Свет
Животот на децата не смее да зависи од тендерите
![](https://makfax.com.mk/wp-content/uploads/2016/11/84ecf311-70b5-4927-b9ad-012708efc02e-2748.jpeg)
Нозете ми се пресекоа кога слушнав дека лекот го нема ниту во клиничката аптека, раскажува мајката на Мирослав, кој боледува од хемофилија А
ХЕМОФИЛИЈАТА НЕ ГИ ЧЕКА НАБАВКИТЕ
Нозете ми се пресекоа кога слушнав дека лекот го нема ниту во клиничката аптека, раскажува мајката на Мирослав, кој боледува од хемофилија А
Седумнаесетгодишниот Мирослав Рајчевски од Скопје боледува од хемофилија А – болест поради која крвта не може да коагулира. Тој е единствениот пациент во земјата што мора да го прима лекот Фактор 7, бидејќи добил реакција на Фактор 8, лек што го примаат другите лица со хемофилија.
Лекот што му е неопходен на Мирослав не се набавува во редовна процедура, туку инцидентно, само во интервентни случаи и со вонредни напори.
– Најстрашно беше пред две години. Мирослав се повреди во училиште возејќи статичен велосипед. Три дена потоа имаше болки, а крвната слика многу се влоши. Докторот со ехо-преглед дијагностицираше крвавење во стомакот. Син ми итно, во рок од неколку часа, мораше да прими Фактор 7, лек што го нема во редовна набавка. Бев очајна, не знаев на која врата попрво да затропам. Животот на мојот син висеше на конец. Ако во рок од неколку часа не го примеше лекот, тој можеше да почине – низ солзи раскажува неговата мајка, Лиле Рајчевска.
Лекарите од Клиниката за детски болести и помогнале да го најде излезот од бирократските и тендерски лавиринти.
– Нозете ми се пресекоа кога слушнав дека лекот го нема ниту во клиничката аптека. Тогаш д-р Зоре Антевска потпиша и го зеде лекот на реверс од магацин и 48 часа не излезе од клиниката додека син ми го примаше лекот Фактор 7. Над него бдееја и д-р Софијанка Гламочанин и д-р Стојанка Костовска. Во пресрет ми излегоа и надлежните од Фондот за здравство, кои веднаш ја одобрија набавката. Знам дека лекот е многу скап и дека неговата набавка некој мора да ја одобри – еден грам чини 1.200 евра, а син ми досега прими ампули што чинат повеќе од 500.000 евра. Не смеам ниту да помислам што ќе се случеше ако се чекаше на тендер, на роковите за жалби и друго – вели мајката на Мирослав. Таа и нејзиниот син се свесни дека лекот е многу скап.
Пред две недели Мирослав го повредил мускулот во стомакот и морал да прими 40 ампули. Три недели седи дома, додека целосно не закрепне. Тој болеста ја наследил од својот дедо по мајка. Жените во чие семејство има болни од хемофилија можат да ја пренесат оваа болест, но не заболуваат. Исклучок има кога сопругот има хемофилија, а сопругата е преносител на оваа болест. Кога таа брачна двојка би добила женско дете, тоа би можело да се разболи од хемофилија.
Битката што сега ја води Лиле Рајчевска е лекот да почне редовно да се набавува и да го има на клиниката.
– На ниту еден родител не сакам да му се случи ниту еден дел од пеколот што јас го преживеав. Морничаво е кога знаеш дека само тој лек може да ви го спаси детето, а за тој да се набави законски, треба да поминат недели. Исплашена сум и јас како мајка, но и докторите што го лекуваат. Во случајов, само на мојот син му е неопходен овој лек. Законските процедури за набавките не смеат да бидат причина за страдање и на помалку болен пациент, а во ниеден случај не смеат да го доведат во прашање животот на едно дете.
Ревизорите имале забелешки до Фондот за здравство дека бил набавен скап лек без тендер! Во ситуација кога минути решаваат за животот на детето, надлежните треба да се запрашаат колку процедурата може скапо да ги чини пациентите – вели мајката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Регион
Легендарниот рокер Бора Чорба погребан со хитот “Погледај дом свој анџеле“
![](https://makfax.com.mk/wp-content/uploads/2024/08/bora-corba.jpg)
Легендарниот рокер, фронтмен на групата „Рибља чорба“, Бора Ѓорѓевиќ (72) денес е погребан. Семејството, колегите, но и бројни пријатели и обожаватели се собраа на Градските гробишта во Чачак за да го кажат последното збогум и да се простат од него.
Хорот на гимназијата од Чачак по црковниот обред го испеа најголемиот хит на Бора „Погледај дом свој анџеле“, а овој момент расплака многумина и тоа беше најтажната сцена од гробиштата.
Рокерот Бора Ѓорѓевиќ (72) почина во средата на 4 септември во Љубљана по тешко боледување.Легендарниот рокер ќе почива во родниот Чачак, што му беше и последна желба.
Роден е на 1 ноември 1952 година.
Свет
Вселенското летало Старлајнер на Боинг слета без екипаж
![](https://makfax.com.mk/wp-content/uploads/2024/09/NASA.jpg)
Вселенското летало Старлајнер на Боинг слета без екипаж во пустината во Ново Мексико, со што заврши тримесечната пробна мисија отежната од технички проблеми.
Вселенското летало доцна синоќа самостојно го почна своето шестчасовно патување до Земјата, а астронаутите Буч Вилмор и Сани Вилијамс, првиот екипаж што леташе со Старлајнер, останаа на Меѓународната вселенска станица (МВС).
Беше одлучено Вилмор и Вилијамс да останат на МВЦ до февруари 2025 година, бидејќи Старлајнер се врати на Земјата користејќи маневри премногу опасни за екипажот.
Леталото повторно влезе во атмосферата на Земјата околу 5 часот утрово по средноевропско време, со орбитална брзина од приближно 27.400 километри на час.
Вилмор и Вилијамс ќе продолжат да спроведуваат научни експерименти додека се во вселената, а се очекува да се вратат на Земјата во февруари 2025 година со вселенско летало на компанијата СпејкИкс.
Свет
Регистриран прв случај на детска парализа во Пакистан по 16 години
![](https://makfax.com.mk/wp-content/uploads/2020/06/pakistan.png)
Пакистан планира итна акција за вакцинација следната недела, откако беше пријавен првиот случај на детска парализа во главниот град во последните 16 години, во услови на пораст на болеста во другите делови на земјата, соопштија денеска властите.
Повеќе од 33 милиони деца на возраст под 5 години ќе бидат вакцинирани од врата до врата почнувајќи од понеделник, рече шефот за полио Ајеша Раза, затоа што вкупниот број на нови случаи годинава се искачи на 17.
Ширењето на вирусот во регионот кој претходно беше прогласен за област без детска парализа претставува нов предизвик за програмата за искоренување финансирана заеднички од ОН и Фондацијата Гејтс, пренесува ДПА.
Случаите со детска парализа во Пакистан го достигнаа врвот од 147 болни во 2019 година, но се намалија на само шест минатата година.