Свет
Бројот на жртвите во сириски град Латакија се зголеми на 34
Најмалку 34 убиени е билансот од третиот ден на опсадата на сириските безбедносни сили на пристанишниот град Латакија, пренесуваат во вторникот арапските медиуми, кои претходно јавија за 30 мртви.
Најмалку 34 убиени е билансот од третиот ден на опсадата на сириските безбедносни сили на пристанишниот град Латакија, пренесуваат во вторникот арапските медиуми, кои претходно јавија за 30 мртви. Според најновите информации на „Координациониот сојуз на сириската револуција“, во палестинскиот бегалски камп „Ал-Рамла“ во близина на Латакија, смртно била застрелана една жена. Про-владините воени трупи и полициски сили лојални на режимот фактички под опсада ја го држат пристанишниот град Латакија, во кој цел на артилериски оган од копно и од море се јужните населби од градот и бегалскиот камп.. Според информации од очевидци, илјадници цивили се засолнуваат на Градскиот стадион во централниот дел од Латакија. Очевидци, исто така, за странските медиуми јавија дека и во градот Хомс кој исто така е цел на жестоки напади на владините сили, биле убиени 12 лица. Безбедносните сили отвориле оган врз луѓето кои ја напуштале централната градска џамија по утринската молитва. Уште еден човек, според сириските активисти за заштита на човековите права, загинал во градот Деир ал-Зор. Неколку квартови од најголемото пристаниште во Сирија се бомбардирани од бродовите на воената морнарица. Под артилериски оган и од копно се најдоа во понеделникот квартовите ал-Филистини и ал-Шааб. Во неделата наутро, агенциите јавија за две жртви по бомбардирањето на квартот ал-Рамл ал-Џунуби.Сириската армија веќе трет ден по ред се обидува да ги запре стихијните протести против претседателот Башар ал-Асад. Продолжувањето на воената операција во Латакија најверојатно се должи на фактот што на страната на локалното население кое се спротиставува на режимот на претседателот Асад преминале неколку единици од редовната сириска војска, кои според агенцијата, во текот на неделата водат улични бoрби со припадниците на регуларните безбедносни сили.Механизирани единици на сириската армија се појавија на улиците на Латакија во саботата, кога во градските населби навлегоа околу 20 тенкови и оклопни возила. Нивното влегување во Латакија беше предизвикано од петочниот митинг на кој присуствуваа околу 10 илјади луѓе, барајќи итна оставка од функцијата на актуелниот претседател Башар ал-Асад./крај/рн/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.