Конфликт на интереси, неспојливост на позиции, една личност со повеќе функции, станаа редовен багаж на Антикорупциската комисија. Експертите имаат повеќе дилеми за ангажманите на дел од новиот состав на борците против корупцијата и од системска и од етичка природа.

КАТИЦА ЧАНГОВА

Конфликт на интереси, неспојливост на позиции, една личност со повеќе функции, станаа редовен багаж на Антикорупциската комисија. Експертите имаат повеќе дилеми за ангажманите на дел од новиот состав на борците против корупцијата и од системска и од етичка природа.

За најспорен од членовите се смета Цветко Мојсовски, кој волонтира во Антикорупциската комисија, а основна професија од која се’ уште не се откажал му е државен службеник во Секторот за приговори при Управата за јавни приходи. Мирјана Димовска не само што е главен уредник на МТВ туку е ангажирана на уште две струки во јавен и невладин сектор. Иљми Селами, пак, е државен службеник во Секретаријатот на Антикорупциската комисија, но и нејзин член.

„Државен службеник вработен во Управата за јавни приходи не смее да врши друга јавна функција. Тоа е законски забрането. Волонтирањето во Антикорупциската комисија е јавна функција. Значи, не оди едното со другото. И тука најмалку важен дел е земањето плати од две места. Во случајот со Цветко Мојсовски станува збор за класичен конфликт на интереси“, оценува професорката на Правниот факултет, Ана Павловска-Данева. Според неа, на Мојсовски му преостанува или да се откаже од членство во Антикорупциската комисија или да го стави во мирување местото на државен службеник во УЈП.

Павловска-Данева се чуди како овој антикорупционер ќе ги штити граѓаните од корупција, односно чии интереси ќе застапува, на пример, кога во Комисијата каде што волонтира ќе стане збор за корупција во Управата за јавни приходи.

За случајот на новинарката Мирјана Димовска, која е нов претседател на Антикорупциската комисија, експертите тврдат дека постои неспојливост на функции. За Димовска се вели дека е наследник на Тасева, со таа разлика што ја надминала за една работно место повеќе. Димовска врши уште три функции во јавниот и во невладиниот сектор: актуелен главен и одговорен уредник на Македонската телевизија, претседател на Здружението на жени на Македонија и медијатор. Неприродно е иста личност да биде ангажирана од државниот и од невладиниот сектор, како ќе ги брани интересите на две по суштина различни институции. Експертите признаваат дека законска пречка не постои, дека нема конфликт на интереси, но станува збор за етика и за морал.

Неспорна е акумулацијата на моќ во една личност која ќе биде буквално растргната на четири страни. Но, се поставува и прашањето во чие име и со кој став ќе настапува Димовска кога ќе работи на корупциска материја, во дилема се експертите.

Што се однесува до Иљми Селами, тој е државен службеник, раководител на Секторот за спречување на корупцијата во Анткорупциската комисија од 2003 година, а избран член на ова тело од 29 јануари 2007. Невозможно е да биде на двете места и да зема две плати. Моментално се бара решение за Селами, неговата основна професија да биде во некоја друга државна институција.

Во Законот за спречување корупција е предвидено државен функционер да не може да врши друга функција, должност или дејност што е спротивна на неговата функција.

Собранието вчера му даде зелено светло на предлогот за донесување закон за спречување судир на интереси, според кој надлежен орган за оваа проблематика во иднина би требало да биде Државната комисија за спречување на корупцијата. Законот, чија финална верзија допрва ќе се подготви, ја утврдува постапката во случаи кај кои ќе се утврди постоење судир на интереси, начинот на однесување на службените лица при вршење на службената должност и други прашања за спречување на оваа општествена негативна и штетна појава заради заштита на јавниот интерес. (К.Ч.)