Египетското уставотворно собрание за изработка на новиот устав со гласање во четвртокот одлучи принципите на исламот остануваат главен извор на правото, како и во претходниот устав од режимот на соборениот претседател Хосни Мубарак.

Ова прашање беше главниот извор на несогласувања и жестоки судири меѓу тврдокорните исламисти салафистите и либералите во уставотворното собрание кое ќе гласа поединечно за секој од 234-те членови на нацрт уставот, пред да биде испратено на одобрување од претседателот Мохамед Мурси, по што тој треба да распише референдум.

Муслиманското братство, исламистичко движење раширено во исламските земји од кое доаѓа и египетскиот претседател Мурси, се надева на брзо усвојување на уставот што ќе помогне во надминување на кризата предизвикана со указот за проширување на овластувањата на претседателот на државата.

Додека членот 2 кој зборува за изворот на правото останува непроменет, новите одредби појаснуваат што се смета под „принципи“ на исламскиот закон или познат како шеријат.

Уставотворното собрание, исто така, усвои нов член кој одредува дека Ал-Азхар, изворниот момент на сунитскиот ислам, ода да биде консултирана во врска со „прашања поврзани со исламскиот шеријат“.

Конечниот нацрт на уставот воведува некои историски промени во египетскиот политички систем. Така, на пример, го ограничува мандатот на претседателот на два мандата, за разлика од периодот на Хосни Мубарак кој беше на власт 30 години.

Исто така, се воведува и нов одреден степен на цивилен надзор над моќната армија, иако критичарите велат дека тој не е доволно силен.

Изработката на нацрт уставот ја одбележаа многу спорови меѓу исламистите коишто доминираат во уставотворното собрание и секуларните странки кои тврдат дека Муслиманското братство и неговите сојузници ги маргинализираат во овој процес. Така, претходно собранието го напуштија многу угледни личности, како поранешниот генерален секретар на Арапската лига, Амр Муса, и претставниците на египетската христијанската заедница на Коптите./крај/мф/сн