Лазар Митровски не е повеќе генерален секретар на Фудбалската федерација на Македонија, откако тој се повлече од функцијата, зашто, според Статутот, не може да биде на тоа работно место со диплома од шести степен – за функцијата треба диплома од седми степен.

ЛАЗАР МИТРОВСКИ, ПОРАНЕШЕН ГЕНЕРАЛЕН СЕКРЕТАР НА ФФМ

Лазар Митровски не е повеќе генерален секретар на Фудбалската федерација на Македонија, откако тој се повлече од функцијата, зашто, според Статутот, не може да биде на тоа работно место со диплома од шести степен – за функцијата треба диплома од седми степен. Во изминатиот месец против него беше поднесена кривична пријава за фалсификување диплома и уништување докази, а во јавноста излегоа еден куп афери во врска со ФФМ.

Како се случи да бидете избран на функцијата иако не ги исполнувавте условите за тоа? Немате соодветно образование, а речиси четири години сте генерален секретар. Затоа ли поднесовте оставка?

Митровски: За да се врши таа функција, треба високо образование. Јас конкурирав со диплома од шести степен, каде што пишува електроинженер, што не значи дека сум дипломирал. Тогаш, луѓето ме избраа мене едногласно, по предлог на комисија, која ја предводеше Ставре Николовски, кој сега е во хајката против мене. Тој мислел дека сум дипломиран електроинженер и затоа ме предложиле. Сега, тој услов не е сменет на собрание, а има постапка да се смени. Јас немам седми степен, некој може да се пожали на мојот потпис на некој документ и да имаме проблем. Затоа се повлеков. Многу членови од УО не сакаа јас да се повлечам, но инсистирав на тоа, зашто не сакам да сум товар на Федерацијата. Во март ќе има редовно собрание, ако тогаш мине тој предлог, ќе се распише конкурс, и тогаш јас пак ќе можам да конкурирам, па, ако ме изберат, да бидам генерален секретар на ФФМ. Ние од ФИФА добивме дозвола за сменување на тој член од Статутот и добивме зелено светло за тоа.

Во јавноста постојат многу шпекулации за тоа дека ова е политичка хајка против вас од новата владејачка гарнитура. Дали мислите дека има вистина во ова и кои луѓе стојат зад обидот за сменување на раководството на ФФМ?

Митровски: Директна хајка од Владата против нас нема. Нема тензија од таа страна. Но, главниот човек на сето ова е Орце Камчев, кој е помогнат од негови блиски структури од власта. Веројатно Камчев го злоупотребува тоа што бил финансиер на партијата што е на власт. Затоа секој ден имаме инспекции од МВР, се бара влакно во јајцето. Сега, откако јас се тргнав, на удар ќе биде претседателот Харалампие Хаџи- Ристески. Се прават невидени притисоци, ама мислам дека нема да успеат.

Зошто е ФФМ толку атрактивна организација? Колкав буџет има Федерацијата, колку пари вртите годишно?

Митровски: ФФМ е атрактивна зашто годишниот буџет е околу два милиони евра, иако се вртат повеќе пари. Но, и со тој буџет, тешко се врзува крај со крај, зашто само патот за Англија и за Андора, како и премиите за фудбалерите не чинеа 300.000 евра. Ние немаме спонзори, парите се донации од ФИФА и од УЕФА. Државата не ни дала денар, а ние лани на име придонеси за плати и персонален данок на државата и плативме 230.000 евра. Тие што мислат дека кога ќе дојдат тука ќе можат да прават што сакаат со парите – гадно се лажат. Немаме службен автомобил, се ценкаме со хотелите за поевтино сместување на играчите, организиравме 13 турнири на УЕФА, за кои таа дала 1.300.000 швајцарски франци, па и од тоа штедевме за да имаме обезбеден буџет за плати. А сето ова кога дојдовме на власт беше обратно. Бевме во минус еден милион евра, сите сметки ни беа блокирани. Имавме среќа што двапати ни се падна Англија, па се вративме во живот.

Дали можеби обидот на Камчев за влез во ФФМ има и деловни интереси?

Митровски: Можеби. ФФМ е интересна за парите. Но, нема за фрлање. Сепак, познавајќи ги тие што сакаат да дојдат, сигурен сум дека нема да работат во вакви услови. Тие ќе сакаат луксузни простории, зашто во сегашниве услови не може да се пушат пури. Се лажат ако мислат дека тука ќе најдат пари и ќе ги трошат тие што ФИФА и УЕФА ги даваат за инфраструктура. Ние добивме 2,5 милиони франци, можевме да направиме наша луксузна зграда, со канцеларии како во Владата, но решивме да изградиме пет стадиони на екипи што најчесто играат во еврокуповите. Во 2008 година повторно ќе има донација од 3,5 милиони франци, но тоа се наменски пари. Не можат да се трошат за лични потреби на федерацијата.

Како можеше да се случи екипи што според Државниот инспекторат за труд со години не плаќале придонеси за своите фудбалери да играат во Европа, и тоа со ваша дозвола, иако тоа е спротивно од правилата на УЕФА за издавање лиценци за настап?

Митровски: Сите велат дека тоа било фалсификат. Но, имаше контрола од УЕФА, таму увидоа некои пропусти, но и тие знаат дека Германија и Шпанија не е исто како Македонија и Белорусија. Клубовите до нас доставиле чисти документи, дека фудбалерите се пријавувани. Исто така тие потпишаа изјава за веродостојност. Ако лажеле, не сме ние што тоа треба да го истражуваат. Има државава институции кои бркаат такви работи. Инаку, секој клуб е должен да има пријавено намалку шест професионалци. Клубовите имаат пријавено многу повеќе кај нас. А дали плаќаат придонес, тоа не е наша работа. Ние немаме право да одиме во ПИОМ да проверуваме. Сета тоа во јавноста излезе нарачано. Сценарио од некои медиуми, вклучително и таму каде што излезе извештајот – агенцијата МИА. Оттогаш почна хајката.

Р.В.