Во Министерството за финансии тврдат

дека овие организации работат нелегално, но досега не ги санкционирале

СОМНИТЕЛНИ ФИНАНСИСКИ ИНСТИТУЦИИ НУДАТ

БРЗА ЗАРАБОТКА

Во Министерството за финансии тврдат

дека овие организации работат нелегално, но досега не ги санкционирале

Странски финансиски институции нелегално собираат пари од граѓаните во

земјава и нудат брза заработувачка. Пензија од 5.876 евра за вложени 60 евра

месечно во период од 40 години, заработка на 46.000 евра за 10 години со влог

од 10.000 евра и со месечна уплата на 75 евра, вечна месечна рента од 200 евра

за еднократен влог од 20.000 евра. Ова се само дел од примамливите понуди на

една австриска фирма, која во последно време е многу популарна со нудење вакви

услуги.

Во Министерството за финансии велат дека имаат сознанија за такви организации,

но тврдат дека тие работат нелегално. Досега не нашле начин да ги

санкционираат.

Во Народната банка сметаат дека според понудата, австриската организација

прилега на класичен инвестициски фонд. Но, во земјава не е регистриран ниту

еден таков фонд така што организацијата нема право да прибира пари од

граѓаните. Во НБМ посочуваат дека за нејзиното работење се надлежни

Министерството за финансии и Комисијата за хартии од вредност.

Австриската финансиска институција, меѓу граѓаните популарна и како пирамидална

штедилница, прибира клиенти преку електронски пораки и лични контакти.

Нејзините претставници на потенцијалните клиенти им нудат повеќе финансиски

услуги. Се нуди опција за месечно вложување на минимум 75 евра и еднократна

уплата на 900 евра за консултантски трошоци за да се оствари заработка со

камата од 12 отсто годишно. За купување стан фирмата овозможува месечно

вложување од 224 евра, кои за 10 години ќе станат 50.000 евра. На

потенцијалните клиенти им се кажува дека зад фондот стои престижна француска

банка.

Според нашите информации, во кругот на луѓе што вложиле пари има политичари,

лекари, бизнисмени, стечајци, пензионери.

– Имав собрано околу 2.000 евра, кои ги планирав за образование за двете деца.

Еден мој пријател пред пет месеци дојде со печатен материјал во кој пишуваше

дека ако ги вложам парите и секој месец уплаќам по 100 евра, за 10 години ќе

добијам 30.000 евра. Ја прифатив понудата – вели нашиот соговорник.

Од истиот пријател дознал дека ако зачлени уште пет луѓе, парите што ги вложил

ќе ги поврати веднаш. Но, тој од минатиот петок повеќе не може да ги најде

луѓето со кои разговарал и разбрал дека клубот е затворен за нови членови.

– Се’ беше добро до петокот, од кога немам информации за вложените пари. Мојата

сметка е замрзната – тврди тој.

Во законитоста на постоењето на австрискиот фонд не се посомневал бидејќи му

биле презентирани документи, со кои се гарантира дека оваа австриска

институција законски постои и има линк кон Министерството за финансии.

– Моите пари се ништо во однос на парите што ги вложија моите пријатели и

роднини што ги зачленив. Некои од нив имаат вложено и по 20.000 евра – вели

скопјанецот.

Случајот го разгледуваат и во Комисијата за хартии од вредност. Оттаму најавија

одговор за денеска.

(В.А.-И.П.)