Заканата од американскиот претседател Доналд Трамп за воведување казнени царини кон секој што би се обидел да го спречи во намерата да го преземе Гренланд беше „капката што ја прелеа чашата“ за многу европски влади, пишува „Политико“, пренесе „Индекс“.

По една година напнатости од враќањето на Трамп во Белата куќа, сè погласно се зборува за неминовен трансатлантски развод. Некои европски функционери како основа за нов безбедносен сојуз без САД ја гледаат т.н. „коалиција на подготвените“.

Европските дипломати приватно го опишуваат потегот на Трамп околу суверената данска територија како „луд“ и „полудено однесување“ кое, според нив, заслужува најостра европска реакција. „Ова е преминување на црвената линија“, рекол еден европски дипломат под услов на анонимност. „САД долго ја критикуваат Европа за наводна слабост пред Трамп, и во тоа има вистина. Но постојат граници.“

Иднината без САД

Меѓу високи европски функционери преовладува уверување дека Америка под водство на Трамп повеќе не е сигурен трговски и безбедносен партнер. Се разгледува итен план за иднината на Европа без да се наслонува на САД.

„Промената во американската политика е реална и во голема мера трајна“, изјавил висок претставник на една европска влада. „Чекањето да помине нема смисла. Неопходен е организиран и координиран премин во нова реалност.“

Ова би можело да доведе до длабоки промени во западниот свет и нарушување на глобалната рамнотежа. Последиците би вклучиле економски штети од нови трговски тензии, како и зголемени безбедносни ризици. И самите САД би претрпеле последици, вклучително и загуба на пристап до европските бази и логистичка поддршка за операции во Африка и Блискиот Исток.

„Коалиција на подготвените“ како нов модел

И додека некои влади, како италијанската предводена од Џорџа Мелони, се обидуваат да ги спасат односите со Вашингтон, други веќе размислуваат за долгорочен раскин. За повеќето тоа е болно сценарио кое значи крај на 80-годишната соработка и удар врз НАТО.

Сепак, за некои иднината без САД е веќе замислена. Моделот го претставува „коалицијата на подготвените“ која ја поддржува Украина — платформа во која европски држави, вклучувајќи и земји кои не се членки на ЕУ како Велика Британија и Норвешка, делуваат ефикасно и без САД.

„Вашингтонската група“

Советниците за национална безбедност од 35 влади се во редовен контакт, а меѓусебната доверба е висока. Соработката се одвива и на ниво на лидерите — Кеир Стармер (Велика Британија), Емануел Макрон (Франција), Фридрих Мерц (Германија) и претседателката на Европската комисија Урсула фон дер Лајен кои редовно комуницираат, често преку заеднички чет.

Овој неформален аранжман е наречен „Вашингтонска група“ — според посетата на овие лидери на Белата куќа заедно со украинскиот претседател Володимир Зеленски во август минатата година.

Кон нов безбедносен сојуз

Моделот на „коалиција на подготвените“ би можел да стане основа за нов европски безбедносен сојуз во време кога САД се повлекуваат. Во дискусиите учествува и Зеленски, што отвора можност Украина да стане дел од новиот систем. Украина е најмилитаризирана земја во групата, со голема армија и развиена индустрија за беспилотни летала — нејзино приклучување до Франција, Германија, Полска и Велика Британија би создало моќна воена сила.

Во меѓувреме, од Брисел пристигнуваат конкретни предлози. Европскиот комесар за одбрана Андриус Кубилиус предложи формирање постојана европска армија од 100.000 војници, како и оживување на идејата за Европски совет за безбедност. Фон дер Лајен пак промовира нова Европска безбедносна стратегија.

Членките на ЕУ ќе одржат итен самит за да го координираат одговорот на заканите од Трамп. Во фокусот може да се најде и прашањето за иднината на европската безбедност. Се очекува и директен разговор со Трамп на Светскиот економски форум во Давос.

