Секојдневно ми се закануваат, се плашам како ќе продолжам да го воспитувам и да го одгледувам моето дете, изјави за „Време“ мајката на една од жртвите на малолетничката проституција, за што против угостителот С. М. во штипскиот Основен суд се води судски процес, откако се самоуби 14-годишната Р. Ц., во саботата.

(Време) – среда, 10.05.2006

Секојдневно ми се закануваат, се плашам како ќе продолжам да го воспитувам и да го одгледувам моето дете, изјави за „Време“ мајката на една од жртвите на малолетничката проституција, за што против угостителот С. М. во штипскиот Основен суд се води судски процес, откако се самоуби 14-годишната Р. Ц., во саботата.

Несреќното девојче во саботата се обидело да се фрли од терасата на куќата на својот татко во Штип, а потоа испило големи количества разновидни лекови. Нејзина сосетка пријавила во Брза помош, по што девојчето било однесено во штипската болница, каде што починало. Нејзината смрт ги одложи завршните зборови во процесот.

Мајката на другата малолетничка, која е сведок и жртва во истиот случај на проституција, вели дека откако се посомневала во тоа што го работи нејзината ќерка, и го одзела мобилниот телефон. Така таа станала сведок како на ќерка и и биле закажувани состаноците, но и како насилниците и се заканувале. Сето ова таа го пријавила во штипската полиција.

За време на досегашниот тек на процесот, девојчето што сега се самоуби и нејзината врсничка С. А. изјавувале дека во декември минатата година и во јануари годинава биле принудувани на сексуални услуги за клиенти во Штип, за што С. М. наплаќал по 100 евра, а по 500 денари или картички за мобилен телефон им давал на девојчињата.

Мајката на едно од девојчињата на судењето обвинуваше дека во кафеаната на С. М. на нејзината ќерка и на другите жртви на проституција во пијалакот им ставале „шпанска мушичка“. Таа не е задоволна од досегашниот тек на процесот и смета дека девојчињата не се доволно заштитени откако почнало судењето. Таа смета дека некој сака да го заврши случајот како ништо да не било. Таткото не дозволил да се направи обдукција на телото на починатото девојче.

Според основниот јавен обвинител Стојче Миланов, обвинителството заедно со полицијата и со судот ќе преземе оперативни мерки за утврдување на мотивите за самоубиството. Примероци од крвта и од урината на загинатото девојче се испратени во Судска медицина во Скопје.

– Многу поважно е да се испитаат мотивите за самоубиството. Тоа значи да се испитаат сите околности во кои се случила несреќата, со кого контактирало девојчето пред да посегне по сопствениот живот и со кого контактирало во последните денови – бараат роднините на злоупотребените девојчиња.

Фактот дека девојчето што загина било и клучен сведок во судскиот процес за проституција наведува на заклучок дека најверојатно врз него се вршел силен притисок да не ја открие вистината пред судот.