Петревски ќе се врати наскоро и

непотребно се создава слика дека тој е бегалец, вели адвокатот Драган

Малиновски

НОВ СКАНДАЛ ВО ЗДРАВСТВОТО

Петревски ќе се врати наскоро и

непотребно се создава слика дека тој е бегалец, вели адвокатот Драган

Малиновски

Кардиологот Борче Петревски е осомничен дека ја злоупотребил службата и ја

оштетил Клиниката за кардиологија за 1,95 милион денари, во времето додека бил

директор, од 2004 до 2006 година. Истрагата утврдила дека парите од пациентите,

наместо во касата на Клиниката, завршиле во неговиот џеб. Бидејќи Петровски во

петокот не се јавил на распит во полиција, МВР вчера поднесе кривична пријава

за злоупотреба на службената положба и распиша интерна потрага по него. Се

дознава дека тој останал на Косово откако полицијата во минатата недела на

неговата домашна адреса доставила покана за распит во МВР на кој требало да се

појави во петокот. Неговиот адвокат Драган Малиновски вели дека непотребно се

создава слика дека неговиот клиент е бегалец.

– Петревски службено е излезен од земјава и кога ќе ги заврши обврските ќе се

врати во земјава, а тоа ќе биде наскоро. Непотребно се создава атмосфера на

тензии и заложби за спектакуларно апсење и слика дека Петревски е бегалец и

криминалец. Тој и досега интензивно соработувал со МВР и нема причина и натаму

да не го прави тоа – вели адвокатот Малиновски.

Во МВР велат дека против Петревски е распишана интерна потрага.

– До сите гранични премини и полициски станици во земјава е пуштено известување

дека доколку го забележат тој веднаш да биде приведен. Утврдено е дека тој ја

напуштил земјава на граничниот премин кон Косово и претпоставуваме дека се крие

таму. Со поднесувањето на кривичната пријава му препорачуваме на Основното

јавно обвинителство да побара од надлежниот истражен судија да му изрече

притвор оти осомничениот е недостапен. Доколку Судот оцени дека треба да биде

распишана потерница, тогаш МВР веднаш ќе распише – вели Иво Котевски, помошник-министер

за односи со јавноста во МВР.

Според МВР, Петревски им овозможил лекување на 12 државјани од Албанија и од

Косово без да им биде извршена законска уплата за лекувањето. Кај деветмина од

нив, интервенцијата и отпустот од Клиниката ја извршил осомничениот и за кои

постои медицинска документација, додека пак за двајца пациенти нема никаква

документација, иако нивните имиња биле евидентирани во книгата во салата за

интервенции. Од ова било утврдено дека Петровски за интервенциите зел 551.700

денари.

Истрагата утврдила дека осомничениот, заедно со веледрогеријата „Д-р Пановски“,

склучил договор за набавка на медицински помагала, меѓу кои и 100 стента од

германско производство, за кои пак осомничениот знаел дека нема да бидат

употребливи доколку немаат активна супстанција за обложување. Тој употребил 60

стента, од кои само 20 биле фабрички обложени, додека другите 40, наводно, биле

обложени со потребната супстанција што пријавениот ја набавил нелегално.

На 14 од останатите 40 стентови лани им истекол рокот за употреба. Пријавениот,

иако знаел дека дел од стентовите се неисправни, не извршил набавка и не

реагирал кај доставувачот за нецелосната испорака на стентовите. Со тоа тој ја

оштетил Клиниката за кардиологија за 1.398.600 денари.

Се дознава дека Петревски работи на Клиниката за кардиологија во Ѓаковица,

Косово. Тој на државата и’ должи 143.000 евра поради непријавен данок на имот,

поради што Управата за јавни приходи му поднесе решение. Петревски се’ уште не

докажал со чии пари ја изградил куќата на Водно која чини околу 2 милиона евра.

Даниела

Вељановска