Свет
Колкава е криминалната империја на Смиленски?
Четворицата од семејството Смиленски, Методија, неговата сопруга Јованка и синовите Игор и Горан, криминалната империја од 40 милиони долари државни пари ја имаат остварено преку совршено разработена шема и мрежа од 48 сестрински фирми.
СОВРШЕНО РАЗРАБОТЕНА МРЕЖА ЗА КРАДЕЊЕ ДРЖАВНИ ПАРИ
Мери Јордановска
Четворицата од семејството Смиленски, Методија, неговата сопруга Јованка и синовите Игор и Горан, криминалната империја од 40 милиони долари државни пари ја имаат остварено преку совршено разработена шема и мрежа од 48 сестрински фирми. Дури и обидите на судот да ја разработи империјата на Смиленски завршуваат со прашалници затоа што проневерените државни пари се губат и се распрскуваат низ педесетина фирми оформени во Скопје, Виена, Свети Николе и во Штип.
Се почнува кога Методија Смиленски и неговата сопруга Јованка ја основаат фирмата Симаг Холдинг ГмбХ од Виена, која, пак, ја основа сестринската фирма Дан Трејдинг ГмбХ. Овие две се основачи или, пак, поседуваат акции во уште петнаесет други фирми, како Друштвото за трговија Симаг – Инвест, Имобилијаре, Трикотажа Симаг – Инвест, Агро-инвест Дан Традинг, Д. Ц. Медикал, Алфа корн, Млеко Импекс и многу други. Мрежата не завршува тука. Секоја од овие фирми се јавува како основач на трети деловни субјекти. Така, синовите на Смиленски ја основаат фирмата Дан Макотрејд Виена, која, пак, се јавува како основач на Друштвото за производство и трговија Скопје Млеко. Симаг-инвест ја основаат двете австриски фирми, а оваа, пак, се јавува како основач на живинарската фарма Его фарм, Млеко-импекс, Индус-Симаг, Екотекс, Жито КО Симаг инвест, Аго инжинеринг, Симаг комерц и Депрос. Друштвото за трговија Д. Ц. Медикал, пак, ја основа скопската аптека Медикал, која, пак, се јавува како основач на Дијагностичкиот центар Медика АД Скопје. И така мрежата се заплеткува до тој степен што крајниот резултат што се подготвувал во Основниот суд завршува со прашалници, кои најверојатно никогаш нема да бидат одгатнати.
Судската шема е само доказ за начинот на кој се создавала криминалната империја на австрискиот бизнисмен, кој бара да стане српски државјанин за да ја избегне екстрадицијата во Македонија, а со тоа и одгатнувањето на имињата на сите функционери вмешани во неговиот криминал.
Единствено е сигурен начинот и причината за создавањето на империјата на контроверзниот бизнисмен: фирмите ги купувал евтино, а имотот го ставал под хипотека за кредит. Парите од кредитот во сопствен џеб, а фирмите во ликвидација. Нивниот имот го префрлал како влог за основање други фирми, кои во меѓувреме основаат трети. Дел од овие фирми, како што потврдуваат повеќе извори, никогаш и не работеле, а биле користени за префрлање пари и реализација на сомнителни трансакции, кои ја довеле Експорт-импорт банката на Смиленски до финансиски колапс.
– Имотот го раскрчмуваше и купуваше фирми што никогаш немаше намера да ги разработи. Трагите на малверзациите се кријат, а крајната точка е само еден прашалник – коментираат познавачите на криминалните зафати на австрискиот бизнисмен.
Се разбира, велат тие, тоа никогаш немало да се случи доколку Смиленски за своите деловни потреби не успевал лесно да зема кредити и да добива гаранции од Народната банка на Македонија, додека гувернер на банката бил Љубе Трпески.
Во 2003 година по налог на НБМ, Експорт-импорт банката ги известила сите деловни банки да ги блокираат сметките на 48-те фирми на Смиленски. Вработените во „Голд фарм“, „Индус“, „Алема“, „Евитал маг“, „Медикал“, „Бејби бум“ останале без работа. Во дијагностичкиот центар „Медикал“ немало услови за работа, а вработените во „Индус“ биле хендикепирани лица, кои не примале здравствени картони и плата.
Правните експерти велат дека се мали шансите да се одгатнат сите криминали на австрискиот бизнисмен, а уште помали на сите сегашни и бивши функционери, кои зеле дел од неговиот колач.
Доколку на Смиленски му биде одобрено српското државјанство, постојат два начини за да продолжат судските процеси против него. Првиот е тие да продолжат во негово отсуство (како во случајот со Драган Даравелски) , а вториот да бидат пратени на одлучување во странство. Сепак, барањето за негова екстрадиција се однесува само на меѓународната потерница за злоупотреба од светиниколскиот Основен суд. Тој не може да биде суден или притворен за други предмети ако биде екстрадиран во Македонија.
ШТОСЕСЛУЧИСО ИМПЕРИЈАТА?
