Воен брод на Руската морнарица во четвртокот се закотви во пристаниште во Хавана, Куба, јавуваат локалните медиуми.

Ваквото придвижување на силите настапи веднаш откако рускиот министер за одбрана најави планови за проширување на военото присуство на Русија низ целиот свет.

Станува збор за известувачко – разузнавачкиот воен брод „Виктор Леонов ЧБ – 175″, кој е опремен со софистицирана опрема за електронски следење, како и со ракети и противвоздушно вооружување.

Агенцијата АП истакнува дека неговото присуство го привлекло вниманието на љубопитните жители на Хавана.

На јарболот на бродот се виорат руското и кубанското знаме, наведува АП.

Куба и Советскиот Сојуз имаа блиски воени и економски врски за време на Студената војна, но тие беа запоставени по падот на „железната завеса”, се вели во текстот на АП.

Рускиот министер за одбрана, Сергеј Шојгу, изјавил дека Русија планира да го прошири постојаното воено присуство надвор од своите граници отворајќи воени бази во некои странски земји, вклучувајќи ја и Куба.

Москва моментално има само една поморска база надвор од границите на поранешниот Советски Сојуз, а таа се наоѓа во Тартус во Сирија, но судбината на оваа база е неизвесна поради граѓанската војна која и понатаму трае во оваа земја, наведуваат руските агенции.

Постсоветска Русија ја затвори големата поморска база во Виетнам и една радарска база на Куба во 2002 година поради финансиски притисок.

Меѓутоа, Русија почна повторно да ја обновува својата поморска и стратешка авијација од средината на минатата деценија, сметајќи дека тоа е погодна ситуација да ја проектира сликата за себе надвор од своите граници и да ги заштити националните интереси на земјата низ целиот свет./крај/мф/ап