Свет
Најниските температури во Кина во последните три децении

Температурите во Кина оваа зима се најниските во последните 28 години, поради што морето во крајбрежните замрзнали и заробило околу илјада бротчиња.
Од ноември Кина ја зафати силен студен бран, а просечната температура е минус 3,8 Целзиусови степени што е за 1,3 степени постудено отколку просечните зимски температури. Тоа се најниските температурни вредности во последните 28 години, пренесе во саботата агенцијата Синхуа, повикувајќи се на податоците од кинеската метеоролошка служба.
Температурите под нулата го замрзнале морето во заливот Лаижу во покраината Шандонг во источна Кина, а во мразот останале оковани илјади пловила, пишува China Daily.
Женг Донг, шефот на метеоролошката служба во Поморскиот центар за надзор кој делува во рамките на Државната управа за океаните, за весникот изјавил дека оваа седмица со мраз се оковани 291 километар од површината на заливот Лаижу.
Отежнато е и одвивањето на сообраќајот низ Кина, а во некои области има и целосен прекин. Повеќе од 140 летови од аеродромот во централната покраина Хунан се одложени, а поради големите снежни врнежи се затворени и некои важни железнички линии, како што е линијата Пекинг – Хонгконг – Макао, пишува China Daily.
Најниските температури се регистрирани во североисточните делови од Кина, Во некои предели изнесува минус 15,3 Целзиусови степени, што е за 3,7 степени пониско отколку претходните години. Кинеските метеоролози соопштија дека тоа се најниските температури измерени во тој дел од земјата во последните 43 години./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Остатоците од ураганот Ерин се движат кон Западна Европа, можни се бури и бранови до 12 метри

Западна Европа, Обединетото Кралство и Ирска се соочуваат со нестабилно време во текот на следните неколку дена, бидејќи остатоците од ураганот Ерин се приближуваат кон континентот.
Откако достигна јачина од категорија 5, Ерин се движеше кон Европа од источниот брег на Северна Америка како моќен посттропски циклон, а системот веќе предизвикува загриженост за можни силни бури на крајот од неделата, пишува Severe Weather Europe.
Остатоците од ураганот ќе останат силни во текот на понеделник и вторник, со центар западно од Ирска и Обединетото Кралство. Пред да пристигне циклонот, температурите во Обединетото Кралство би можеле да достигнат 30°C денес, но топлото време ќе биде краткотрајно. Дожд и ветер се очекуваат во текот на ноќта во вторник, прво во Ирска и Северна Ирска, а потоа и во остатокот од Кралството.
Ерин е првата бура од атлантската сезона во 2025 година што достигна јачина на ураган. Своето патување го започна како тропски бран на 9 август, а до 16 август се засили во бура од категорија 4. Кратко потоа, „ловците на урагани“ на NOAA објавија дека Ерин се засилила до бура од категорија 5, со ветрови од 260 км/ч и минимален централен притисок од 915 милибари. Таа јачина ја задржа поголемиот дел од денот, по што почна да слабее.
Се очекува времето да се влоши од средината на неделата со силни ветрови и обилни врнежи од дожд придружени со грмотевици. Иако најсилните ветрови претежно ќе останат на отворено море, високите бранови ќе го погодат западниот брег на Европа.
Денес, тие би можеле да достигнат висина од 10 до дури 12 метри западно од Ирска. Во средината на неделата, во среда и четврток, се очекуваат бранови од 8 до 10 метри по должината на бреговите на Ирска, Северна Ирска и делови од Шкотска, а ќе се прошират низ Бискајскиот Залив кон Франција и Шпанија.
Свет
Најмалку 15 мртви во израелски напад во Газа, меѓу нив и четворица новинари

Во израелски напад врз болницата „Насер“ во Газа загинаа најмалку 15 лица, вклучувајќи четворица новинари, соопштија денес палестинските здравствени претставници. Меѓу убиените е снимателот Хосам ал-Масри, соработник на „Ројтерс“.
Официјалните лица изјавија дека Масри е убиен во првиот воздушен напад, а фотографот Хатем Халед, исто така соработник на „Ројтерс“, е ранет во вториот напад.
Сведоците за „Ројтерс“ изјавија дека вториот напад се случил кога спасувачите, новинарите и цивилите се собрале на местото на првиот напад.
Здравствените власти во Газа изјавија дека преостанатите тројца убиени новинари се Маријам Абу Дага, Мохамед Салама и Моаз Абу Таха. Меѓу загинатите е и еден спасувач.
Израелската војска и канцеларијата на премиерот Бенјамин Нетанјаху сè уште не дале коментар за нападите врз болниците.
Синдикатот на палестинските новинари објави дека повеќе од 240 палестински новинари се убиени во израелските напади во Газа од почетокот на војната на 7 октомври 2023 година.
фото: принтскрин
Свет
Основачот на „Телеграм“: Франција го уништи својот углед како слободна земја

Основачот на „Телеграм“, Павел Дуров, изјави дека Франција го уништила својот углед како слободна земја со неговото апсење минатата година.
Дуров беше уапсен на аеродромот во Париз во август 2024 година под обвинение дека им овозможил на криминалци да ја користат неговата апликација за нелегални активности, вклучително и екстремизам и злоупотреба на деца. Рускиот технолошки претприемач подоцна беше ослободен со кауција од 5 милиони евра и му беше дозволено да се врати во Дубаи, каде што живее.
Дуров го опиша своето апсење како без преседан и правно и логички апсурдно.
Тој рече дека истрагата не пронашла никакви докази за прекршок нагласувајќи дека практиките за модерирање на „Телеграм“ ги следеле индустриските стандарди и дека компанијата ги исполнила сите правно обврзувачки барања од француските власти.
Дуров исто така тврдеше дека француските истражители ги заобиколиле законските канали на ЕУ кога испратиле барања до платформата, грешка што можеше да се избегне со „едноставно пребарување на постапката на ‘Гугл’ или со прашување“.
„За жал, единствениот резултат од моето апсење досега е огромна штета на угледот на Франција како слободна земја“, напиша Дуров додавајќи дека сè уште мора да доаѓа во Париз на секои две недели, без датум за жалба на повидок.
Оттогаш „Телеграм“ ја ажурира својата политика за приватност за да овозможи собирање метаподатоци, вклучувајќи ИП-адреси, податоци за уредите и промени на корисничките податоци, до една година, со можност за предавање на надлежните судски органи.
фото: принтскрин