Свет
„Сухоите“ веќе продадени, а продажбата воена тајна?!
Владата
ги продала четирите руски „сухои“, борбените летала што ги купи од Украина за
време конфликтот во 2001 година, дознаваме од извори во Министерството за
одбрана.
КОЈ И ПО КОЈА ЦЕНА ОТУЃИ ДЕЛ ОД
МАКЕДОНСКАТА АВИЈАЦИЈА?
Владата
ги продала четирите руски „сухои“, борбените летала што ги купи од Украина за
време конфликтот во 2001 година, дознаваме од извори во Министерството за
одбрана.
Продажбата била договорена со една поранешна советска република, но
Министерството за одбрана одбива да соопшти какви било детали за зделката, а
уште помалку пак некој сака да одговори на прашањето по која цена е тоа
сторено. Леталата своевремено беа купени за 6,8 милиони долари, односно по 1,7
милиони долари за еден авион.
Според извори од Министерството, „сухоите“ се уште се во земјава бидејќи во
моментов се правеле договори за избор на фирма што би ги транспортирала
авионите. Во Министерството за одбрана вчера ниту ги демантираа ниту ги
потврдија информациите.
– Немаме коментар – изјавија од кабинетот на министерот Лазе Еленовски.
Во недостиг на официјални информации, уште се шпекулира и тоа дека можен
купувач на авионите била и државата Јемен.
Поранешниот премиер и министер на МО , Владо Бучковски, пред неколку месеци
изјави дека „воениот музеј би било одлично место за руските авиони“. Бучковски
беше министерот во МО во чие време беа купени руските воени летала. Лазе
Еленовски, актуелниот министер за одбрана, по стапувањето на функцијата изјави
дека авионите и борбените хеликоптери набавени за време кризата треба да бидат
продадени.
Владата кон крајот на 2004 година одлучи дека „сухоите“ треба да бидат
продадени бидејќи со новиот стратегиски одбранбен преглед и со новата формација
на вооружените сили, за нив не било предвидено место во военото
воздухопловство. МО тогаш оцени дека нивното одржување било прескапо за воениот
буџет, а оперативните способности можеле да се надоместат со хеликоптерските
единици на АРМ.
Следуваа остри реакции од експертите за воено воздухопловство кои тврдеа дека со
мали корекции „сухоите“ многу лесно би се адаптирале според НАТО-стандардите.
Станува збор за „сухои“ од типот „Су25“ што се опремени со тешко оружје. Според
регистарот на НАТО, овој авион е заведен под името „жабја нога“, а според
борбените карактеристики бил сличен со американскиот авион А-10 „тандербол“,
кој беше користен во НАТО нападите против југословенската војска на Косово.
Освен за воздушни битки, „Су25“ авионите имале одлични перформанси за
бомбардирање на воени цели од мали височини.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Лидерот на Хамас пристигна во Истанбул, ќе се сретне со Ердоган
Лидерот на Хамас, Исмаил Ханија денеска е во Истанбул на средба со турскиот претседател Реџеп Тајип Ердоган, кој го поддржува палестинското движење.
Ердоган синоќа ја потврди посетата, нивна прва средба лице в лице од јули 2023 година, но беше многу дискретен за нејзината цел. „Да ја зачуваме агендата за нас и господинот Ханија“, им рече тој на новинарите.
Ќе се разговара за војната во Појасот Газа, соопшти Хамас.
Ханија вчера вечерта пристигна во Истанбул на чело на делегацијата на неговото движење.
Тој град е едно од неговите места на живеење од 2011 година, но од почетокот на војната во Појасот Газа во октомври 2023 година, тој бил таму само еднаш официјално, во јануари. Потоа се сретна со турскиот министер за надворешни работи Хакан Фидан, со кого во средата во Доха имаше долг разговор.
Фидан денеска ќе се сретне со египетскиот министер за надворешни работи Самех Шукри.
Турција, која сака да биде лидер во поддршката на палестинското прашање, дава цврста и постојана поддршка на претставниците на Хамас, но остана на страна во посредувањето меѓу Израел и палестинското движење.
Посетата на Ханија на Турција доаѓа во време кога Катар, кој игра клучна улога во разговорите меѓу Израел и Хамас, сака да ја „преоцени“ својата улога во застојот на разговорите за прекин на огнот и ослободувањето на израелските заложници.
Свет
Бројот на палестинските жртви во Појасот Газа надмина 34.000
Најмалку 34.049 Палестинци се убиени во израелската воена офанзива во Појасот Газа од 7 октомври, соопшти Министерството за здравство на палестинската енклава.
Во соопштението се додава дека во овој период биле ранети 76.901 лице.
Во текот на претходните 24 часа загинаа 37 Палестинци, а 68 беа повредени, се наведува во објавата.
Регион
(Видео) Силно невреме со поплави во Грција, Волос без струја
Силно невреме ја зафати Грција, поточно Лариса, каде обилните дождови доведоа до излевање на канализацијата, која ги поплави улиците, а во Волос е забележан и прекин на струја.
Врз основа на податоците од метеоролошката станица на Националната опсерваторија во Атина, измерени се просечни 100 милиметри дожд или максимални 312 милиметри на час, поради што полицијата мораше да го прекине сообраќајот бидејќи улиците беа поплавени.
Во градот Волос во текот на ноќта имало проблеми со струјата, но како што пренесуваат грчките медиуми, се е брзо ставено под контрола.
Министерот за цивилна заштита и климатска криза Василис Кикилијас од вчера е во Тесалија за внимателно да го следи развојот на невремето.
– Имаше оправдана загриженост на граѓаните овде во Тесалија бидејќи сеќавањата за катастрофата се свежи, затоа бевме сите овде, координирани и организирани. Драго ми е затоа што досега овој напор се исплатеше. Само со заедничка и координирана работа можеме да добиеме многу добри резултати – најави тој.
Силен дожд и невреме го зафати јужниот дел на Пелион, а како што јавуваат медиумите паднал и град. Овој регион во септември минатата година беше соочен со разорни поплави.
Ненадејна промена на времето се случи и на големите височини во централна и северна Грција, каде падна снег.
„Снежно невреме е забележано во ски-центарот на Василица“, се наведува.
Во меѓувреме, населението е најмногу загрижено за земјиштето околу езерото Карла на границата на Магнезија и Лариса, кои беа поплавени во септември минатата година. Полињата, па дури и воените инсталации во Стефановики се под тони вода.