Венецуела на Соединетите Американски Држави ќе им ја испорачува својата санкционирана нафта на неопределено време, откриле денеска извори блиски до Белата куќа, пишува „Си-ен-би-си“.

Оваа информација доаѓа откако американскиот претседател Доналд Трамп вчера објави дека Венецуела ќе испорача почетна транша од 30 до 50 милиони барели нафта, која ќе се продава по пазарни цени.

„Тие пари ќе ги контролирам јас, како претседател на Соединетите Американски Држави, за да се осигурам дека ќе се користат за доброто на народот на Венецуела и на Соединетите Американски Држави“, порача Трамп преку социјалните мрежи.

Според наводите на изворите, 50 милиони барели се само првата пратка, а испораките ќе продолжат неограничено. Американските санкции против Венецуела ќе бидат селективно укинати за да се овозможи транспорт и продажба на нафтата на светските пазари. Приходите од продажбата ќе бидат депонирани на сметки под контрола на САД, а средствата ќе ѝ бидат враќани на Венецуела според одлука на американската страна.

Планот подоцна го потврди и американскиот министер за енергетика Крис Рајт на конференција што во средата во Мајами ја организираше Голдман Сакс.

„Ќе ја пласираме на пазар суровата нафта што доаѓа од Венецуела“, изјави Рајт. „Прво оваа заостаната, складирана нафта, а потоа, неограничено и во иднина, ќе ја продаваме и тековната венецуелска продукција на пазарот.“

Досега, санкционираната венецуелска нафта најчесто завршуваше во Кина, но сега ќе биде пренасочена кон САД. Трамп појасни дека танкери за складирање ќе ја транспортираат нафтата директно до американските пристаништа.

Венецуела, една од основачките членки на ОПЕК, располага со најголемите докажани резерви на сирова нафта во светот, но во моментов произведува околу 800.000 барели дневно, според податоци на енергетската консултантска компанија Кплер. За споредба, САД моментално произведуваат околу 13,8 милиони барели дневно.

Претседателот на Украина, Володимир Зеленски побара нова средба со американскиот претседател Доналд Трамп, откако нивни претставници повторно разговарале за најспорните прашања во мировните преговори за ставање крај на војната во Украина.

Киев е под постојан притисок од Соединетите Американски Држави за што побрзо постигнување мир, но инсистира на безбедносни гаранции од сојузниците и ги одбива руските барања за отстапување на источниот дел од Доњецката област и за губење на контролата врз нуклеарната централа Запорожје.

Во разговор со новинари преку „Ватсап“, Зеленски изјави дека сака повторно да се сретне со Трамп за да ја процени неговата подготвеност САД да гарантираат долгорочни безбедносни гаранции, подолги од 15 години, во случај на примирје. Тој го повика Трамп да изврши поголем притисок врз Русија, оценувајќи дека Москва ладно реагира на мировните напори поддржани од САД и продолжува со воздушни напади врз украинските градови и енергетската инфраструктура.

„Американците во моментов се продуктивни и резултатите се добри. Мора да извршат притисок врз Русија. Имаат алатки и знаат како да ги користат“, изјави Зеленски.

Белата куќа засега не одговори на барањето за коментар за можната нова средба меѓу Зеленски и Трамп.

Фото: Depositphotos

Американскиот претседател Доналд Трамп во подолга објава на својата социјална мрежа Трут соушал го изнесе своето гледиште за НАТО. Тој порача дека се сомнева оти сојузниците би застанале зад Соединетите Американски Држави „ако навистина ни бидат потребни“, но истовремено нагласи дека САД секогаш ќе бидат тука за НАТО, „дури и ако тие не бидат тука за нас“.

Во својата објава не наведе што би значел неговиот став во контекст на неговите претходни закани за преземање на Гренланд, кој е дел од Данска, една од членките на НАТО.

Трамп, исто така, ги презеде заслугите за зајакнувањето на НАТО, тврдејќи дека токму тој ги поттикнал земјите-членки да ја зголемат одбранбената потрошувачка. Тој изјави и дека без него „Русија сега би ја имала цела Украина“, а остро го критикуваше и Нобеловиот комитет затоа што не му ја доделил Нобеловата награда за мир.

Тој додаде дека Америка е обновена под негово водство и дека е „единствената нација од која **Кина и Русија се плашат и која ја почитуваат“.

Објавата на Трамп во целост

„Запомнете, за сите тие големи обожаватели на НАТО, тие беа на 2% од БДП, а повеќето не ги плаќаа своите сметки, СÈ ДОДЕКА ЈАС НЕ ДОЈДОВ. САД, глупаво, плаќаа за нив! Јас ги доведов, со почит, до 5% од БДП, И ТИЕ ПЛАЌААТ, веднаш. Сите велеа дека тоа не може да се направи, но можеше, бидејќи, над сè, сите тие се мои пријатели. Без моето учество, Русија сега би ја имала ЦЕЛА УКРАИНА.

Запомнете и дека јас самостојно ЗАВРШИВ 8 ВОЈНИ, а Норвешка, членка на НАТО, глупаво одлучи да не ми ја додели Нобеловата награда за мир. Но тоа не е важно! Она што е важно е дека спасив милиони животи. РУСИЈА И КИНА НЕМААТ НИКАКОВ СТРАВ ОД НАТО БЕЗ СОЕДИНЕТИТЕ АМЕРИКАНСКИ ДРЖАВИ, И СЕ СОМНЕВАМ ДЕКА НАТО БИ БИЛ ТУКА ЗА НАС АКО НАВИСТИНА НИ БИДЕ ПОТРЕБЕН. СИТЕ СЕ СРЕЌНИ ШТО ЈА ОБНОВИВ НАШАТА ВОЈСКА ВО МОЈОТ ПРВ МАНДАТ, И ПРОДОЛЖУВАМ ДА ГО ПРАВАМ ТОА.

Секогаш ќе бидеме тука за НАТО, дури и ако тие не бидат тука за нас. Единствената нација од која Кина и Русија се плашат и која ја почитуваат е САД“, напиша Трамп.

Фото: Depositphotos