Не постојат пречки за увоз на спорните полжави-репродуктори од видот „хеликс асперса мулер“, смета Министерството за земјоделство.

Велика Атанасова

Не постојат пречки за увоз на спорните полжави-репродуктори од видот „хеликс асперса мулер“, смета Министерството за земјоделство. Објектите за сместување и за одгледување на полжавите од овој вид, како и преземените мерки за заштита од заразни болести, се во согласност со стандардите за нивно чување и одгледување.

Вакво мислење Министерството за земјоделство испрати на 25 август до Министерството за животна средина, а се однесува на барањето за увоз на 150 илјади полжави-репродуктори од Италија, доставено пред неколку месеци. Поради мислењето на Министерството за животна средина дека станува збор за агресивен вид полжави што ги нема во нашава земја и со чиј увоз и евентуалното бегство од фармите ќе се нанесе огромна штета на биодиверзитетот, увозот на овој вид полжави не се спроведе.

– Немаме добиено официјално известување од Министерството за земјоделство дека дава позитивно мислење за увоз на шарениот полжав. Тие се надлежни за издавање дозвола и ако според нив нема пречки, и покрај нашето негативно мислење, увозот може да се реализира. Доколку дозволи увоз на овој вид полжави, Министерството за земјоделство треба да ја сноси и одговорноста за евентуалните штети што можат да настанат. Ние предложивме заеднички со Министерството за земјоделство, или со помош на Организацијата за земјоделство и храна на Обединетите нации – ФАО, да направиме стручна експертиза за увозот, но се уште немаме добиено никаков одговор – вели Пандора Никушева, директорка на службата за животна средина.

Додека надлежните од Министерството за животна средина ги убедуваат фармерите дека тие не се кочница за увоз на полжавите ако тоа го дозволи Министерството за земјоделство, а овие пак дека не се надлежни да дадат мислење за можните ризици од увозот и фармерското одгледување, фармерите, како што велат, годинава инкасирале загуба од повеќе од 540 илјади евра.

– Поради нереализираното производство на повеќе од 60 тони полжави, чија цена на светските берзи достигнува до 4 евра за килограм, загубата е поголема од 240 илјади евра. Пропадна и инвестицијата од 380 илјади евра за изградба на фармите, односно по осум илјади евра за фарма. Бидејќи нема производство, фармите од кои требаше да го извадиме првото производство на полжавите сега се запуштени и обраснати со трева – вели Зоран Андоновски од штипски „Андоно компани“.

Преку оваа фирма требаше да се реализира увозот на полжавите-репродуктори од Италија за триесетина нови фарми во земјава. Извинување или тужба Доколку госпоѓата Пандора Никушева не се извини и на ја повлече изјавата дадена за медиумите дека лично физички и вербално сум ја нападнал на завчерашната трибина, ќе поднесам тужба против неа, вели Андоновски. Изјавата на Никушева, како што истакнува тој во соопштението, е чиста инсинуација, дадена за да ја искриви сликата за трибината.