Американскиот претседател Барак Обама во саботата изјави дека Г8 се единствени во оцената за контроверзната иранска нуклеарна програма на почетокот од работата на вториот ден од самитот во Кепм Дејвид, но не постигнале единство во поглед на Сирија.

„Единствени сме во пристапот во однос на Иран. Мислам дека сите сме согласни дека Иран има право на мирнодопска нуклеарна програма, но неговите постојани кршења на меѓународните правила и неговата неспособност досега да докаже дека не сака да се милитализира, се сериозна причина за загриженсот кај сите нас“, истакна американскиот претседател Барак Обама во селската резиденција на американските претседатели Кемп Дејвид, стотина километри од главниот град Вашингтон, во сојузната држава Мериленд.

Неколку дена пред продолжувањето на преговорите на „шеската“, САД, Русија, Кина, Франција, Велика Британија и Германија со Иран во ирачката престолнина Багдад, Обама вели дека тој и неговите партнери од Г8 се оптимисти во поглед на исходот од преговорите, пренесува Reuters.

„Сите сме решителни да се продолжи пристапот со санкции и притисоци, истовремено со дипломатските преговори. Се надеваме дека тој проблем ќе биде решен на мирен начин кој го почитува суверенитетот на Иран и неговите права во меѓународната заедница, но бара и одговорност“, изјави претседателот на САД.

Притоа Обама рекол дека лидерите од Г8 сакаат политичкиот процес што побргу да почне во Сирија, каде на сцена се крвавите судири меѓу режимот на претседателот Башар ал-Асад и вооружената опозиција којашто бара заминување од власта на неговата партија Баат и неговата династија којашто доминираат со земјата речиси четири децении.

„Сите сметаме дека мирното решение и политичката транзиција се добри за Сирија, сите сме многу загрижени поради насилството што таму се случува, за загубените животи“, рекол Обама.

Американскиот претседател, исто така, рекол дека тој и неговите партнери го поддржуваат планот на специјалниот пратеник за Сирија на Обединетите нации и Арапскат алига, Кофи Анан, со кој треба да се заврши насилството во земјата.

„Се согласуваме и очекуваме тоа да биде внесено во завршната изјава, дека планот на Анан мора да се спроведе во целост и дека што побрзо мора да почне политичкиот процес поради решавање на проблемот“, додал Обама.

Меѓутоа, висок функционер од руската делегација коајшто го следи премиерот Дмитриј Медведев на самитот Г8 рекол дека не е постигната согласност околу Сирија во завршната изјава која во саботата подоцна треба да биде објавена во Кемп Дејвид.

Ставот на Русија не е променет, изјавил советникот во Кремљ, Михаил Маргелов, оценувајќи дека „режимите не може да се менуваат со сила“. Русија досега во Советот за безбедност на ОН двапати со поддршка на Кина блокираа резолуции со осуда за режимот на претседателот Асад.

Маргелов истакна дека „Сиријците мораат да можат сами да ги решаваат своите проблеми“, прашувајќи се притоа „кој ќе ја земе власта ако си замине сегашниот режим“.

„За решавање на сириската криза не смееме да употребиме секира, туку мораме да земеме пинцета“, рекол Маргелов.

Истовремено тројца челници на ОН, меѓу кои и заменикот на меѓународниот специјален пратеник Кофи Анан, престојуваа во сириската престолнина Дамаск каде што разговараа за текот на набљудувачката мисија распоредена во земјата, во моментот кога во градот Диер Езор беше извршен самоубиствен напад со автомобил-бомба во кој загинаа девет луѓе а повеќе од стотина се ранети./крај/мф/сн