Во нападот на талибаните кој започнал ноќта кон петокот во хотел во близина на авганистанскиот главен град Кабул, биле убиени 19 лица а напаѓачите и самит биле ликвидирани во судри со авганистанските безбедносни сили, соопшти министерството за внатрешни работи.

Нападот се случил врз хотелскиот комплекс на брегот од езерото Карга, туристичка дестинација десет километри од Кабул, каде што вообичаено на викенди или излети доаѓаа цели семејства од главниот град.

Според полицијата, напаѓачите во нападот употребиле рачни фрлачи на гранати и тешки митралези.

Интернет страницата на Press TV пишува дека талибанските милитанти со себе зеле и заложници. Пред крајот на дванаесетчасовната борба, биле ослободен и40 заложници.

Генералот Саланги за агенцијата DPA рекол дека во хотелот „Спожмаи“ во моментот на нападот имало меѓу 350 и 400 годи, како и дека биле убиени седум бунтовници кои учествувале во нападот.

„Петнаесет цивили, тројца припадници на хотелското обезбедување и полицаец се убиени“, изјавил началникот на кабулската полиција, генералот Ајуб Саланги.

Додал дека безбедносните сили ја пребаруваат околината во потрага по други талибански борци.

Авганистанските безбедносни сили и коалициските меѓународни сили се распоредени на местото од нападот за да пружат отпор при евентуален нов напад на талибаните.

Началникот на одделот за криминалистичка истрага во кабулската полиција Мохамад Захр, изјавил дека нападот започнал во 23.30 часот по локално време во четвртокот (19 часот по средноевропско време) кога вооружените напаѓачи влетале во лобито на хотелот каде што се одржувала свадбена прослава. Додека, пак, авганистанската полиција започнала напад врз милитантите за окончување на кризата во хотелот во 5,30 часот (1,00 часот по средноевропско време).

Полициски извори рекле дека двајца од шесте напаѓачите активирале експлозив што го носеле на себе, додека други напаѓачи земале во заложништво поголема група хотелски гости.

Портпаролот на авганистанските талибани, Забиулах Муџахид, во текстуална порака до уредништвата на западните агенции соопштил дека „муџахедините го нападнале тој хотел бидејќи во него секој четврток се собираат функционери на ИСАФ и на кабулската администрација и таму организираат развратни забави, со алкохол и проститутки“, пренесува AFP.

Муџахид во пораката, исто така, дека „борците нападнале два хотела коишто ги користат странците, убивајќи 25 од нив, од кои 14 се високи авганистански функционери“, пишува Press TV.

Меѓутоа, властите потврдуваа дека бил нападнат само еден хотел, забележува агенцијата.

Нападот на езерото Карги се случи само неколку часа по говорот на авганистанскиот претседател Хамид Карзаи во кој предупреди дека „во последните два до три месеца“ расте бројот на нападите врз локалните полициски сили и авганистанските војници.

Овој напад доаѓа само два дена откако во самоубиствен напад изведен со мотоцикл-бомба беа убиени 21 припадник на заедничка патрола на авганистанските безбедносни сили и сили на НАТО во близина на источниот град Кост.

Во друг бомбашки напад во средата во провинцијата Логар загинаа осум авганистански цивили, жени и деца.

Нападот во Карга иако е успешно завршен од аспект на авганистанските безбедносни сили, покажува дека талибаните се осмелуваат и можат да нападнат каде и да е во Авганистан и кога ќе посакаат, па дури и во околината и во самата престолнина Кабул./крај/мф/сн