Министерството за финансии одби да им го врати паркот пред охридскиот хотел „Палас“ на наследниците на денационализиран имот затоа што за Комисијата за денационализација тоа бил „објект во состав на хотелот „Палас“ „.

Никола Стојанов

Министерството за финансии одби да им го врати паркот пред охридскиот хотел „Палас“ на наследниците на денационализиран имот затоа што за Комисијата за денационализација тоа бил „објект во состав на хотелот „Палас“ „.

Станува збор за 500 квадратни метри градежно неизградено земјиште на атрактивна локација на кејот пред Охридско Езеро, чија пазарна цена преминува 500 евра за квадратен метар. За тоа земјиште Маја Панаџиева, претседателката на Комисијата за денационализација за Охрид, четири години откако го поднеле барањето за денационализација, на трите скопски семејства наследници на имотот им понудила обесштетување од 2.000 денари (помалку од 35 евра) за квадратен метар.

Парнаџиева одбила да го врати неизграденото градежно земјиште, иако знаела дека земјиштето во катастарот се води како неизградено градежно земјиште во државна, а не во сопственост на „Палас“, и иако таму урбанистите од охридската општина предвиделе на таа површина да се изгради мал хотел од три ката со поглед на Охридско Езеро.

– Парнаџиева не сака или не може да види дека паркот што се наоѓа пред „Палас“ не е објект и не е сопственост на хотелот и дека таму е предвидена изградба на мал хотел со корисна површина од 300 квадратни метри за што постои градежна маркичка. Бараме делот од земјата што е неизграден да ни се врати, а делот што го зафатил објектот на „Палас“ нека ни го исплати со обврзници. Нашата трагедија ја зголеми и Тања Алтанџиева, претстедателка на владината Комисија за решавање во управна постапка во втор степен од областа на денационализацијата, каде што се жалевме за решението на Парнаџиева. Ја тужиме државата пред Врховниот суд затоа што сметаме дека ни се прави огромна неправда. Освен тоа, случајно или намерно, Парнаџиева заборави дека треба да и даде обесштетување за уште 160 квадратни метри, зашто заборави да го впише вториот кат од семејната куќа што тогаш била национализирана. Ако треба, ќе обжалиме и пред судот во Стразбур – вели Владо Галиќ, син на 75-годишната наследничка Ратка.

„Време“ се обиде да побара објаснување за обвинувањата на наследниците на денационализиран имот, но не успеа да стапи во контакт со Маја Парнаџиева, вработена во Министерството за финансии.

Имотот на семејството на сестрите Ратка Галиќ и Марика Петрушевска и нивниот брат Борислав Руменов бил национализиран на 4 април 1952 година. Од тогаш до денеска тие не добиле обесштетување од државата. Тогаш им била одземена куќа со приземје и кат со корисна површина од 300 квадратни метри, летна кујна и плац со вкупна површина од 752 квадратни метри. Тие поднеле барање за денационализација во јануари 2002 година. Парнаџиева решението го издала на 19 април 2004 година. За целиот имот Парнаџиева пресметала дека ќе им даде обесштетување од 4,68 милиони денари (околу 75.700 евра) .

Раководството на „Палас“ спорната парцела ја затвори со метална ограда.

– Затоа што се плашевме дека „Палас“ ќе гради на нашиот имот побаравме од Александар Петрески, градоначалникот на Охрид, кој сега е надлежен, да и нареди на градежната инспекција да ја стопира градбата на нашата парцела за која водиме судски спор – изјави Љубен Петрушевски, еден од наследниците.