Свет
Затворот не треба да се откупува со пари
Експертите бараат повлекување на Кривичниот законик, бидејќи мислат дека тоа е скандалозно Од Црвенковски се бара да стави вето на замената на затворската казна со глоба
Експертите бараат повлекување на Кривичниот законик, бидејќи мислат дека тоа е скандалозно Од Црвенковски се бара да стави вето на замената на затворската казна со глоба
Гордана Дувњак
Замената на затворската казна до една година со парична казна е скандалозно решение, кое не само што не е применливо во практиката туку е и неконзистентно. Доколку ваквото решение и натаму остане во сила, тоа ќе стане привилегија само на богатите, кои и онака ги нема многу во затворите, но нема да доведе до намалување на бројот на затвореници, што беше главниот аргумент на законодавецот. Ова е став на Здружението за кривично право и криминологија, како и на учесниците на советувањето што се одржа викендов во Охрид, каде што жестоко биле критикувани неодамна донесените дополнувања на Кривичниот законик, кои во Собранието поминаа незабележано од пратениците и речиси без расправа. За новото решение, кое по предлог на Владата и на Министерството за правда е донесено по итна постапка, не се консултирани ниту науката ниту практичарите. Затоа, Здружението бара од претседателот на државата, Бранко Црвенковски, да стави вето на законот, а од Министерството за правда да понуди нов текст. За денес е закажана средба во ресорното министерство, на која се повикани претставници од Врховниот суд, Обвинителството и Правниот факултет, со цел да се соочат аргументите и да се изнајде натамошно решение.
Претседателот на Здружението за кривично право и криминологија, д-р Владо Бучковски од Правниот факултет, вели дека на средбата во Охрид Ј било предложено на министерката за правда, Мери Младеновска, да го повлече спорниот законски текст, бидејќи тој едноставно е неприменлив во практиката и нема да ја оствари целта.
„Предложеното решение има проблеми со формулациите и содржи нејасни одредби. Во текстот се вели дека „повисокиот суд може по барање на сторителот на кривично дело ако е изречена затворска казна до една година, да ја замени со парична казна”, но не се кажува на кој повисок суд се однесува. Не е јасно ниту во која форма ќе се врши замената на затворската казна. Законот е неконзистен, бидејќи не е усогласен ниту со Законот за кривична постапка”, смета професорот по кривично право, д-р Никола Тупанчевски.
Слично размислуваат и заменик-државниот јавен обвинител, Роксанда О. Крстевска, како и врховниот судија, Драган Тумановски, кои на стручниот собир во Охрид изнеле куп забелешки за скандалозното решение, но и стручни аргументи, зошто изгласаните законски дополнувања треба да се повлечат и да се понуди издржан текст, кој ќе помине поширока јавна расправа.
Експертите се уверени дека законот нема да го помине ни тестот на Уставниот суд, бидејќи е неуставен и установува правна нееднаквост. Клучната дилема и за науката и за практичарите е дали треба да се менува казнената политика за само 189 затвореници, кои издржуваат затворска казна по прв пат до една година, а со кои Министерството за правда сака да го намали вишокот во затворите, но и да го наполни државниот буџет?
Ако секој затворски ден се замени со парична казна во висина на дневната глоба, при што бројот на дневните глоби за секој изминат ден затвор што се заменува не може да биде помал од 50 дневни глоби, колку што треба да плати еден затвореник за да биде ослободен цели 365 дена. Експертите пресметале дека најмалата дневна глоба ќе изнесува околу 50 евра, а можете ли само да замислите колкава ќе биде оваа сума, доколку некој посака да ја помножи неколкукратно и да биде ослободен за сите 365 дена. Станува збор за цифри со неколку нули зад себе, кој ретко кој може да ги плати, а најмалку они што се на издржување на казната за ситни кражби, измами , фалсификување документи, растурање дрога. Што ќе се случи ако осудениот нема пари да плати ?
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хезболах лансира ракети врз северен Израел
Хезболах лансира 140 ракети кон северниот дел на Израел, само еден ден откако лидерот на екстремистичката група, Хасан Насрала, најави одмазда за серијата експлозии во Либан во последните три дена.
