Првиот човек на Арапската лига во понеделникот изјави дека мировните набљудувачи на организацијата во Сирија помагаат да се намали насилното задушување на антивладините протести во земјата, но и ја повика владата на претседателот Башар ал-Асад во целост да го спроведе мировниот план.

Првиот човек на Арапската лига во понеделникот изјави дека мировните набљудувачи на организацијата во Сирија помагаат да се намали насилното задушување на антивладините протести во земјата, но и ја повика владата на претседателот Башар ал-Асад во целост да го спроведе мировниот план.Во меѓувреме воените дезертери чиј вооружен бунт се заканува да ги фрли во втор план мирните протести на опозицијата, заробиле десетици припадници на сириските безбедносни сили, заземајќи во понеделникот два контролни пункта, а во напад на третиот убиле и раниле неколку војници, соопшти опозицијата. Претседателот Асад се бори да го задуши бунтот со кој опозицијата го бара неговото заминување од власта и да избегне да биде следниот арапски челник кој е симната од власта со револуција, како што минатата пролет тоа се случи во Тунис, Египет, Либија и Јемен. Во речиси десетте месеци насилства според податоците на Обединетите нации се убиени повеќе од пет илјади луѓе, претежно невооружени цивили. Според властите во Дамаск, пак, бројката загинати не надминува 1.800 лица, од кои 1.200 се униформирани припадници на државните безбедносни сили кои се жртви на „терористи уфрлени однадвор“.  Затоа набљудувачката мисија на Арапската лига минатата седмица ја мина во областите коишто се сметаат за центри на бунтот оценувајќи дали претседателот Башар ал-Асад се придржува до мировниот план. Генералниот секретар на Арапската лига, Набил Еларабу, во понеделникот изјави дека сириската војска се повлекла од станбените квартови и дека се наоѓа во предградијата на градовите, но дека продолжува пукањето и дека снајперите и натаму се закана. „Најновиот телефонски извештај наведува дека има отворање оган на различни места, што ја отежнува можноста да се каже кој врз кого стрела. Огнот треба да се прекине, а има и снајпери. Ја повикуваме сириската влада во целост да го почитува тоа што го вети “, изјави Елараби во Каиро каде што е седиштето на Арапската лига. Мировниот план на Арапската лига бара од претседателот Асад да ги повлече тенковите и војниците од улиците, да ги ослободи притворените и да почне разговори со своите политички противници. Елараби, дадава дека набљудувачите го обезбедиле ослободувањето на 3.484 затвореници, како и дека успеале да овозможат да се донесе храна за населението во градот Хомс, еден од центрите на бунтот. Меѓутоа, повеќето сириски опозициски активисти се сомневаат дека мисијата на Арапската лига може навистина да изврши притисок врз претседателот Асад да го прекине насилството. Во неделата Арапскиот парламент, 88-члена комисија составена од претставник на секоја од членките на Лигата, побара од набљудувачите да ја напуштат Сирија, соопштувајќи дека нивната мисија обезбедува покритие за насилството и злоставувањето од страна на владата коешто не се стивнува.Водачот на мисијата, суданскиот генерал Ахмет Мустафа ал-Даби, кој беше координатор и во разговорите меѓу суданската влада и меѓународните набљудувачи во Судан, ги разлути некои од членовите на набљудувачката мисија кога изјави дека е задоволен од првите впечатоци во градот Хомс, еден од центрите на бунтот. Тој изјави дека некои делови од градот биле во лоша состојба, но немало ништо застрашувачко.Одлуката за испраќање мисијата од 500 набљудувачи, Арапската лига ја донесе кон средината на ноември, по самитот на министрите за надворешни работи на земјите членки на Лигата во Рабат. Сепак, имплементацијата на мисијата беше суспендирана поради несогласувања меѓу Лигата и Дамаск за статусот на набљудувачите. Две лица се убиени во понеделникот во престрелка во градот Хомс, соопшти,Сирискиот центар за мониторинг и заштита на човековите права со седиште во Лондон. Безбедносните сили убиле селанец во Доума, на североисточната периферија на престолнината Дамаск, додека спроведувале рација во потрага по осомничени лица по кои трагаат властите, соопшти опсерваторијата. /крај/ро/мф.сн