Шест новинари и еден снимател, за кои Министерството за одбрана потрошило над 700 илјади денари, биле однесени во САД за да известуваат од молитвениот појадок и од средбите на министерот Еленовски со заменикот на советникот на Буш Џ. Д. Крауч и со

ЛИЧНА МЕДИУМСКА ПРОМОЦИЈА СО ДРЖАВНИ ПАРИ

Шест новинари и еден снимател, за кои Министерството за одбрана потрошило над 700 илјади денари, биле однесени во САД за да известуваат од молитвениот појадок и од средбите на министерот Еленовски со заменикот на советникот на Буш Џ. Д. Крауч и со

Министерот за одбрана Лазар Еленовски потрошил над 700.000 денари државни пари за да им го плати патувањето и сместувањето во хотел на шест новинари и еден снимател за да известуваат за неговата 5-дневна посета на САД минатиот месец.

Согласно Законот за пристап до информации од јавен карактер, Редакција "Вест" побара од Министерството за одбрана да даде информации за тоа колку новинари одведе Еленовски во САД, колку пари потроши за тоа и од кои активности на министерот известуваа новинарите. Според одговорот од Министерството за одбрана, што го добивме по 20 дена чекање, во делегацијата биле и шест новинари и еден снимател.

"Картите за патувањето на делегацијата, во која беа и новинарите, беа набавени преку агенцијата ‘Компас’ и еден авиобилет чинеше 784 евра. Сместувањето во Њујорк првиот ден чинеше 212 американски долари за вечер. Останатите четири дена министерот, заедно со протоколот и обезбедувањето беа сместени во хотелот ‘Хилтон’ во Вашингтон каде што сместувањето чинеше 211,37 долари. Другите членови на делегацијата беа сместени во хотелот ‘Черчил’ во Вашингтон каде што сместувањето чинеше 234 долари", стои во одговорот од Министерството за одбрана.

Математиката покажува дека Министерството за новинарската придружба потрошило околу 707.000 денари државни пари. За седум авиобилети по 784 евра се потрошени 5.488 евра. За седумчлената новинарска екипа биле платени 35 ноќевања во хотел, за што Министерството потрошило 8.036 американски долари.

Министерот за одбрана во САД беше на претходно закажана официјална посета што, како што велат од кабинетот на министерот, ја усогласиле со молитвениот појадок во Вашингтон на кој бил поканет Еленовски.

"Нема потреба да се нагласува дека тоа беше посета на највлијателната земја во светот. Таму за првпат се оствари средба на македонски политичар на иста маса со македонското и албанското лоби. Имаше средба со нашите иселеници за зајакнување на лобирањето.

 Најзначајни беа средбите со секретарот за одбрана на САД Гејтс, неговиот заменик Енгланд и со Кондолиза Рајс. Имаше средби со конгресмени и сенатори, потоа со заменик-советникот на претседателот Буш Џ. Д. Крауч, со специјалниот помошник на Буш Бил Лути, помошник-државниот секретар за Европа и Евроазија Даниел Форд и со помошник-секретарот Стивен Мул", велат од Министерството.

Еленовски бил и во Центарот за стратегиски и меѓународни студии, една од највлијателните тинк-тонк организации во САД, се видел и со заменик-секретарот за одбрана Гордон Ингланд и со албанскиот министер за одбрана Фатмир Медиу. Се сретнал и со еврејското лоби.

Во делегацијата на министерот биле три члена на неговата делегација од Министерството. Во делегацијата биле и неговиот протокол и обезбедувањето, чиј број од Министерството не го наведуваат во одговорот на нашето барање.

За министерската делегација, без новинарите, биле потрошени над 387 илјади денари. Првата вечер во Њујорк за хотел платиле по 212 долари по човек. Останатите четири вечери биле сместени во хотелот "Хилтон" во Вашингтон каде што плаќале по 211,37 долари од вечер по човек и плус по 784 евра за авиобилет.

"Останатите трошоци беа за најмување комбе за пат до Норфолк во Вирџинија, за што, и покрај долгиот пат, не користевме авион", велат од Министерството. Од таму додаваат дека новинарската екипа известувала не само за Еленовски туку и за посетата на САД на министерот за здравство Имер Селмани, Вилма Трајковска, пратеникот Влатко Ѓорчев и шефот на премиерскиот кабинет Мартин Протоѓер.