Претседателот на државава вели дека за “случајот Красниќи” ќе разговара со премиерот овој викенд
Поранешната караула на АРМ во Лабуништа сега стана регионална полициска станица

Претседателот на државава вели дека за “случајот Красниќи” ќе разговара со премиерот овој викенд

Поранешната караула на АРМ во Лабуништа сега стана регионална полициска станица

СИМОН ИЛИЕВСКИ

СТРУГА – „Имајќи предвид за колку и какви кривични дела се товари Агим Красниќи и неговата група, морам да кажам дека постапката на Обвинителството и одлуката на истражниот судија со право предизвикаа не само интересирање туку и сомневање и револт кај македонската јавност. Таа работа мора да се расчисти за да не се загуби вербата во правната држава и да не остане сомневањето дека некој намерно или од какви било причини свесно тргнал во кршење на законите и на Уставот°, изјави вчера во селото Велешта претседателот Бранко Црвенковски, одговарајќи на новинарско прашање за случајот со Агим Красниќи.

>„Ќе погрешат сите оние што мислат дека времето ќе го стори своето и дека ќе заборавиме што се случило зашто јавноста во случајот со Красниќи го заслужува вистинскиот одговор°, рече претседателот Црвенковски. Тој додаде дека доколку станува збор за конструкција или некаков политички притисок, тогаш некој ќе мора да понесе одговорност. За ова прашање Црвенковски завчера телефонски разговарал со премиерот Бучковски, при што се договориле на оваа тема да разговараат на посебна средба што ќе се одржи во текот на викендот.

Претседателот Црвенковски пред Велешта вчера ја посети регионалната полициска станица во селото Лабуништа којашто беше караула на АРМ и го обезбедуваше овој дел од државната граница спрема Албанија.

Претседателот Црвенковски зборуваше и за актуелниот случај со Вранишковски. „Руската православна црква и патријархот Алексиј Втори искажаа подготвеност за посредување во спорот меѓу МПЦ и СПЦ. Во писмото што го испрати Алексиј Втори деновиве го спомнува и случајот со Вранишковски. Во одговорот ќе му посочам каква е правната регулатива во Македонија и дека во овој случај станува збор за судска одлука на која не може да се влијае. Судскиот процес сў уште не е завршен и е поведена постапка пред Врховниот суд кој треба да се изјасни идниот месец°, објасни Црвенковски.

Одговарајќи на новинарско прашање за појавата на евидентирање на Македонците во Србија под референцата дека се по потекло од БЈРМ, претседателот Црвенковски рече дека се надева оти станува збор за индивидуални инциденти и дека тоа не е генерална политика што ќе ја следат другите институции во Србија и Црна Гора. „Тоа се коси со генералниот официјален став на Србија и Црна Гора, а тоа е дека го признаваат уставното име на Република Македонија и барем досега во ниедна ситуација не е најавено дека ќе има отстапувања од тоа°. Црвенковски најави дека од македонска страна ќе бидат преземени сите неопходни мерки, а МНР ќе испрати протест со надеж дека ќе дојде до корекција на однесувањето на надлежните институции во Србија.

Претседателот Црвенковски околу прашањето за продажбата на имотите на протераните Македонци од Грција, кои живеат во многу земји во светот, рече дека треба да се искористат сите механизми кои вклучуваат и меѓународни правни процедури. Во тие процеси за заштита на нивните права, според претседателот Црвенковски, деновиве се вклучи и македонското МНР.

Претседателот Црвенковски вчера на невообичаен начин ја спои посетата на поранешната караула на АРМ во Лабуништа и посетата на Велешта, две по многу нешта специфични населби што се наоѓаат во близината на Струга. „Планот за преземање на граничното обезбедување од страна на полицијата на западната граница е завршен. Притоа, Армијата не ги губи сите ингеренции и можности да се вклучи во одредени ситуации°, рече Црвенковски.

Во Велешта претседателот Црвенковски, по разговорите со граѓаните, го посети и домот на Аки Нуши, побратим и пријател на таткото на Црвенковски. „Со семејството на Љубе Црвенковски сме побратими од 1964 година. Нў врзува долгогодишно пријателство и се посетуваме за време на најважните семејни настани. Бранко го знам од двегодишна возраст и контактираме до ден денес°, вели Нуши.

Вчерашната посета на претседателот Бранко Црвенковски на Велешта ќе остане забележана како прва посета на политичар-Македонец што врши висока државна функција.