Силите на либискиот Национален преоден совет (NTC) во неделата го заземале конференцискиот центар Уагадуду, во Сирт, родниот град на водачот на либиската Џамахирија, полковникот Моамер ел-Гадафи, јавува AFP.

Силите на либискиот Национален преоден совет (NTC) во неделата го заземале конференцискиот центар Уагадуду, во Сирт, родниот град на водачот на либиската Џамахирија, полковникот Моамер ел-Гадафи, јавува AFP. Конференцискиот центар во јужното подрачје на Сирт, претходните месеци беше центарот на жестокиот отпор што им го пружаа лојалистите на Гадафи на востаничките сили кои речиси два месеца се обидуваат да го заземат градот. „Сто отсто го контролираме Уагадуду. Сега ни е отворен патот да го заземеме целиот град.“, тврди за француската агенција еден од воените команданти на Советот, Мохамед ал-Фајад. Агенцијата јавува дека во неделата рано попладнето, сé уште одекнуваат детонации од вооружениот судир што се води во северниот дел од градот. „Блиску сме до центарот на градот, тоа сега е прашање на часови. Потребно ни е време за координација“, вели ал-Фајад за AFP.Конференцискиот центар кој е изграден во јужниот дел на Сирт, за одржувањето на панафриканскиот самит, беше главната цел на борците на Советот од почетокот на офанзивата која конечно започна на 15-ти септември. AFP пренесува дека востаниците почнале да ги кинат портретите на Моамер ел-Гадафи и зелените знамиња на соборениот режим, додека нивните соборци триумфално се возат околу зданието. Неколку часови претходно во неделата, силите на Советот соопштија дека го заземале Универзитетот во Сирт, кој исто така беше упориште на лојалистите на Гадафи. Исто така неколку часа претходно, кинеската новинска агенција Синхуа, повикувјаќи се на изјави од лекарите од локалната болница во која се пренесуваат загинатите и ранетите, пренесе дека најмалку 17 лица загинале а 227 се ранети во уличните борби што два дена се водат меѓу вооружените сили на Преодниот совет и поддржувачите на соборениот лидер Гадафи.Претставник на командата на Советот за кинеската агенција потврдил дека лојалистите се опколени во неколку населби, а дека борбите продолжуваат во централното градско подрачје, коешто според него наскоро ќе биде целосно заземено.Сепак, според дописникот на Синхуа, притисокот на борците на Советот ослабел поради загубите, како и поради тоа што остатоците од силите на Гадафи низ разните делови на градот распоредиле снајперски и минофрлачки гнезда кои континуирано стрелаат врз позициите на востаниците, што претставува сериозна закана за силите на владејачката администрација.Еден од борците, кој се претставил со име Фарал, за Синхуа изјавил дека неговата единица контролира неколку улици од Сирт и спроведува проверка на куќите кои биле користени како засолништа за лојалистите на Гадафи. Тие, исто така, наводно заробиле десетици платеници во составот на силите на лојалисите. И натаму цивилното население продолжува да го напушта градот преку коридорот кој е направен за да можат безбедно да излезат од зоната на борбените дејствија. Сирт, кој се наоѓа околу 360 километри источно од престолнината Триполи, и пустинскиот град Бани-Валид, 170 километри, се последните две големи засолништа на силите на Гадафи. Членовите на неговото семејство пребегаа во странство, но останува непозната засолништето на самиот Гадафи, но се претпоставува дека е сé уште во Либија./крај/афп/син/сн