Уставниот суд ги поништи решенијата за трампа на затворските казни до една година со пари, но ако Владата во следниве два месеца не ја спроведе одлуката, таа веќе не важи и оние што имаа пари да си ја купат слобода

УСТАВНИОТ СУД РЕШИ, А ВЛАДАТА НЕ ЈА ПОНИШТИ ТРАМПАТА ЗА ЗАТВОР

Уставниот суд ги поништи решенијата за трампа на затворските казни до една година со пари, но ако Владата во следниве два месеца не ја спроведе одлуката, таа веќе не важи и оние што имаа пари да си ја купат слобода

Ексдиректорката на Скопски катастар Тања Митровска, осудена за организиран криминал, и уште дваесетина осуденици на затворски казни до една година кои ја искористија можноста да ги откупат казните за да не лежат во затвор, дефинитивно ќе бидат на слобода ако барем новата влада во следниве два месеца не успее да ги поништи решенијата за овие привилегии. Рокот од шест месеци во кој, според Деловникот на Уставниот суд, заинтересирано лице треба да поднесе до апелационите судови барање за поништување на овие решенија веќе изминува. Никој досега не поведе иницијатива за поништување на решенијата, и покрај тоа што Уставниот суд посочи дека членот ги довел граѓаните во нерамноправна положба. Не помогна ни неодамнешното јавно укажување и потсетување од Судот дека Владата во случајов е институцијата чиј член е поништен и оти таа преку свој орган треба да ја спроведе неговата одлука.

Владата, која сега е на заминување, не ја спроведе оваа обврска. Правните експерти велат дека нема да има никакви последици за ваквиот игнорантски однос кон одлуката на Уставниот суд. По истекот од шест месеци, обврската за спроведување на поништувањето згаснува, Уставниот суд нема механизми да мотивира, а овие 20-ина решенија стануваат законски.

Вели Ведат, претседател на Апелациониот суд – Скопје, се надева дека до септември новата влада ќе успее преку Обвинителството да ги поништи решенијата за трампа. Со тоа, вели тој, на овие осуденици би им се вратиле парите назад, по што тие ќе се упатат на отслужување на затворските казни. Според Ведат, камати на парите нема да се плаќаат, зашто никој на овие лица не им наплатил присилно, а и не ги орочиле парите, па да бараат камати.

Судиите од трите апелациони суда велат дека за да не се чека на новата влада, која допрва треба да се конституира, може Врховниот суд да поднесе иницијатива за поништување на спорните решенија.

"Врховниот суд треба да реагира, како што знаеше да реагира кога требаше да го примениме членот за откуп на затворската казна", се пораките од второстепените судови. Повеќето од судиите се уште тврдат дека членот во КЗ за трампата бил вметнат наменски, по претходен политички договор, само Митровска да ја избегне затворската казна.

С. К. Делевска