Во синоќешните судири на северот од Сирија меѓу безбедносните сили и дезертираните војници кои преминаа на страна на опозицијата, загинале 12 војници и пребези и тројца цивили

Во  синоќешните судири на северот од Сирија меѓу безбедносните сили и дезертираните војници кои преминаа  на страна на опозицијата, загинале 12 војници и пребези и тројца цивили, соопштија во саботата Сирискиот центар за мониторинг и заштита на човековите права со седиште во Лондон, кој се повикува на свои активисти во земјата.Опозициските сириски активисти тврдат дека судирите стануваат поинтензивни имајќи го предвид фактот дека демонстрантите коишто сега во терминологија при известувањето за ситуацијата во Сирија се нарекуваат востаници , се почесто се судираат со припадниците на безбедносните сили кои сега се нарекуваат – лојални на претседателот Башар ел-Асад, кој се обидува да ги задуши осуммесечните протести со кои се бара негово заминување од власта. Сирискиот центар за мониторинг и заштита на човековите права со седиште во Лондон јави дека последните судири се случиле во северниот град Идлиб, во близина на границата со Турција.Во четвртокот Високата комесарка на Обединетите нации за човекови права (ОХЦХР) Нави Пилај денеска изјави дека бројот на убиените во деветмесечните антивладини протести во Сирија „далеку надминал“ четири илјади.Во масовните антивладини протести коишто ја зафатија Сирија од средината на март годинава, загинале 4.700 лица, јави во вторникот радиото „Сава“ повикувајќи се на соопштението на опозициската организација Координативниот совет на сириската револуција.Според оваа групација, меѓу загинатите во судирите меѓу приврзаниците на опозицијата и силите на сириската армија и полиција, се и 255 деца и 116 жени.Пред две седмици, сириската опозиција дистрибуираше податоци за 4.100 убиени во протестите коишто во континуитет траат од март 2011 година.Сириската власти тврдат дека станува збор за повеќе 1.500 загинати од двете страни, од кои повеќе од 1.100 се припадници на безбедносните служби кои се цел на „терористички групи уфрлени од надвор“.Минатиот викенд турскиот весник Milliyet пишуваше дека Франција ги испратила своите инструктори во северен Либан и во Турција, каде што се наоѓаат камповите на ткн Слободна сириска армија, група составени претежно од дезертери од регуларната армија, каде што ќе ги опремат и ќе ги обучат сириските бунтовници за поефикасна борба против сириската армија и силите за безбедност.Во написот на весникот, исто така, се тврди дека владите на Франција, Британија и на Турција „постигнале договор за испраќање на оружје за бунтовниците во Сирија“. Весникот додава и дека најголемата група вооружени дисиденти се наоѓа во турската провинција Хатај, во близина на границата со Сирија.Во Сирија, изминатите осум месеци не престануваат анти-владините протести, кои започнаа на југ од државата во градот Дерa’a, а потоа се проширија и во другите региони. Оттогаш секојдневни се извештаите за смртта на луѓе во Сирија, и цивили и униформирани лица.Бунтот во Сирија започна во средината на март, откако во пограничниот град со Јордан, Дера’a беше уапсена група ученици кои испишувале анти-владини слогани по ѕидовите. Жителите на градот масовно излегоа на улиците барајќи ослободување на момчињата. Подоцна протести се одржаа и во неколку други региони на земјата, особено во градовите Латакија, Баниас, Хомс, Хама и во некои предградија од главниот град Дамаск.Асад се обиде да ги смири демонстрантите, укинувајќи ја 50-годишната вонредна состојба, но апсењата без налог продолжија и покрај укинувањето на таквиот закон. Протестите во Сирија продолжија и покрај тоа што сириските власти објавија план за реформи, меѓу кои беше и укинувањето на воената состојба од страна на претседателот Башар ел-Асад, воведена во 1963 г.На почетокот од август претседателот ал-Асад донесе акт за воспоставување повеќепартиски политички систем во земјата. Со овој акт се дозволува формирање политички партии коишто ќе делуваат заедно со партијата Баат, која на власт се наоѓа од 1963 година, со уставен статус „лидер на државата и општеството“. Овој декрет тогаш беше донесен само неколку часови откако Советот за безбедност на Обединетите нации го засили притисокот врз сириските власти, осудувајќи го режимот на Асад поради „кршење на човековите права и употреба на сила врз цивили“./крај/ро/мф/сн