живот во Дубаи. Глумел агент за недвижности, се фалел со скапи автомобили, облека од луксузни брендови, како „Гучи“, „Версаче“ и „Фенди“, како и со приватни бродови и авиони.

Животниот стил како од соништата паднал во вода кога американската сојузна полиција открила дека заработувал пари преку хакерски шеми, при што украл милиони долари од големи компании во Америка и Европа, како што се адвокатски фирми, банки и од Премиер лигата. Абас бил сослушан во Чикаго по екстрадирањето во САД, а доколку биде осуден, ќе се соочи со казна затвор до 20 години.

Во наредните недели тој ќе биде префрлен во Лос Анџелес, каде што ќе се соочи со обвиненија за перење стотици милиони долари. Тој водел глобална мрежа на сајбер-криминалци, кои влегувале во разни системи и переле пари за да украдат стотици милиони долари од компании.

Нигерискиот државјанин живеел во луксузниот хотел „Палацо Версаче“ во Дубаи. Работел со повеќе лица, а заедно со него биле уапсени и други 11. Истражителите заплениле речиси 41 милион долари, 13 луксузни автомобили во вредност од 6,8 милиони долари и телефонски и компјутерски докази, се вели во соопштението на полицијата во Дубаи. Тие на телефони, компјутери и харддискови им ги откриле адресите на е-поштата на речиси два милиона потенцијални жртви.