Свет
Израел и Хамас ги договорија главните точки на примирјето
Египетскиот министер за надворешни работи Мохамед Камел Амр објави дека во средата во 20 часот по средноевропско време стапи на сила примирјето меѓу Израел и палестинското движење Хамас, соопштувајќи ги главните одредби на примирјето.
Според објавените одредби Израел мора да ја сопре секоја копнена, поморска или воздушна офанзива врз Појасот Газа, вклучувајќи ги и копнени упади и ликвидации на лица;
Сите палестински фракции мора да ги прекинат сите напади од Појасот Газа врз Израел, вклучувајќи ги и ракетирањата и сите други напади по должината на границата;
Со примирјето се предвидува отворање премини, поедноставување на движењето на поединци и транспортот на стоки, како и укинување на ограничување на движењето на населението;
Треба да се разгледа секое друго прашање коешто ќе го постави една или двете страни;
Се одредува нултиот час за стапување на сила на овој договор;
Секоја страна мора да му се обврзе на Египет дека ќе го почитува договорот;
Секоја страна мора да се обврзе дена нема да води никаква акција со којашто би го прекршила овој договор.
Израелската армија доцна вечерта во средата соопшти дека ги прекинала борбените дејствија во Појасот Газа како исполнување на одлуката на политичкото раководство, во согласност со примирјето постигнато по еднонеделните меѓусебни напади со палестинските милитанти.
„Армијата во моментот не дејствува во Газа. Недејствувањето започна во 21 часот (20 часот по македонско време)“, изјавила портпаролката на израелската армија за РИА Новости.
Операцијата „Облечен столб“ како израелски одговор на зачестените ракетни напади започна во Појасот Газа на 14-ти ноември, се сведе на напади од далечина по стотици цели во палестинската енклава. Операцијата и покрај најавите не прерасна во копнена инвазија.
Говорејќи претходно во Ерусалим со премиерот Бенјамин Нетанјаху и министерот за надворешни работи Авигдор Либерман, израелскиот министер за одбрана Ехуд Барак објави дека се постигнати сите цели на кампањата и предупреди за подготвеноста да се примени уште поголема борбена сила против милитантите, доколку биде нарушено примирјето./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.