Претставници на сириската опозиција, кои престојуваат во посета на Русија, порачаа во вторникот дека го споделуваат руското противење на странска интервенција во Сирија, а употребата на сила од страна на опозицијата го оправдаа со одбранбено дејствување.

Рускиот министер за надворешни работи Сергеј Лавров ги обвини „надворешните сили“ дека сакаат да ги поткопаат напорите на специјалниот претставник за Сирија на Обединетите нации и на Арапската лига, Кофи Анан, за ставање крај на крвопролевањата во земјата, пренесуваат руските медиуми.

Иако планот на поранешниот генерален секретар на светската организација Кофи Анан повикува на политички дијалог меѓу сите политички субјекти во земјата, сирискиот опозициски лидер Абдулазис ал-Каиер,, во Москва изјави дека со претседателот Башар ал-Асад може да се преговара само доколку не е одговорен за крвопролевањата.

„Неприфатливо е да се седне на преговарачката маса со претставниците на сириските власти чиишто раце се натопени со крвта на народот“, рекол Каиер,

„Доколку Асад сака да покаже дека не е одговорен за она што се случи и дека неговите раце се чисти, нека даде таква изјава и нека излезе пред соодветните тела. Меѓутоа, доколку тоа не се случи, тој и натаму е одговорен за сето крвопролевање“, дополнил Каиер.

„Сметаме дека насилството кон коешто прибегна опозицијата, така да кажеме насилството на народот, е реакција на насилството на власта и нејзините вооружени сили и дека ќе престане веднаш штом престане притисокот од страна на режимот“, изјавил на прес-конференцијата во Москва, Хаитам Манаа претставник на центристичкото сириско опозициско Национално тело за координација, коешто престојува во Москва, кој исто така во рамките на делегацијата на сириската опозиција разговараше со руските власти.

На почетокот од февруари шефот на руската дипломатија Сергеј Лавров престојуваше во Дамаск каде се сретна со претседателот Асад, при што , нагласил дека ја потсетил сириската страна за неопходноста од потребата да се забрза долгогодишните политички и уставни реформи. Претседателот ал-Асад тогаш потврди дека во блиска иднина ќе биде претставен проектот за новиот устав на земјата, а потоа во најкраток можен рок ќе биде утврден датумот за спроведување на референдум за прашањето за неговото донесување. Потоа треба да се одржат општи парламентарни избори, со учество на сите политички партии, вклучувајќи го и новосоздадените во согласност со неодамна донесениот закон за политичките партии да се одржи, кој ќе биде во основата на новиот устав на Сирија, исклучувајќи ја повластената позиција за која и да е партија, вклучувајќи ја и партијата Баат“.

На почетокот од август 2011 година, претседателот ал-Асад донесе акт за воспоставување повеќепартиски политички систем во земјата. Со овој акт се дозволува формирање политички партии коишто ќе делуваат заедно со партијата Баат, која на власт се наоѓа од 1963 година, со уставен статус „лидер на државата и општеството“. Овој декрет тогаш беше донесен само неколку часови откако Советот за безбедност на Обединетите нации го засили притисокот врз сириските власти, осудувајќи го режимот на Асад поради „кршење на човековите права и употреба на сила врз цивили“./крај/мф/сн