По првите 438 килограми, вчера биле најдени уште 45 кг кокаин во кантите со боја

По првите 438 килограми, вчера биле најдени уште 45 кг кокаин во кантите со боја

Полицијата два дена ги брои пакетите со кокаин од Венецуела, скриени во 882 канти акрилна боја, што полицијата и мобилната царината ги запленија во камион во близина на граничниот премин Блаце. Успешната меѓународната полициска акција во која завчера беа запленети 483 килограми кокаин, беше повод премиерот Никола Груевски да го посети МВР.

– Полицијата вчера откри дополнителни 45 килограми кокаин од претходно објавените 438 кг. Во дводневното проверување на кантите со поликолор вкупно се пронајдени 483 килограми кокаин чија цена на пазарот би се движена од 46 до 92 милиона евра – изјави Груевски и нагласи дека акцијата на полицијата се одвивала во соработка со странските служби и Интерпол и траела околу еден месец. Тој објасни дека претпоставките за цената се различни бидејќи станува збор за квалитетен кокаин што, доколку би се продал чист, во малопродажба би чинел 46 милиони евра.

Сепак, експертите за наркотици сметаат дека дрогата требало да се измеша со други состојки, со што би се добило двојно поголемо количество за кое на пазарот би се добиле 92 милиона евра.

Според експертите, високиот квалитет и чистота на дрогата укажува дека таа е испратена директно од производителот. Кокаинот бил произведен во Венецуела, а со брод бил донесен до црногорското пристаниште Бар. Оттаму дрогата е натоварена во македонскиот камион и преку Косово и Македонија требало да стигне до Грција. Крајната дестинација биле државите од Европската Унија. Во МВР велат дека испраќачите и примачите на товарот биле фантомски фирми, а полицијата е на добар пат целосно да го расчисти случајот.

По саботната акција, во која полицијата и Царинската управа кај граничниот премин Блаце открија камион со половина тон кокаин, истражен судија вчера му одреди триесетдневен притвор на уапсениот возач, македонски државјанин.

Полицијата има уште неколку осомничени за случајот, меѓу кои еден со македонски и со странски пасош, а еден е државјанин на соседна земја.

Меѓу осомничените има државјани на Венецуела, Србија и на Грција. Дрогата била спакувана во пакети од околу еден килограм и 100 грама, а потоа скриена во 882 кутии акрилна боја.

За заплената, која е најголема досега во Македонија, се заинтересирале многу дипломати и светски агенции.

УНМИК

Знаевме за дрогата, ама немавме опрема да ја идентификуваме

Косовските цариници знаеја, но не го запленија камионот со кокаин затоа што немаа соодветна опрема за да ја идентификуваат дрогата, изјави директорот на мобилните единици на царината на УНМИК, Екрем Хајдари, за подгоричкиот весник „Виести“. Косовските цариници констатирале дека станува збор за многу сомнителна пратка и ги информирале колегите во Македонија.

– Станува збор за меѓународен криминален синџир во кој се замешани моќни криминалци од српското подземје. Претоварањето во барското пристаниште е направено во минатата недела, а новогодишните и божикните празници се користени за транспорт преку Косово и Македонија. Криминалците сметале дека во празничните денови вниманието на цариниците и на полицајците е послабо од вообичаено – наведува весникот.