Свет
Судија на платен список на „Славија“
За помагање на криминалната приватизација на фирмата се осомничени и други судии
ИСТРАГАТА СЕ ПРОШИРУВА
За помагање на криминалната приватизација на фирмата се осомничени и други судии
Доскорешниот в.д. претседател на Основниот суд 2 во Скопје, судијата Александар Младеновски, е осомничен дека бил замешан во криминалната приватизација на „Славија“ ДОО, дознава „Дневник“. Истражниот судија од овој суд, кој веќе ја почна истрагата за незаконската приватизација на оваа фирма, не го прифатил барањето од обвинителството да бидат притворени осомничениот поранешен в.д. директор и сопственик на „Славија“, Кирил Кочовски, и неговите блиски соработници, управители или основачи, Мирко Петревски, Гордана Ѓоргиевска, Новица Стевановиќ и Жаклина Павловска.
Обвинителството ќе го обжали ваквото решение на истражниот судија бидејќи смета дека тие можат да влијаат врз сведоците.
Коцевски и неговите соработници се осомничени дека со малверзации со наплата на непостојни долгови за канти сирење, помогнати од судии, дошле до сопственост врз „Славија“.
Извори на „Дневник“ велат дека судијата Младеновски ги искористил службената положба и овластувања и спротивно на законот за судови и судскиот деловник, го водел судскиот процес за приватизација на „Славија“, а во исто време на фирмата и’ давал совети и бил на платен список на другите осомничени во случајот. Упатените велат дека органите на прогонот располагале со докази оти тој од раководството на „Славија“ примал по околу 60.000 денари месечно и на тој начин незаконски стекнал повеќе од 650.000 денари. Во случајот била замешана и неговата мајка, пензионирана судијка за стопански спорови, Даница Младеновска. Таа била ангажирана како советник од раководството на „Славија“ за што примала месечен надомест од околу 22.000 денари. Истите извори велат дека и други судии ќе бидат осомничени за злоупотреба на службената положба во случајот „Славија“.
Според пријавата против Кочовски, тој станал сопственик на повеќе од 98 отсто од капиталот на „Славија“ со наплата на фиктивен долг за канти сирење. Како основач и сопственик на „Евро промет“, Кочовски складирал повеќе канти сирење во магацините на „Славија“. По некое време сирењето му било вратено на „Евро промет“. „Славија“ паднала во стечај во 1996 година, а фирмата на Кочовски пријавила дека има побарување за сирењето. Стечајниот управник не го прифатил побарувањето и почнал судски спор по две тужби за ист долг, а во вредност од околу 15 милиони денари. Тужбите биле поднесени иако претходно било извршено порамнување меѓу „Славија“ и „Евро промет“. Кога во 2000 година Кочовски станал в.д. директор на „Славија“, во две одвоени судски постапки била досудена исплата на долгот, кој со каматите пораснал на повеќе од 97 милиони денари. Во меѓувреме „Евро промет“ паднал во стечај, па парите од фиктивниот долг со цесија биле префрлени на фирмата „Балкан пром К 94“, која тој ја основал. Кочовски и неговите соработници донесле одлука побарувањата на доверителите да се претворат во траен влог и преку побарувањата на неговата новооснована фирма тој станал сопственик на повеќе од 98 отсто од капиталот на „Славија“.
(Н.Н.С.)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Рјабков: Русија нема доверба во НАТО
Геополитичките проекти со НАТО сега се невозможни, Москва нема доверба во Алијансата и кај нас предизвикува политичка и емотивна одбивност, изјави денеска рускиот заменик министер за надворешни работи Сергеј Рјабков.
„Геополитички дизајн од секаков вид со НАТО е невозможен. НАТО не е пандан способен за преговори, тоа е групација во која не само што немаме ни најмала доверба, туку ни предизвикува политички и, дури би рекол, емотивна одбивност“, рече Рјабков во интервју за ТАСС.
Тој посочи дека Русија ќе работи со оние „кои се подготвени да преговараат на еднаква основа“.
„Големиот евроазиски простор, концептите на евроазиската безбедност, се она што доаѓа во центарот на вниманието на архитектонските проекти во однос на политиката и геополитиката. Според нас, тоа е она на што пред се треба да се фокусираме“, посочи Рјабков.
Свет
Ирански командант: Три европски земји ќе одговараат за помошта кон Израел
Командантот на силите Кудс, Есмаил Кани изјави дека трите европски земји кои ги распоредија своите воени авиони за да го одбранат Израел од одмаздничката операција организирана од Иран ќе одговараат.
– Франција, Германија и Велика Британија не треба да мислат дека распоредувањето на авионите таа ноќ е крај на проблемот. Да, таа ноќ заврши, но ќе одговорат во догледно време – изјави бригадниот генерал Есмаил Кани.
Според него, Соединетите Американски Држави и целата западна воена алијанса на НАТО придонеле со сите свои воени капацитети за одбрана на Израел од иранската операција „Вистинско ветување“, пренесува иранската агенција „Тасним“.
– Седум или осум поморски групи се распоредени во Црното Море за да се спречи (иранската) операција – рече тој, додавајќи дека во таа операција се вклучени и повеќе од 200 авиони.
Кани оцени дека Иран ја покажа својата сила, непоколебливост и моќ на целиот свет при нападот на територијата на Израел.
– Победата на операцијата „Вистинско ветување“ не е ограничена само на бројот на ракети и беспилотни летала кои стигнаа до окупираните територии – рече Кани и ги повика земјите од регионот да учат од, како што наведе, „неспособноста на САД да го заштитат израелскиот режим за време на иранската операција“ и да не се потпираат на Вашингтон.
На 13 април Техеран истрела повеќе од 300 беспилотни летала и проектили кон Израел, како одговор на нападот врз иранскиот конзулат во сирискиот главен град Дамаск на 1 април, кога беа убиени седум членови на Иранската револуционерна гарда.
Иран тврди дека нападот „Вистинско ветување“ предизвикал голема штета на израелските воени бази.
Регион
Изгласана новата влада на Хрватска: Пленковиќ по трет пат стана премиер
Пратениците во хрватскиот Сабор вечерва гласаа за доверба на новата влада на премиерот Андреј Пленковиќ. За доверба на Владата гласаа 79 пратеници, против беа 61 пратеник, а еден беше воздржан.
Претседателот и членовите на Владата потоа дадоа заклетва пред пратениците, со што Андреј Пленковиќ го започна третиот последователен мандат како премиер.
Во Собранието денеска беше претставена четиригодишната програма на новата Влада, која се заснова на „успешна, витална, праведна, одржлива и суверена Хрватска“.
Во новиот мандат, владата на Пленковиќ најавува просечна нето плата од 1.600 евра, минимална бруто плата од 1.250 евра, како и отворање на 125.000 нови работни места.
До крајот на мандатот на новата влада, пензиите треба да се зголемат за најмалку 30 отсто, со што просечната пензија би изнесувала најмалку 750 евра.
Новата влада наместо досегашните 16 ќе има 18 министерства и седум потпретседатели.