Свет
Востоличен коптскиот патријарх во Каиро
Новиот патријарх на египетските православни Копти Теодориус (Тавадрос) Втори, најголемата христијанска заедница на Блискиот исток, во неделата е востоличен во соборниот храм Свети Марко во египетската престолнина Каиро.
Шеесетгодишниот Теодориус Втори беше прогласен за патријарх на Александрија и патријарх на цела Африка, на церемонијата на која присуствуваше и премирот на Египет, Хишам Кандил, откако во претходно во петокот исламистичкиот претседател Мухамед Мурси поради спреченост потврди дека на свеченоста ќе испрати свој претставник.
Церемонијата на востоличувањето е официјалниот влез во највисокиот црковен чин на 118-от коптски патријарх. Свеченоста се совпадна со денот на жалост во земјата за децата кои загинаа во страшната железничка несреќа, што се случи во саботата во провинцијата Асуит. Во саботата, околу 300 километри јужно од Каиро, на железнички премин во близина на градот Манафалут, автобус, во кој имало повеќе од 60 ученици се судри со воз. Како резултат на несреќата загинаа 50 луѓе, од кои повеќето деца на возраст од шест до десет години, а околу 20 други беа сериозно повредени.
„Ние не можеме да славиме кога целата земја ги оплакува жртвите на катастрофата со невините деца, египетската црква не може да се радува кога се тажни сите во Египет. Но, ние не можевме да ја откажеме церемонијата, бидејќи премногу гости специјално пристигнаа во Каиро за востоличувањето на Теодориус Втори“, објасни отецот Павле.
Новиот патријарх Теодориус Втори, со световно име Вагих Субхи Баки Сулејман, во неделата наполни точно 60 години, роден е на 4-ти ноември 1952 година во египетскиот град Ал Мансур. Во 1975 година дипломирал на Факултетот за фармација на Александрискиот Универзитет. Работел неколку години во структурата на Светската здравствена организација (СЗО – WHO) во Велика Британија, а потоа бил директор на фабрика за производство на лекови при министерството за здравство на Египет во градот Даманхур. Како неженет се замонашил во јули 1988 година, во манастирот на свети Бишо. Ракоположен е за свештеник во јули 1998 година. Автор е на 12 теолошки книги. Покрај арапскиот, течно го зборува и англискиот јазик. До неговото прогласување за поглавар на Коптската православна црква, тој беше епископ на египетската провинција Ал-Бухејра.
Теодориус Втори уште од првиот ден на стапнување на чело на патријаршијата ќе се ангажира на решавање на многу сложени прашања со кои се соочуваат христијаните во Египет денес. Главното меѓу нив, како што сметаат во патријаршијата, е „надградбата внатре во самата коптската црква“, во врска со значителното зголемување на младите меѓу египетските христијани, како и ангажирање во „конструктивен однос со новата влада“ на земјата, на чиешто чело летово дојдоа поддржувачите на исламистичкото движење Муслиманско братство.
Коптската православна црква е една од најстарите христијански цркви во светот. Според преданието, таа е основана од страна на Апостол Марко кој се смета за нејзиниот прв патријарх. Во моментов, коптите се најбројната христијанска конфесија на Блискиот исток, а огромното мнозинство на коптите живеат во Египет. Во моментов, според официјалните податоци, бројот на коптите во Египет изнесува околу 10 милиони. Коптите, пак, тврдат дека во земјата има речиси 17 милиони христијани, или околу 20 отсто од вкупно 85 милионското население Египет./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.