Љубчо Георгиевски, Никола Груевски и Стојан Андов да ги објават во јавноста анкетните листови за нивната имотна состојба, побара вчера Слободан Најдовски, потпретседател на Собранието.

Александра М. Митевска

Љубчо Георгиевски, Никола Груевски и Стојан Андов да ги објават во јавноста анкетните листови за нивната имотна состојба, побара вчера Слободан Најдовски, потпретседател на Собранието.

Тој ги повика опозициските пратеници да се отчитаат за својата и за имотната состојба на членовите на нивните потесни семејства и за нејзиното потекло, како што тоа веќе го направиле функционери од власта. Најдовски соопшти и дека пратеничката група на ЛДП до Собранието поднела декларација за поддршка на борбата против корупцијата и ги повика пратениците да ја поддржат.

Првичните реакции од опозицијата се дека немаат ништо против да се објават анкетните листови, ама дека допрва ќе се гради став за барањето на Најдовски и за декларацијата на ЛДП.

– Секој носител на јавна функција треба јавно да каже колку заработува и како го стекнал имотот што го поседува, бидејќи така ќе имаме појасна слика кој е корумпиран. Тоа треба да го направат и сите членови на комисиите за јавни набавки, бидејќи има посочувања дека таа сфера е голем извор на корупција – истакна Најдовски.

Тој им порача на пратениците дека токму тие треба да му покажат на народот дека се борат против корупцијата и да побараат да се скратат начинот и времето за постапка за одредени личности што се посочени како корумпирани.

– Во законот за борба против корупцијата нема обврска функционерите јавно да ја објават имотната состојба, но тие законски се обврзани да ги пополнат анкетните ливчиња. Право на функционерот е да одлучи дали ќе објави во јавноста што поседува и така ќе биде се додека евентуално не се промени законот – изјави Драган Малиновски, претседател на Антикорупциската комисија.

Тој рече дека во повеќе европски земји функционерите се обврзани имотната состојба да и ја стават на увид на јавноста и дека на таков начин полесно би се поведувале постапките.

Силвана Бонева од ВМРО-ДПМНЕ рече дека таа лично нема ништо против да го објави имотниот лист, ама дека пратеничката група допрва ќе се координира и за тоа каков став ќе заземе за декларацијата. И Жарко Караџоски, координаторот на ВМРО-НП, посочи дека неговата пратеничка група се уште ја нема декларацијата и дека допрва ќе се договорат како ќе настапат.

– Ако треба, ќе ги објавиме анкетните ливчиња. Никој не бега од тоа, иако не е обврска од законот – вели Караџоски.

Во Декларацијата што ЛДП ја поднесе до Собранието се бара пратениците да се согласат на јавно објавување на анкетните листови и тие да бидат достапни за медиумите. Собранието ќе апелира тоа да го направат сите носители на јавни функции и лица што располагаат со средства во државна сопственост.

А ДИСКРЕЦИСКИТЕ ПРАВА?

Корупцијата се уште е присутна во Македонија, а една од причините се дискрециските права на министрите. Владата, иако се обврза, се уште не го реши тој проблеми. Тоа вчера во Собранието го истакна Жарко Караџоски од ВМРО-НП, во расправата за ланскиот извештај на Антикорупциската комисија.

Пратениците, главно, се согласија дека државните институции мора повеќе да соработуваат со комисијата, или, пак, таа треба да добие поголеми овластувања.

Никола Апостоловски од СДСМ праша што се случува со некои постапки за кои се крена голем прав во јавноста.

– Комисијата функционира, а сепак корупцијата никогаш не била на повисоко ниво. Значи, нешто не функционира – рече Љупчо Мешков од ЛП.

Силвана Бонева од ВМРО-ДПМНЕ истакна дека повеќе од две години јавниот обвинител се јавува како кочничар со своето однесување, бидејќи не постапува по пријавите, што е недопустливо.