Заострените нови санкции на европската унија против Иран нема да го принудат Техеран да се врати на преговорите со светските сили за нуклеарната програма, соопшти во вторникот иранското министерство за надворешни работи.

„Ние сметаме дека грешките во пресметката што ја прават тие земји, ќе доведе до нивно оддалечување од поволниот резултат“, изјави портпаролот на иранското министерство за надворешни работи Рамин Мехнапараст на прес-конференција цитиран од тамошните медиуми.

Европската унија ги заостри во понеделникот и финансиските и трговските санкции против Иран, особено фокусирајќи се на финансиските трансакции, како и на телекомуникацискиот и енергетскиот сектор.

ЕУ првпат санкциите ги насочува кон телекомуникацискиот сектор и прогласи начелна забрана за сите финансиски трансакции меѓу европските и иранските банки. Исклучоци се предвидени за приватните дознаки и за плаќањата во хуманитарни цели или за купување храна и медицинска опрема. Се забрануваат и краткорочните кредитни гаранции за извоз, откако претходно беа забранети среднорочните и долгорочните.

Исто така, се забранува и увозот на иранскиот природен гас, кој нема некое поголемо значење, откако во јули годинава беше забранет увозот на иранска нафта во земјите членки на Европската унија.

Високата претставничка на ЕУ за надворешна политика и безбедност, Кетрин Ештон изјави во понеделникот дека се надева оти овој нов притисок ќе го убеди Иран да направи отстапки за да може да продолжат преговорите многу брзо.

Меѓутоа, портпаролот Мехамнпараст ја отфрли таа можност изјавувајќи дека „нелогичните“ и нехумани“ санкции само ќе го направат Иран уште порешителен во своите ставови. „Тие не го познаваат духот н иранскиот народ. Тие чекори се грешка и нема да има резултати од нив“, вели иранскиот портпарол./крај/мф/сн