Во годината која започна ќе бидат одржани претседателски избори во Русија, Франција и САД, чии резултати можат да имаат значајни промени на глобалните движења во светот.

Во годината која започна ќе бидат одржани претседателски избори во Русија, Франција и САД, чии резултати можат да имаат значајни промени на глобалните движења во светот. Прв на проверка, во март, ќе биде Владимир Путин, по него во април, со против кандидатите ќе се соочи Николас Саркози, а кон крајот на годината доверба за втор мандат од избирачите ќе бара Барак Обама. Големо внимание, се очекува да привлечат и претседателските избори во Египет, бидејќи според предвидувањата ќе остават длабока трага на понатамошните случувања во арапскиот свет. Мандатот му истекува и на претседателот на Кина, Ху Џинтао, така, да се очекува да дојде до смена на врвот на партијата и државата. Владимир Путин, до декемвриските парламентарните избори, важеше за неприкосновен кандидат за претседателската функција. Но на парламентарните избори неговата партија Единствена Русија, во однос на претходните избори загуби околу 25 отсто од гласовите. Путин и понатаму е главен фаворит, иако се соочува со обвинувања дека парламентарните избори биле наместени. Путин на изборите во март нема да има посериозен кандидат, за функцијата ќе му се спротивстават старите ривали Генадиј Зјуганов, Владимир Жириновски, Сергеј Миронов и тајкунот Михаил Прохоров. Николас Саркози, за разлика од Путин, ќе се најде пред најголемиот предизвик во политичката кариера. Економската криза не ја заобиколи Франција, владата воведе нови мерки за штедење и го продолжи работниот век за заминување во пензија, што го зголеми незадоволството кај граѓаните. Првата сериозна опомена на Саркози му стигна во септември минатата година, кога социјалистите освоија мнозинство во Сенатот. Главен ривал на Саркози ќе му биде социјалистот Франсоа Оланд, кој, во декември, според анкетите имаше поддршка од 60 отсто од испитаниците. Значаен број на гласови би можела да освои Мари Ле Пен, лидерка на екстремно националистичкиот Национален фронт. Во САД започна номинацијата на републиканските кандидати за влез во Белата куќа. Во овој момент, како против кандидати на Обама најчесто се споменуваат Њут Гингрич, Рон Пол, Рик Пери и Мишел Бакман. Претседателот Обама на надворешен план постигна значајни успеси, ги повлече војниците од Ирак и го ликвидира главниот непријател на САД, Осама бин Ладен. Сепак, изборите во САД се добиваат на домашен терен, каде актуелниот претседател се соочува со економски проблеми и огромен јавен долг, нешто што сигурно ќе се обиде да го искористи опозицијата. Според најновите анкети на „Wall street journala“ и „NBC news“, Обама би добил 51 отсто од гласовите доколку ривал му биде Гингрич (37 проценти). Предноста би била помала (47:45 отсто) доколку против кандидат му биде умерениот конзервативец Мит Ромни. Големо внимание ќе предизвикаат изборите во Египет, пред се поради повеќе месечната револуција, со која беше урнат Хосни Мубарак. Како можни кандидати за изборите се споменуваат либералите Махмуд ал Барадеј и Амр Муса, но по победата на исламистите на парламентарните избори, сите опции се во игра. крај/т/нц