Руски и американски претставници и меѓународниот посредник за Сирија на Обединетите нации и на Арапската лига, алжирскиот дипломат Лакдар Брахими се обврзаа во петокот во новиот круг од преговорите во седиштето на светската организација во Женева да изнајдат политичко решение за сирискиот судир.

Станува збор за трет ваков состанок од декември. Рускиот министер за надворешни работи Сергеј Лавров и американската државана државна секретарка Хилари Клинтон се договорија за ваков формат на 6-ти декември на средбата во Даблин.

Заменикот на американската државна секретарка Вилијам Барсн и заменикот на шефот на руската дипломатија Михаил Богданов ги продолжија разговорите на 9-ти декември во Женева, а во петокот повторно се состанаа во седиштето на Обединетите нации во Женева.

Посредникот Лакдар Брахими по доаѓањето само ги поздравил присутните без да даде никаква изјава, што го сториле и Барнс и Богданов. Овие преговори секогаш се држеа зад затворени врати и за нивната содржина многу малку се знае, потсетува AFP.

Средбата се одвива во моментите кога Дамаск во четвртокот го разгневи Брахими, но сепак не му ја откажа соработката. „Изјавите на Лакдар Брахими сведочат за неговата очигледна пристрасност кон круговите (коишто подготвуваат заговор) против Сирија и сирискиот народ“, изјави шефот на сириската дипломатија во соопштението емитувано преку државната телевизија.

Меѓутоа официјален Дамаск не сака да ја прекине соработката со посредникот Брахими„ Сирија и натаму се надева на успех на својата мисија и ќе ја продолжи соработката со него тргнувајќи од својот став за политичкото решение на сириската криза“, додаде сирискиот министер за надворешни работи.

Ова всушност претставуваше одговор на интервјуто што Брахими претходно во средата го даде за британски BBC, во кое оцени дека планот за излегување од кризата кој во неделата го изложи сирискиот претседател Башар ал-Асад „е уште поисклучив и попристрасен“ од претходниот. Асад имено во својот мировен план ја исклучи секоја можност да преговара со вооружената опозиција којашто ја нарече платеник и марионета на странските интереси.

Москва од своја страна го повтори својот став дека решение на судирот не може да има без дијалог меѓу власта и опозицијата, без предуслови, за разлика од бунтовниците и Западот кои бараат неизоставно заминување на претседателот Башар ал-Асад од власта./крај/мф/сн