Израелската армија објави дека ракетите паднале во три брана во петокот попладне, а цел биле места по должината на разурнатата граница со Либан, пренесува „Јутарњи“.
Хезболах соопшти дека цели биле неколку места по должината на границата со ракетите „Катјуша“, вклучително и неколку бази за противвоздушна одбрана, како и штабот на израелската оклопна бригада, која, според нив, била првиот погоден, пренесува „Н1 Загреб“.
Хезболах рече дека ракетите биле како одмазда за израелските напади врз села и домови во јужен Либан.
Свет
Камала Харис: Ако некој упадне во мојот дом, ќе биде застрелан
Потпретседателката на САД, Камала Харис, изјави дека е подготвена да употреби пиштол доколку натрапник упадне во нејзиниот дом.
„Ако некој упадне во мојата куќа, ќе биде застрелан“, рече Харис, гостинка на Опра Винфри.
„Веројатно не требаше да го кажам тоа, но мојот персонал подоцна ќе се справи со тоа“, додаде таа и се насмеа. Харис, која потврди дека поседува пиштол за време на неодамнешната претседателска дебата, ја повтори својата поддршка за забраната на автоматските пушки.
„Огненото оружје од овој тип е буквално дизајнирано да биде воено средство. За него нема место на улиците на граѓанското општество“, нагласи таа.
Рече дека е поддржувач на американскиот втор амандман, кој го штити правото на поседување оружје, но се осврна и на американскиот проблем со престрелките во училиштата.
Таа предупреди дека е вознемирувачко што децата мораат да поминат вежби за да се подготват за вакви инциденти. „Не мора да биде така“, убедена е таа. По едно од најновите масовни престрелки во САД, 14-годишно момче е обвинето за убиство на четири лица во средно училиште во Џорџија.
„Поседувам пиштол веројатно од истата причина како и многумина што го имаат – за лична безбедност. Бев обвинител“, рекла Харис во 2019 година, според Би-би-си.
За време на минатонеделната дебата со републиканскиот кандидат Доналд Трамп таа ги негира обвинувањата на Трамп дека „ќе им го одземе пиштолот на сите“ доколку биде избрана во Белата куќа.
Трамп поседуваше и три пиштоли, но мораше да предаде два од нив и да се соочи со ограничувања за третиот откога беше обвинет.
Регион
Додик: Нема да ја почитувам одлуката на Уставниот суд
Српскиот лидер во Босна и Херцеговина, Милорад Додик, изјави дека нема да ја почитува одлуката на Уставниот суд на таа земја, кој го оспори изборниот закон за ентитетите и покрај тоа што неговата партија ќе учествува на претстојните локални избори, кои се одржуваат според одредбите на друг државен изборен закон.
„Изборниот закон на Република Српска е уставен и овој правен акт ќе се применува“, изјави Додик за Радио-телевизија на Република Српска реагирајќи на вчерашната одлука на Уставниот суд на Босна и Херцеговина.
Тој суд оцени дека со донесувањето на Изборниот закон на Република Српска е прекршен Уставот на Босна и Херцеговина. На овој начин се оспорува улогата на Централната изборна комисија на БиХ, која е задолжена за организирање и спроведување на изборите.
На ваков потег се одлучија откако високиот меѓународен претставник, Кристијан Шмит, наметна измени во Изборниот законик на Босна и Херцеговина.
Сепак, Додик тврди дека само ќе го почитува Изборниот законик за ентитетите бидејќи тој не бил оспорен од Уставниот суд на Република Српска. Но, државниот е.
И покрај приговорите и отфрлањето на одлуките на Уставниот суд на БиХ, кои властите на Република Српска ги нарекуваат скратени затоа што двајца српски судии не учествуваат во неговата работа, партиите на власт од тој ентитет сепак ќе учествуваат на претстојните локални избори организирани од државната Централна изборна комисија.
Овие избори ќе се одржат на 6 октомври, а ќе се изберат нови свикувања на градските и општинските совети и раководители на 141 општина и град.