Обвинение за новата група трговци со луѓе и шверцери на мигранти

Обвинение за новата група трговци со луѓе и шверцери на мигранти

Со предметот, кој во јавноста е познат како „Југ 2" , се опфатени 21 лице

Втората голема група обвинети за шверц на мигранти и за трговија со луѓе, а која се случуваше меѓу декември минатата и крајот на мај годинава, наскоро ќе влезе во судска процедура. Одделението за гонење сторители на кривични дела од областа на организираниот криминал и корупција при Јавното обвинителство веќе изготви обвнителен акт со кој 21 лице се товарат за трговија со луѓе и шверц на мигранти.

Според Обвинителството, во синџирот на трговија со луѓе се инволвирани притворените и обвинетите: Зоран Крстевски(34) и неговиот брат Игорче Крстевски (28), двајцата од Велес, Реџеп Касамовски (34) од велешкото село Бузалково, Ајрула Каја(35) од Дебар, Каме Трајковски (43) од Долно Каласлари, Велешко, велешанецот Влатко Трајковски, сега населен во Долно Каласлари, гевгеличаните Димитар Делиџаков (37), Ристо Танов (43), Миле Ангелов (36), Кирил Брљамов (35) од село Стојаково, Агрон Каја (41) и Албан Дема (31), двајцата од Дебар, Рамадан Касамовски (36) од село Бузалково, а со престој во скопско Долно Нерези, Азиз Кркути (29) од Дебар, Ѓорѓе Танчев (32) од Гевгелија со место на живеење во село Марвинци, Неџат Јакупи (56) од село Чајле, Гостиварско, Кенан Карамети (47) од Дебар, Зоран Танески (43) од Охрид, Фљамур Даути (32) од струшкото село Калишта, Данчо Колевски (33) од Струга, а со место на живеење во охридското село Велгошти, Милутун Марковски од Струга и со место на живеење во селото Нерези.

Повеќе од половината обвинети мерката притвор што им ја изрече истражен судија на Основниот суд Скопје 1 ја издржуваат од 18 мај, а другата половина во истражниот затвор „Скопје" се наоѓаат од средината на јуни годинава, кога и беше затворен кругот.

Според мислењето на Обвинителството, Зоран и Игорче Крстевски, Реџеп Касамовски, Ајрула Каја, Каме Трајковски, Димитар Делиџаков, Ристо Танов, Рамадан Касамовски и Кенан Карамети меѓу декември минатата и 18 мај годинава организирале група која се занимавала со шверцување мигранти. За таа цел тие обезбедувале возила и возачи за непречен транспорт на мигрантите и, според обвинението, за услугите наплатувале меѓу 200 и 800 евра. Организаторите на транспортот на мигранти требало да овозможат непречено движење на потегот Албанија-Македонија-Грција. Од друга страна, пак, обвинетите Влатко Трајковски, Миле Ангелов, Кирил Брљамов, Агрон Каја, Албан Дема, Азиз Кркути, Ѓорѓе Танчев, Неџат Јакупи, Зоран Танески, Фљамур Даути, Данчо Колевски и Милутин Марковски имале обврска со своите возила да ги превезуваат илегалците. Од целата оваа групација исклучок претставува само обвинението за Кенан Карамети.

Обвинителниот акт, кој содржи 13 точки, детаљно ги наведува маршрутите на мигрантите и на нивните превозници, а според диспозитивот сж започнало на 6 декември минатата година, кога биле реализирани четири транспорти. Веќе во јануари годинава, три групи мигранти биле префрлени преку државната граница, а исто толку префрлања биле реализирани и во февруари. Во март биле извршени само два транспорта, а по априлската „пауза" следувале нови три, по што групата била откриена и приведена. Речиси сите транспорти се одвивале според однапред утврдена шема, односно по приемот на „патниците", кој најчесто се случувал на македонско-албанската граница, следувало патување до Скопје, каде што во близината на „Хубо маркет", или до бензинската пумпа на „Макпетрол"на булеварот „Александар Македонски" се вршел претовар. По ова карваните се упатувале на југ, а потоа на мостот шест километри по селото Удово следувало преземање на илегалните мигранти. Дека префрлањето и патувањето не биле толку наивни говори и податокот дека пред возилата во кои се превезувале мигрантите се движело лице кое требало да ја има улогата на „чистач". Оваа улога, според Обвинителството, најчесто им била доверувана на сега обвинетите Ристо Танов и Димитар Делиџанов. Она што на овој случај му дава посебност е фактот дека како жртви на шверцот на мигранти, покрај албански, има и индиски и молдавски државјани.