Иако акционерско друштво „Тутунски комбинат Куманово“ моментно е под контрола на Бајруш Сејдии и неговото семејство, комбинатот практично е доведен во ќор-сокак уште по изборите 2002.

СЛУЧАЈ „ТУТУНСКИ КОМБИНАТ КУМАНОВО“ (2)

Зоран Божиновски

Иако акционерско друштво „Тутунски комбинат Куманово“ моментно е под контрола на Бајруш Сејдии и неговото семејство, комбинатот практично е доведен во ќор-сокак уште по изборите 2002. Свесен дека ќе ги загуби позициите во тутунскиот бизнис, Стевчо Коцевски како генерален директор на Македонија табак АД, но и како сопственик на контролниот пакет акции во ТКК, преку делчевската фирма Бугармакс ДООЕЛ – зема кредит. Неколку дена пред изборите во септември 2002 година зема девизен кредит во Тутунска банка, во износ од 750 илјади евра, а како хипотекарен залог го става контролниот пакет акции во ТКК. Вкупно заложува 282.965 обични акции. ВМРО-ДПМНЕ ги губи изборите, а Коцевски останува без неопходната политичка поддршка. Позициите ги губи и неговата родена сестра Весна Таковска, која дотогаш го контролира „Табак осигурување“. Синдикалците на ТКК и Миодраг Ѓорѓиевски како претседател на синдикатот, ги предводат вработените во нови штрајкови против Коцевски и неговите соработници.

Една година подоцна, по земањето на кредитот во Тутунска банка, поради невраќање на главницата, но и нередовно плаќање на ратите од него, Стевчо Коцевски штотуку ослободен од неколку месечниот притвор, во судска постапка го губи контролниот пакет акции во ТКК. За овој предмет до судот на 19 февруари 2003 г. стигнува и допис од Републичкиот судски совет потпишан од Ленче Софрониевска како претседател на овој орган: „Ве замолуваме да се забрза постапката за стекнување сопственост над хипотеката, за да можат тие акции веднаш потоа да се продадат на вработените во ТК Куманово. Со тоа целиот спор ќе заврши во корист на 410 вработени, кои сега се наоѓаат во тешка материјална состојба поради наведениот спор“.

Основниот суд Скопје 1 ја реализира хипотеката во корист на банката и со решение И. Бр 3945/03 од 19 ноември 2003 година пакетот акции станува сопственост на Тутунска банка. Почнува да се бара странски партнер што би ги задоволил барањата на двете страни – и на банката и на вработените. Кон крајот на 2003 година во игра влегуваат бившиот генерален директор на ТКК, Тодор Чушкаровски, и неговите блиски пријатели и соработници од тутунскиот бизнис. Нивниот пријател од зделките со кипарската фирма „Алдемур трејдинг“, Јанис Стамудис, станува главен посредник за носење на американскиот инвеститор со грчко потекло, Василис Морфопулос и неговата компанија „БИД холдингс“ од САД, со филијала и на Кипар. Вработените, на чело со синдикалците Миодраг Ѓорѓиевски и Часлав Стојановиќ го прифаќаат Морфопулос за инвеститор.

Го прифаќа и менаџментот на Тутунска банка. Берзанската трансакција се изведува преку брокерската куќа Тутунска брокер. На 10 декември 2004 година Морфопилос ги купува акциите на берза за 64 милиони денари или за сума од приближно еден милион евра. Акционерите и вработените здивнуваат и се надеваат дека конечно некој асален дошол во комбинатот и дека ќе тргнат работите напред. Но, Морфопулос по купувањето на контролниот пакет акции одбива да се договори со Стамудис, Чушкаровски, Нелковски и Папеш. Не им ги дава поволностите и привилегиите што ги посакуваат и на кои навикнале претходните неколку децении. Чушкаровски пак бара помош од синдикатот, но Миодраг Ѓорѓиевски и неговите колеги првпат одбиваат слепо да го слушаат својот директор.