Хирургот на двајца скопјани им издал уверенија дека во сообраќајка се здобиле со наводно тешки телесни повреди со цел да добијат отштета

Кривична пријава за лекар од Градската општа болница во Скопје

Хирургот на двајца скопјани им издал уверенија дека во сообраќајка се здобиле со наводно тешки телесни повреди со цел да добијат отштета

ГОРАН АДАМОВСКИ

Министерството за внатрешни работи го осомничи 44-годишниот Ѕ. Н., хирург во Градската општа болница во Скопје, дека издал лажно лекарско уверение со цел да се извлече голема финансиска отштета од осигурителна компанија. Имено, пред да биде запознаено Обвинителството и истражниот судија, како што беше соопштено на новинарите, хирургот на двајца скопјани им издал уверенија дека се здобиле со тешки телесни повреди, и тоа скршеници на ребро во сообраќајна несреќа што ја доживеале минатата година, иако станувало збор за лесни повреди. Триесет и четиригодишниот Т.Ј. и дваесет и шестгодишната Ѓ.М. на 27 август минатата година во близина на Охрид направиле сообраќајка, по што биле префрлени во Медицинскиот центар во Охрид. Оттаму биле донесени во Градската болница во Скопје, каде што биле примени од сега осомничениот лекар. Тој им направил рендгенски преглед на пациентите, при што јасно било дека не станува збор за скршеници. Но, пациентите се спогодиле со хирургот, па набргу им бил издаден документ според кој Т.Ј. и Ѓ.М. имале скршеници на осмото ребро. Со таквото уверение осигурителната компанија АД “Вардар осигурувањееи (каде што биле осигурани) требало да им исплати 984.000 денари или по 492.000 денари на секого. Но, во компанијата се посомневале и побарале помош од полицијата, по што се утврдила вистината.

Против хирургот Ѕ.Н. е поднесена кривична пријава за сторено дело издавање лажно лекарско уверение, а Ј.Т. и Ѓ.М. добија кривични пријави за измама.

Вчера не успеавме да стапиме во контакт со осомничениот доктор, за да ја слушнеме неговата вистина.

Изминатата година во државава беа откриени седум случаи на корумпирани лекари. Досега ниту еден случај нема судска разрешница.

Битолската полиција го осомничи лекарот М.Н. (49) од Одделението за пневмофтизиологија при Медицинскиот центар од Битола за примање поткуп. Тој се товареше дека примил 400 американски долари и 100 евра од извесен битолчанец како противуслуга за издавање документ, со што би “потврдилли дека неговиот клиент е целосно неспособен за отслужување на воениот рок.

Истражен судија од Основниот суд Скопје 1 е ангажиран во расветлувањето на случајот што го откри полицијата во Клиничкиот центар во Скопје во Одделот за урологија. Во кривичната пријава стои дека лекарот-хирург Д.П. (38) од пациентка од Кавадарци добил 200 евра за хируршка интервенција и уште 100 евра за сместување во Клиниката. Според официјалната информација во врска со случајот, осомничениот бил фатен на дело.

Хирургот К.М. од Охрид, специјалист за уво, нос и грло, оперирал “со подобар квалитетти за 50 или 200 евра. Во јануари минатата година, В.А., хирург од Куманово, побарал од пациент 200 евра за операција. Пациентот го пријавил случајот во полиција, по што хирургот бил фатен со обележаните евра. Еден месец подоцна, Ѓ.Ѓ., хирург од Воената болница во Скопје, побарал 200 евра од пациент, но бил откриен според истото сценарио. Поткупот е гаранција дека во лекарската постапка ќе биде внесен подобар квалитет и посебна ангажираност.

По откривањето, следуваат полициски кривични пријави за извршено кривично дело поткуп. Истовремено, следува суспензија до расветлување на случајот. Меѓу поднесената кривична пријава и судската истрага за случајот по барање на основниот јавен обвинител настанува долг период на прибирање цврсти докази. Во три од седумте откриени случаи на поткуп биле отфрлени сомневањата и предметот бил вратен на дообработка од полицијата. За преостанатите случаи се води судска постапка. Во ниту еден случај поткупувачот не е осомничен за соучество во извршено кривично дело. Според правното толкување, тој што дава поткуп се ослободува од одговорност ако соработува со истражните органи.