Свет
Инспекторки се правеле британски туристки
Инспекторите на Управата за јавни приходи (УЈП), викендов, во Прилеп,
Битола, Охрид, Ресен и Струга затвориле 34 угостителски објекти поради неиздавање
фискални сметки и нерегистриран готовински промет.
ФИСКАЛНА РАЦИЈА
Инспекторите на Управата за јавни приходи (УЈП), викендов, во Прилеп,
Битола, Охрид, Ресен и Струга затвориле 34 угостителски објекти поради неиздавање
фискални сметки и нерегистриран готовински промет. Во акцијата учествувале
млади инспектори од Скопје, Битола и Прилеп, кои во кафулињата и ноќните
клубови воопшто не се разликувале од останатите гости. Во охридските кафулиња
тим од инспекторки се преправале дека се туристи од Велика Британија и
зборувале на англиски јазик. Се забавувале, играле и пиеле како и сите други
гости, додека ги набљудувале келнерите дали на гостите редовно им даваат
фискални сметки.
– Воопшто не се разликуваа од останатите гости. Влегоа во локалот, си седнаа на
една маса и нарачаа пијачки. Се забавуваа, дури и играа. Воопшто не личеа на
инспектори, – раскажуваа вчера стружани кои биле очевидци на контролата што се
случила во саботата навечер од 10.30 до три часот наутро.
Во центарот на Струга даночниците исконтролирале 10 локали, а затвориле пет.
Стружани раскажуваа дека на инспекторите повеќе работа им се отворила во Охрид,
каде од 15 исконтролирани локали, решение за 30 – дневна забрана за работење
добиле 9 објекти. Во едно познато кафуле, газдата се обидел на инспекторите
кафето да им го наплати по 90 денари зашто мислел дека се странци, бидејќи
зборувале само на англиски јазик.
Инспекторите се легитимирале дури откако ќе побарале сметка.
Акцијата на даночниците почнала доцна вечерта во петокот во Прилеп, при што
исконтролирале 20 локали, а затвориле 10. Еден од затворените локали, како што
дознавме вчера, е во сопственост на инспекторка на УЈП – Прилеп. Според
инспекторите, најмногу отпор имале токму во овие прилепски локали и во Струга,
но акцијата минала без полициска асистенција.
Деветте тимови на УЈП во саботата провериле 39 локали во Битола и затвориле
осум, а во Ресен од седум локали затворени се два.
Пицериите и сендвичарниците кои добиле решенија за затворање, имаат три дена од
локалите да ја изнесат лесно расипливата стока, а останатите локали се веднаш
пломбирани, информираат од УЈП. Покрај забраната за работа, прекршителите ќе
платат и глоба во висина од 1000 евра за правното лице и 500 евра за управителот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Данка денес ќе правеше две години: тажната судбина на девојчето за кое плачеше цел регион
Малата Данка Илиќ, денеска, 6 мај, ќе наполнеше две години.
Пред точно 40 дена исчезна Данка.
Тогаш за прв пат се активираше системот „Најди ме“ и започна потрагата. Покрај полицијата се вклучија и луѓе, па веќе првата вечер по девојчето трагаа повеќе од 100 луѓе. По неа трагаа жителите на Бањско поле, соседи, пријатели, противпожарна единица, како и припадници на Планинарската спасувачка служба и полицијата. Кучиња трагачи беа на пат, беспилотни летала летаа над теренот, вклучени беа хеликоптери, а теренот беше дури и прегледан со термални камери.
Мештаните тој ден рекоа дека околу куќата на Илиќ имало неколку дупки длабоки меѓу еден и два метри и дека се наполниле со подземна вода. Сите беа загрижени дека девојчето залутало и паднало со едно од нив.
Единиците на полицијата во раните утрински часови го пребараа теренот, а потрагата се уште беше отежната поради силниот дожд.
Неколку дена подоцна беше откриено дека Данка Илиќ е убиена. Осомничени за делото се Срѓан Јанковиќ (50) од село Лука и Дејан Драгијевиќ (50) од Злот, работници на Бор „Водовод“ кои се уште не ја откриваат локацијата на која го пренеле телото на девојчето од дивината. Во притвор е и таткото на Драгијевиќ, Радослав (73), осомничен дека му помагал на синот да го премести телото на девојчето. Под истрага бил и најмладиот Драгијевиќ – Далибор (40). Но, тој почина на 7 април во притвор на полицијата на Бор.
Свет
Путин издаде наредба: Вооружените сили на Русија ќе вежбаат употреба на нуклеарно оружје
Владимир Путин му наредил на Генералштабот да се подготви за вежби за употреба на нестратешко нуклеарно оружје, соопшти Министерството за одбрана на Русија.
„Со цел да се зголеми подготвеноста на нестратешките нуклеарни сили за извршување на борбени задачи, Генералштабот започна со подготовки за одржување вежби со ракетните формации на Јужниот воен округ“, се наведува во соопштението.
Како што се посочува, маневрите ќе се одржат во блиска иднина и ќе ги опфатат и авијацијата и морнарицата.
„Целта на вежбата е да се одржи подготвеноста на персоналот и опремата на единиците за борбена употреба на нестратегиско нуклеарно оружје за одговор и обезбедување на територијалниот интегритет и суверенитет на државата“, наведуваат од Министерството.
Тие додаваат и дека тоа е „одговор на провокативните изјави и заканите на одредени западни функционери“ против Русија.
Свет
Израел почна да ги евакуира палестинските цивили од Рафа
Израелските вооружени сили почнаа да ги евакуираат палестинските цивили од Рафа пред заканувачкиот напад врз тој град на југот на Газа, објави израелското воено радио.
Според извештајот, евакуациите сега се концентрирани во неколку периферни квартови на Рафа, од кои се вели дека евакуираните лица се насочуваат кон градовите со шатори во блиските Кан Јунис и Ал Муваси.
Меѓутоа, во она што се чини дека е почеток на евакуација на цивили пред копнен напад, израелската армија ги повика Палестинците во источните делови на Рафах да се преселат во блиската „хуманитарна област“.
По седуммесечната офанзива против Хамас, Израел соопшти дека во Рафа се засолниле илјадници борци од палестинската исламистичка група и дека победата е невозможна без заземање на градот.
Со оглед на тоа што повеќе од еден милион раселени Палестинци се засолнети во Рафа, изгледите за операција со многу жртви ги загрижуваат западните сили и соседниот Египет.