Работниците без леб, фирмите во стечај
Каква беше судбината на фирмите вплеткани во криминалната мрежа, која остави на улица повеќе од 6.000 работници ? Акционерите на „Центро“ пред две години упорно се обидуваа да ја објаснат и докажат шемата на Смиленски околу раскрчмувањето на имотот на оваа фирма во 1997 година. Акционерите тогаш тврдеа дека тој преку ноќ незаконски ја купил фирмата. „Ист-вест трејд“, фирма на Смиленски од Виена, ги презела побарувањата на други две негови фирми – „ЕВТ“ и на Експорт-импорт банка за пет милиони евра. Побарувањата биле претворени во траен влог и на таков начин тој станал сопственик на „Центро“. Со финансиски малверзации, тврдеа акционерите, долговите на своите фирми ги пренесувал на сметка на „Центро“ со што ги презадолжувал и го банкротирал претпријатието. Пред да почне, но и за време на стечајната постапка, целиот имот на „Центро“ бил префрлен на други фирми од неговото семејство – „Имобилијаре центар“ и „Имобилијаре маркет“ од Скопје и „Имобилијаре систем“ и „Имобилијаре маркет“ регистрирани во Штип, а со седиште во Свети Николе. Овие четири фирми потоа уделите им ги отстапувале на други негови фирми со седиште во Австрија и Кипар. Тие се јавувале како гаранти кај Експорт-импорт банка за кредит во висина од 11 милиони долари што им го одобрила фирмата „Сито трејдинг“ од Гибралтар. Оваа фирма не го вратила кредитот, а Експорт-импорт ја пополнила финансиската дупка продавајќи го „Центро“.
Фирмата добила кредит од швајцарската банка ЛХБ, вреден 2,5 милиони долари, а за парите гарантирала НБМ и гувернерот Трпески. Гаранцијата наместо на 2,5 била на 5 милиони долари. Парите ги добила Македонска банка, затоа што штипската фирма првенствено оттаму ги барала. Во меѓувреме австриската фирма „Макотрејд“ (фирма на Смиленски) наплатила точно 2,5 милиони долари на фактура за испорачан памук во „Текстил инвест“. До денес никој не докажал каде е памукот. Парите се исплатени на нерезидентната сметка на оваа австриска фирма, која по некоја случајност е во банката на Смиленски. Преостанатите 2 милиони долари од кредитот на ист начин се внесени на сметка на Смиленски само преку друга домашна фирма, овој пат преку „Агропродукт“ од Богданци. Другите 500.000 долари се загубени во лавиринтот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Дрвја и кал во БиХ, местата зафатени од поплавите се непрепознатливи
По поплавите што вчера ја зафатија БиХ, најтешка е состојбата во општина Јабланица, каде што најголем број урнати згради и објекти се под вода, а истото е и во Трусина и Бутуровиќ Поље, јави телевизијата БХТ1.
Новинарка на телевизијата, која известува од терен, изјави дека овие места се непрепознатливи.
-Можеме да видиме само дрвја и вода, кал, се’ лебди на површината на водата, можеме да видиме загрижени жители, изјави таа и додаде дека веќе се започнати хуманитарни акции за помош на загрозените.
Според последните неофицијални податоци само на територијата на Јабланица како исчезнати се водат 48 лица, додека официјалните податоци велат дека по поројните поплави и свлечиштата кај Јабланица, Кониќ, Крешево и Кисељак, потврдена е смртта на 19 лица, а дека по многу други уште се трага.
Населението во погодените подрачја има потреба од итна помош, а најитни се конзервираната храна и вода во шишиња.
Патната комуникација е отежната, а на места и целосно прекината.
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај.
Регион
Страшни детали од поплавите во Босна и Херцеговина, загина трудница, а брачен пар се најдени гушнати
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај. Најмалку 21 лице го загуби животот во поплавите во БиХ, од кои 16 се сметаат за исчезнати.
„Најмалку 16 лица од областа на северна Херцеговина во моментов се водат како исчезнати, откако беше потврдено дека исто толку луѓе загинале само на подрачјето на Јабланица“, изјави премиерот на Федерацијата на БиХ, Нермин Никшиќ.
Затрупани се многу куќи, а утринава пристигна и дополнителна механизација.
Во тек е состанок на кризниот штаб за координација на спасувачките активности, а по него треба да се дознаат подетални информации за состојбата на теренот.
Најтешка е состојбата во Долна Јабланица каде се сомнева дека каменолом ја предизвикал трагедијата во населбата која е целосно затрупана со отпад од гранит.с
Свет
Се повеќе мали деца се дебели, предупредува ФАО
Организацијата за храна и земјоделство на Обединетите нации (ФАО) предупреди дека прекумерната тежина кај деца под пет години, анемијата кај жените на возраст од 15 до 49 години и дебелината кај возрасните се во пораст во голем број земји.
Западен Балкан со 10,3 отсто и Кавказскиот регион со 9,1 отсто имаат највисока стапка на прекумерна тежина кај децата до пет години, додека стапката на дебелина кај возрасните исто така се зголемува.
Вредностите на анемијата кај жените на возраст од 15 до 49 години ја надминуваат глобалната проценка од 29,9 отсто во Киргистан со 35,8 отсто, Таџикистан 35,2 отсто и Азербејџан 35,1 отсто.
За да се справат со овие предизвици, сите актери во Европа и Централна Азија треба да се фокусираат на квалитетот на исхраната, осигурувајќи дека сите граѓани имаат пристап до разновидна и урамнотежена исхрана.
Никој не треба да се остави зад себе. Ова мора да биде поддржано со едукативни и кампањи за подигање на јавната свест кои поттикнуваат поздрав и поодржлив избор на храна, се додава во соопштението.