Свет
Обвинетиот го убил обвинителот во судница во Германија

Во судница во окружниот суд во Дахау на југот од Германија, 18 километри северозападно од Минхен, денеска обвинетиот за време на вербална расправија уби 31-годишен јавен обвинител, јавува агенцијата Франс прес,
Во судница во окружниот суд во Дахау на југот од Германија, 18 километри северозападно од Минхен, денеска обвинетиот за време на вербална расправија уби 31-годишен јавен обвинител, јавува агенцијата Франс прес, повикувајќи се на претставници на Министерствата за правда и за внатрешни работи.
Според пишувањата на германскиот весник „Билд“, убиецот има 54 години. Како што рече портпаролот на Министерството за правда, Вилфрид Крамес, убиецот го погодил обвинителот со три куршуми, кој по приемот во болницата починал.
Портпаролот на полицијата, Петер Грисер рече дека вооружениот убиец бил уапсен на местото на инцидентот и дека нема информации за можни други жртви.
„Треба да видиме дали пукал кон други луѓе, но колку што знам, никој веќе не е ранет“ рече Грисер.
Пред судот бил разработуван случај за семејни несогласувања, а како што наведува Дојче Веле, можно е да станува збор за неисплаќање на алиментација.
Германското радио наведува дека засега е нејасно како убиецот можел да внесе пиштол во судницата. Според пишувањата на локалниот дневен весник, убиениот обвинител пред една година започнал да работи во канцеларијата на јавниот обвинител и бил ранет во раката, рамото и стомакот.
АФП наведува дека слабите мерки за обезбедување не се реткост во германските судови, особено доколку не се во прашање случаи со големи престапи.
Во април 2009 година, 60-годишник убил роднина, а потоа се самоубил, во судница во која се разгледувало прашање за имот во градот Ландсшут.
Истата година во јули, Германец убил трудна Египќанка во Дрезден, што предизвикало револт меѓу муслиманите, а убиецот подоцна бил осуден на доживотен затвор../крај/бл/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Судот на правдата на ЕУ: Изгубен миленик на лет се смета како изгубен багаж

Судот на правдата на Европската унија донесе одлука дека домашните миленици кои се превезуваат со авион се сметаат за „багаж“, а не за патници.
Одлуката следи по случај во кој куче исчезнало при пренос до авион на лет од Буенос Аирес до Барселона, по што сопственичката побарала 5.000 евра отштета.
Судот оцени дека, според Монреалската конвенција, авиокомпанијата не е должна да исплати поголема отштета од онаа предвидена за изгубен багаж, освен ако патникот претходно не доставил специјална изјава за вредноста на пратката.
Во одлуката учествувале и двајца претставници од Хрватска – судијата Синиша Родин и адвокатката Тамара Ќапета.
Свет
Евакуирано средно училиште во Италија по истекување на амонијак

Во италијанскиот град Пескара беше евакуирано државното средно училиште „Маркони“ откако во просториите се почувствувал силен мирис од непознато потекло, поради што на многумина им се слошило.
Според италијанските медиуми, повеќе од 1.000 ученици биле итно евакуирани, а неколкумина се хоспитализирани, меѓу нив и пожарникари кои пристигнале на интервенција, пренесе „ТВ Раи“.
Првичните информации укажуваат дека причината најверојатно е истекување на амонијак од лабораторијата, иако не се исклучува ниту можноста за цурење гас од климатизацијата.
Заменичката градоначалничка на Пескара, Марија Рита Карота, нареди итно затворање на училиштето до понатамошна проверка.
Свет
Мерц: Без реформи, Европа ќе стане пиун на Азија и САД

Германскиот канцелар, Фридрих Мерц, предупреди дека Европската унија ризикува да ја изгуби својата економска независност ако итно не спроведе реформи за зголемување на конкурентноста.
Во обраќање пред германскиот парламент, во пресрет на самитот на ЕУ во Брисел, Мерц рече дека во наредните години ќе се решава дали Европа ќе остане независна економска сила или ќе стане „пиун на економските центри во Азија или Америка“.
Тој ја повика ЕУ да го намали бирократскиот товар за компаниите, да го зајакне единствениот пазар и да потпише нови трговски договори, особено со јужноамериканскиот блок Меркосур до крајот на годината.
Мерц се соочува со растечки притисок дома поради економската стагнација во Германија, која се влошува поради царинските политики на американскиот претседател Доналд Трамп.
Тој истакна дека решенијата за европската економија веќе постојат во извештаите на Марио Драги и Енрико Лета, кои предлагаат продлабочување на внатрешниот пазар и јакнење на конкурентноста, додавајќи дека тие препораки треба веднаш да станат дел од агендата на Европската комисија.