(Вест) – четврток, 15.06.2006

ВО ДРЖАВНА БОЛНИЦА НЕМА СИСТЕМИ ЗА ВШПРИЦУВАЊЕ НА ЦИТОСТАТИЦИ

Пациентите со рак на белите дробови, на градите, на јајчниците, но и оние што имаат малигни заболувања на други органи трет месец не ја примаат неопходната терапија, оти во болницата ги нема потребните систем

Трет месец пациентите со рак на Институтот за онкологија и радиотерапија во Скопје не се лекуваат, оти во болницата ги нема потребните системи за примање на цитостатици. Поради тоа, уште од април годинава болните кои имаат рак на белите дробови, на градите, на јајчниците, но и оние што имаат малигни заболувања на други органи не ја примаат неопходната терапија. Дури и сами да ги купат лековите, пациентите не можат да ги примат, бидејќи такви системи за нивна апликација нема никаде во земјава.

Како што стојат работите на теренот, Државна болница нема да добие системи ниту во наредните три месеци, оти досега ниту е распишан тендер за нивна набавка ниту е побаран интервентен увоз од странство.

Иако директорот на Клиничкиот центар Андреа Арсовски, заедно со одговорните во клиничката аптека уште од почетокот на годинава знаеле дека овој лек не може да се користи без системи, ги примале лековите од набавувачот, а никого не информирале дека, практично, тие се неупотребливи. За да ја замачкаат работата, тие ги користеле резервите од вакви системи, кои случајно се нашле во магацините на Онкологија. За да не ги остави со месеци без терапија, директорката на Институтот д-р Наталија Петрушевска – Ангеловска се снашла, па системи донела од Загреб. Но количината била доволна само за кусо време, по што од тогаш до денес не примаат никакви лекови против рак.

Онколозите кажуваат дека цитостатикот со генерика "паклитаксел" мора да им се дава на болните преку посебен систем на инфузија, оти ако се даде со обичен, нема да има ефект.

Она што збунува во целата ситуација е зошто и надлежните од Клиничкиот центар и од клиничката аптека дозволиле да се носи овој лек без системи, ако се знае дека со години наназад овој лек се носел во комплет со системот за апликација. Дотолку повеќе што во државната аптека во Клинички, иако со месеци знаеле за состојбата, не се обиделе лекот да го набават од друг набавувач кој бил рангиран на меѓународниот тендер со лекови.

Во Клинички тврдат дека контактирале со Фондот за здравство, но немаат одговор зошто проблемот досега не е решен.

"Досега неколкупати е реагирано до Фондот, од каде што побаравме лекот да се испорачува со системи", објаснија од службата за информирање на Државна болница. Но директорот Арсовски не можеше да се сети кога последен пат испратиле писмо ниту, пак, која фирма ги испорачува цитостатиците врзани со овие системи.

Надлежните во Фондот објаснуваат дека тие како институција имаат обврска да ги контролираат состојбите само со лековите од тендерот, но не и со потрошниот материјал, додавајќи дека тоа е обврска на Клиничкиот центар.