Шефот на руската дипломатија Сергеј Лавров, во саботата го обвини Западот дека се обидува да го поттикне развојот на демократијата во други земји со „железо и крв“, објаснувајќи ја одлуката на Москва да не им се придружи на земјите кои бараат заминување на сирискиот претседател Башар ал-Асад.

Повторувајќи ја пораката на претседателот на Руската Федерација, Владимир Путин, министерот за надворешни работи Сергеј Лавров имаше остар говор во настапот пред советот за надворешна и одбранбена политика, само два дена пред претседателот Путин да замине за Турија каде што во рамките на рамките на третото заседание на руско-турскиот Совет за соработка на високо ниво кој се одржува еднаш годишно, се очекува дека ќе доминира темата и проблемите со конфликтот во Сирија, во кој Анкара застана на страна на бунтовниците коишто сакаат да го соборат претседателот Асад.

„Русија не се спротиставува на западното влијание, ниту сака од инает да го ‘стави стапот во тркалото’ во проектите кои ги иницира Западот“, рекол Лавров.

„Фактот е дека обидот за поттикнување на демократијата со железо и крв не функционира, и тоа стана јасно последните месеци, во минатата година иполовина“, додал рускиот министер за надворешни работи.

Лавров додал дека во повеќето случаи таквата постапка предизвикува спротивна реакција, и води кон јакнење на екстремистите и репресивните сили, смалувајќи ги притоа изгледите за вистински демократски промени.

Москва тврди дека западните и сунитските арапски држави од Заливот ги поттикнуваат и поддржуваат бунтовниците во Сирија кои се борат да го соборат од власт претседателот Башар ал-Асад кои пропаѓа на алавитската заедница (дел од шиитскиот ислам) и ја има поддршката од Друзите и христијаните. Додека САД и ЕУ го обвинуваат Кремљ дека го штити Асад во 20-те месеци крвопролевање./крај/мф/сн