Зошто Владата ги држи во тајност деталите од договорот со Словенците за изградба на 20 мали хидроцентрали во вредност од 100 милиони евра, што е најголема странска инвестиција во Македонија годинава?

ЕКСПЕРТИ СЕ СОМНЕВААТ ВО СПОГОДБАТА СО СЛОВЕНЦИТЕ

Зошто Владата ги држи во тајност деталите од договорот со Словенците за изградба на 20 мали хидроцентрали во вредност од 100 милиони евра, што е најголема странска инвестиција во Македонија годинава? Ова е едно од дузината прашања што ги поставува професорот од Машинскиот факултет во Скопје, Атанаско Туневски, откако во минатата недела Владата, со непосредна спогодба, на словенечки “Турбоинститут” му даде концесија за користење води.

Тој сака да знае кој е акцискиот план на инвеститорот, каков е моделот на инвестирање, колкав ќе биде вкупниот очекуван профит и која е добивката на државата од инвестицијата во наредните 30 години.

– Колку “Турбоинститут” ќе ја плати концесијата за користење на водите, а колку ќе изнесува концесијата за производство на електрична енергија? Владата треба да каже и зошто одлучила првите концесии за користење на водите да ги даде токму на странски инвеститор и тоа со непосредна спогодба, кога се уште не се изградени контролни механизми за заштита на државата – вели професорот Атанаско Туневски.

Според советникот за енергетика во Министерството за економија, Никола Черепналковски, Владата ги дала првите концесии со непосредна спогодба бидејќи на земјата и требаат итни инвестиции во енергетиката. Според него, меѓународниот тендер бара време, не помалку од две години, период во кој “Турбоинститут” треба да ги изгради 20-те мали хидроцентрали.

– Ова се приказни за деца. Годишното производство на 20-те хидроцентрали ќе изнесува 300 гигават-часови електрична енергија, што не е ни четири отсто од годишните потреби на Македонија, кои пак од година во година растат за по пет проценти. Овие хидроцентрали нема да го покријат ни очекуваниот годишен пораст на побарувачката за енергија – објаснува Туневски.

Тој вели дека со овој потег Владата целосно го искомпромитирала Законот за води зошто сега не е јасно како на идните инвеститори, од кои се очекува да вложуваат во изградбата на преостанатите 386 хидроцентрали, ќе им ги објасни критериумите врз основа на кои избира со кого ќе склучи непосредна спогодба, а од кого ќе бара да оди на меѓународен тендер.

– Не е проблем спогодбата. Таа можеби е и добра, но никој не внимава, бидејќи подоцна со право на овој случај ќе се повикуваат сите идни инвеститори – велат професори од Електротехничкиот факултет.