Дали е на повидок голема афера во Фудбалската федерација на Македонија која сигурно ќе предизвика нови потреси во куќата на фудбaлот.

МИОДРАГ МИЦКОВИЌ

Дали е на повидок голема афера во Фудбалската федерација на Македонија која сигурно ќе предизвика нови потреси во куќата на фудбaлот. Според информациите што се појaвија во еден дневен весник, генералниот секретар на ФФМ, Лазар Митровски, со помош на фалсификувана диплома за завршеното високо образование на Електротехичкиот факултет во Сараево и се здобил со звање дипломиран инженер по електротехника и телекомуникации бил избран на оваа висока функција во македонскиот фудбал.

Авторот на пошироката информација тврди дека на Електротехничкиот факултет на Универзитетот во источно Сараево таква насока, со кој Митревски ја поседува титулата инженер воопшто не постои. Покрај тоа, овој факултет никогаш не доделувал звање дипломиран инженер по електротехника и телекомуникации.

Според истиот извор, дипломата под број 6124 од 16 декември 1986 година никогаш не била издадена на овој факултет.

Дознаваме дека по телефонската проверка од некои извори испратениот допис за фалсификуваната диплома на Лазар Митровски е валидна и дека таков допис е издаден по барање, не се знае чие, бидејќи тоа никаде не се спомнува во објавената информација.

По трагите на оваа информација, која предизвика големо интересирање кај љубителите на фудбалот, се обидовме да стапиме во контакт со генералниот секретар Лазар Митровски и со претседателот на ФФМ, Хари Хаџиристески, но и двајцата моментално во Париз како гости на Француската фудбалска федерација на свеченото отворање на куќата на фудбалот во главниот град на Франција по покана од Мишел Платини, кандидат за претседател на УЕФА. И двајцата беа недостапни на своите мобилни телефони, но на сајтот на ФФМ ја прочитавме изјавата на Лазар Митровски, кој вели:

„Моментално сум во Париз со претседателот на ФФМ, Хари Хаџиристески. Не сум запознат во детали со објавената информација во дневниот спортски весник „Македонски спорт“, но можам да изјавам дека ова е нова фабрикувана афера од поединци кои не избираат средства да го урнат угледот на ФФМ и мојот личен. Дали мојата диплома е фалсификат, за тоа треба да утврдат надлежните органи кои лесно можат да ја проверат вистината“.

Инаку, да потсетиме со оваа диплома што ја поседува, Лазар Митровски, пред да стане генерален секретар на ФФМ, повеќе од 10 години беше професор во Средното техничко училиште во Скопје.

Со оглед дека претседателот Хари Хаџиристески е отсутен од Македонија, го побаравме потпретседателот Реџеп Беџети.

Дали дипломата на Лазар Митровски е фалсификат или не, тоа треба да го истражат надлежните органи. Ние во Управниот одбор на ФФМ не можеме да го тврдиме тоа или не. Кога Митровски и Хаџиристески ќе се вратат од Париз, сигурно ќе биде свикан Управниот одбор за да се разгледа целата оваа ситуација.

Дали ФФМ ќе побара од органите на МВР да се вклучат во целиот овој случај?

Обвинувањата се мошне тешки, за фалсификат се оди в затвор, мораме да бидеме внимателни, детаљно да се испита целата оваа работа. Во прашање е не само угледот на Лазар Митровски и неговото семејство, туку и угледот на целата Фудбалска федерација.

Беше интересно да се слушне и мислењето на тогашниот претседател на Кадровската комисија на ФФМ, членот на Управниот одбор, Ставре Николовски, кој ги разгледуваше поднесените документи на Митровски како еден од кандидатите за функцијата генерален секретар. Николовски повеќе не е член на Управниот одбор на ФФМ во новиот состав:

– Колку што се сеќавам за местото генерален секретар конкурираа девет кандидати. Јас тогаш, па ниту денес не можам да тврдам дали дипломата што ја поднесе Лазар Митровски од Електротехничкиот факултет во Сараево била фалсификат или не. Ниту сум јас, па и другите членови на Комисијата се стручни да го утврдиме тоа. Му предложив на Управниот одбор сите девет кандидати да одат на гласање. Тогаш за генерален секретар беше избран Лазар Митровски.

Колку што се сеќаваме, Вие единствено гласавте против неговиот избор?

– Не поради дипломата, таа за мене не беше спорна, туку поради еден услов кој се бараше во конкурсот, а кој Митревски не го исполнуваше. Се бараше кандидатот да има најмалку пет години искуство на некоја раководна функција. Митровски достави потврда дека повеќе од пет години бил класен раководител во училиштето, што јас не го признавам тоа. Затоа бев против неговиот избор.