Американскиот министер за одбрана Леон Панета ги потпишал налозите за испраќање на ракетните системи „Patiot“ и 400 американски војници во Турција, поради одбрана од можни ракетни напади од Сирија, јави во петокот Reuters.

Во Турција ќе бидат испратени вкупно шест батерии од земјите коишто ги поседуваат модернизираните системи „Patriot PAC 3“ кои се дизајнирани за пресретнување проектили или авиони, и тоа од САД, Германија и Холандија, кои ќе бидат под команда на НАТО, а треба да станат оперативни до крајот на јануари.

На 7-ми декември Холандија одлучи наскоро да и’ испрати на Турција за разместување на границата со Сирија два противракетни система „Patriot“ и 360 свои војници.

Германската влада претходно одобри за доставување на Турција две батерии од овој систем, со 170 војници за што дозвола треба да даде и Бундестагот.

Турција како членка на НАТО на 21-ви ноември официјално побара од своите сојузници распоредување на противвоздушните ракетни системи „Patriot“ на нејзината 910 километри долга граница со Сирија каде 20 месеци се води жесток внатрешни вооружен конфликт. Овие системи коишто во минатото веќе беа еднаш распоредени на турската територија во 1991 и 2003 година во времето на првата и втората Заливска војна против Ирак, може да уништат во лет проектили коишто би дошле од територијата на Сирија, како што беше случај досега во неколку наврати./крај/мф/сн