Корупцијата е присутна во царината, полицијата, здравството и во други сектори на јавната администрација. Постојаните промени на законите и на подзаконските прописи дополнително ја зголемуваат можноста за корупција, пишува во белата книга што Меѓународниот совет на инвеститори (ИЦИ) во Македонија прексиноќа му ја предаде на премиерот Владо Бучковски.

Корупцијата е присутна во царината, полицијата, здравството и во други сектори на јавната администрација. Постојаните промени на законите и на подзаконските прописи дополнително ја зголемуваат можноста за корупција, пишува во белата книга што Меѓународниот совет на инвеститори (ИЦИ) во Македонија прексиноќа му ја предаде на премиерот Владо Бучковски.

„Честите промени на законите не збунуваат и значително и пречат на нашата конкурентност на пазарите и ги зголемуваат нашите трошоци. Регистрацијата на фирма во земјава е премногу сложена. И покрај тоа што требаше да биде воведена реформа за да се скрати постапката и се да се заврши на еден шалтер, речиси ништо од тоа не е направено. Законските процедури се премногу сложени, не се јасни и им оставаат на чиновниците простор сами да ги толкуваат правилата и законите“, пишува во книгата напишана според искуствата на странските бизнисмени што работат во нашата земја.

Тие забележуваат дека е пребавна реформата на јавната администрација, за која оценуваат дека е една од областите во кои реформите најтешко се спроведуваат. Во извештајот пишува дека има многу докази дека во земјава недоволно се работи на подобрување на климата за водење бизнис затоа што има премногу административни пречки.

– Веруваме дека државата ќе ги интензивира напорите за подобрување на деловната клима во земјава, со што ќе обезбеди развој и економски напредок. Тоа ќе се постигне со комплетирање на легислативата што недостига, со подобрување на макро- и микроекономската политика во областите каде што се чини дека се неопходни такви подобрувања, но и со завршување на структурните реформи. Ја поддржуваме Владата да го забрза процесот на спроведување на реформите и спремни сме за ефикасна соработка со сите владини институции што се надлежни за регулирање на деловното работење – рече Аристид Влахос, претседателот на ИЦИ, во своето обраќање.

За судството странските бизнисмени велат дека мора брзо да се реформира и да се направат електронски бази на податоци со кои ќе се поврзат сите судови. Затоа препорачуваат ефикасни и брзи реформи и транспарентност во работата. За макроекономската политика ценат дека е успешна затоа што одржува стабилни услови, но велат дека Владата мора да создаде услови за зајакнување на банкарскиот сектор со тоа што ќе влезат странски инвестиции, кои ќе ги намалат каматните стапки.

Н.С.