По средбите со Мерц, Макрон, Стармер и новиот генерален секретар на НАТО, Марк Руте, фон дер Лајен изјави: „Ќе се соочиме со овие предизвици за европската солидарност со стабилност и решителност. Европа ќе застане цврсто во својата поддршка за Гренланд.“

Фото: ЕПА

Американскиот претседател Доналд Трамп веројатно ќе пристигне со околу три часа задоцнување на Светскиот економски форум во Давос, изјави американскиот министер за финансии Скот Бесент.

„Верувам дека претседателот Трамп ќе доцни околу три часа“, рече Бесент на прес-конференција во Давос, одговарајќи на новинарско прашање за доцнењето на авионот „Ер Форс 1“.

Трамп треба да се обрати пред светските лидери во текот на денот. Според медиумите, на форумот во Давос тој доаѓа со голема делегација од советници и членови на администрацијата.

Како што јави „Би-Би-Си“, во американската делегација се и државниот секретар Марко Рубио, шефицата на кабинетот Сузи Вајлс и нејзиниот заменик Џејмс Блер, како и портпаролката на Белата куќа, Керолин Ливит. Со Трамп во Давос пристигнуваат и политичкиот советник Стивен Милер, како и советникот за национална безбедност Роберт Габриел, кој неодамна беше именуван како последен член на „основачкиот извршен одбор“ на Трамповиот Одбор за мир.

Претседателскиот авион на САД, кој беше на пат кон Давос, се вратил назад во Мериленд помалку од еден час по полетувањето, поради „мал проблем со електриката“, соопшти портпаролката на Белата куќа, Керолин Ливит.

Според „Си-Би-Ес“, Трамп продолжил со втор авион, кој полетал еден час подоцна. Ливит изјавила дека по поаѓањето од заедничката база Ендрјус, екипажот идентификувал мал електричен проблем и од претпазливост одлучил да се врати. Авионoт слетал назад во базата во 23:07 часот по локално време, а новиот полетал за Давос околу полноќ.

Новинарите известуваат дека светлата во новинарската кабина накратко се изгаснале по полетувањето.

Трамп сепак ќе учествува на Светскиот економски форум во Давос и се очекува да се обрати веднаш по слетувањето.

Фото: ЕПА

Украинскиот претседател Володимир Зеленски постапува неразумно и го распалува политичкиот конфликт, изјавил градоначалникот на Киев, Виталиј Кличко, во интервју за британскиот весник Тајмс, пренесува РИА Новости.

„Претседателот неразумно го распалува политичкиот судир во земјата, токму во момент кога ѝ е потребно единство“, рекол Кличко, според текстот.

Тој открил дека Зеленски го одбил неговото барање за средба, кога се обидел да разговара за состојбата во енергетскиот сектор во Киев – иако прашањата за производство на струја и противвоздушна одбрана се во надлежност на украинската влада.

На почетокот од јануари, шефот на украинската држава јавно го нападна Кличко, обвинувајќи го за недоволна подготвеност на Киев за воздушни напади. Претходно, градоначалникот им препорача на жителите да го напуштат градот поради проблемите со струја и греење – што, како што рече, било искрено предупредување за сериозната состојба.

Според украинските медиуми, Киев и некои други места останале без струја поради планирани и итни прекини. Ноќта меѓу понеделник и вторник, руската армија извршила нов силен напад врз објекти од воено-индустрискиот комплекс, како и врз енергетската и транспортната инфраструктура која, според нив, се користи за потребите на украинската армија.

Министерството за одбрана на Русија известува за нападите на вакви цели, а портпаролот на Кремљ, Дмитриј Песков, неколку пати изјави дека руската војска не ги таргетира станбени згради и социјални установи.

Украинските власти повеќе пати известија за штети во мрежите и комуналната инфраструктура поради руските напади. Руската армија, според објаснувањето од Москва, почнала да гаѓа инфраструктура како одмазда за терористичкиот напад врз мостот на Крим во октомври 2022 година. Како резултат на тоа, низ цела Украина се воведуваат повеќечасовни прекини на струја, што доведува и до проблеми со греењето и водоснабдувањето.