Свет
Пратениците најплатени пензионери
Пратениците ќе земаат околу 36.000 денари пензија, речиси 10.000 денари повеќе од највисоката пензија што се исплатува сега во земјава
СПОРЕД НОВИОТ ЗАКОН
Пратениците ќе земаат околу 36.000 денари пензија, речиси 10.000 денари повеќе од највисоката пензија што се исплатува сега во земјава. Со новиот Закон за пратеници, кој беше усвоен завчера, пензијата на парламентарците ќе изнесува 80 отсто од просечната пратеничка плата исплатена во претходните три месеци.
Со измените на Законот за плати на избрани и именувани функционери, просечната плата на пратениците е околу 45.000 денари.
Во Фондот за пензиско и инвалидско осигурување велат дека највисоката пензија во моментов е 26.888 денари.
Од Кабинетот на претседателот на државата вчера соопштија дека Бранко Црвенковски ќе ја испочитува уставната обврска и ќе го потпише Указот за прогласување на Законот, иако не се согласува со неговите одредби.
– Ставот на шефот на државата останува ист. Тој не се согласува со донесувањето на овој Закон, особено што немаше доволно аргументи, образложенија и измени на предлогот што би оделе во негова полза. Тргнувајќи од обврската на претседателот да го штити и почитува Уставот, тој ќе го потпише Указот за негово прогласување, бидејќи беше донесен со потребното мнозинство – велат од Кабинетот на претседателот.
Црвенковски одби да го потпише Указот при првото изгласување на Законот во Собранието.
Условите за пресметување на пратеничката пензија важат и за пратениците од претходните мандати, бидејќи пензијата се усогласува според порастот на платите на пратениците во Собранието. Неофицијално, околу 50 поранешни и сегашни парламентарци ги исполнуваат условите според овој Закон – предвремена старосна пензија ако има 25 години работен стаж, односно 55 години старост за мажи, а 53 за жени и да има две години пратенички стаж.
Министерот за финансии Никола Поповски оцени дека се уште не се знае колку Законот за пратеници ќе го оптовари буџетот бидејќи тоа ќе зависи од бројот на пратениците што ќе го искористат тоа право.
– Со оглед на неколку изминати мандати во Собранието, ќе се јават можеби стотина пратеници, кои ќе одат во пензија под овие услови. Тоа нема да биде големо оптоварување за Буџетот затоа што не предизвикува големи интервенции. Ние сега обезбедуваме седум до осум милијарди денари годишно од централниот Буџет за да го покриеме дефицитот на Пензискиот фонд – изјави Поповски.
Пратеничката група на ВМРО-ДПМНЕ се спротивстави на донесувањето на овој Закон и најави дека ќе ја оспори неговата уставност во однос на еднаквоста на граѓаните. Според пратеничката Силвана Бонева, еднаквоста на граѓаните се нарушува во делот на условите за пензионирање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хезболах лансира ракети врз северен Израел
Хезболах лансира 140 ракети кон северниот дел на Израел, само еден ден откако лидерот на екстремистичката група, Хасан Насрала, најави одмазда за серијата експлозии во Либан во последните три дена.
Израелската армија објави дека ракетите паднале во три брана во петокот попладне, а цел биле места по должината на разурнатата граница со Либан, пренесува „Јутарњи“.
Хезболах соопшти дека цели биле неколку места по должината на границата со ракетите „Катјуша“, вклучително и неколку бази за противвоздушна одбрана, како и штабот на израелската оклопна бригада, која, според нив, била првиот погоден, пренесува „Н1 Загреб“.
Хезболах рече дека ракетите биле како одмазда за израелските напади врз села и домови во јужен Либан.
Свет
Камала Харис: Ако некој упадне во мојот дом, ќе биде застрелан
Потпретседателката на САД, Камала Харис, изјави дека е подготвена да употреби пиштол доколку натрапник упадне во нејзиниот дом.
„Ако некој упадне во мојата куќа, ќе биде застрелан“, рече Харис, гостинка на Опра Винфри.
„Веројатно не требаше да го кажам тоа, но мојот персонал подоцна ќе се справи со тоа“, додаде таа и се насмеа. Харис, која потврди дека поседува пиштол за време на неодамнешната претседателска дебата, ја повтори својата поддршка за забраната на автоматските пушки.
„Огненото оружје од овој тип е буквално дизајнирано да биде воено средство. За него нема место на улиците на граѓанското општество“, нагласи таа.
Рече дека е поддржувач на американскиот втор амандман, кој го штити правото на поседување оружје, но се осврна и на американскиот проблем со престрелките во училиштата.
Таа предупреди дека е вознемирувачко што децата мораат да поминат вежби за да се подготват за вакви инциденти. „Не мора да биде така“, убедена е таа. По едно од најновите масовни престрелки во САД, 14-годишно момче е обвинето за убиство на четири лица во средно училиште во Џорџија.
„Поседувам пиштол веројатно од истата причина како и многумина што го имаат – за лична безбедност. Бев обвинител“, рекла Харис во 2019 година, според Би-би-си.
За време на минатонеделната дебата со републиканскиот кандидат Доналд Трамп таа ги негира обвинувањата на Трамп дека „ќе им го одземе пиштолот на сите“ доколку биде избрана во Белата куќа.
Трамп поседуваше и три пиштоли, но мораше да предаде два од нив и да се соочи со ограничувања за третиот откога беше обвинет.
Регион
Додик: Нема да ја почитувам одлуката на Уставниот суд
Српскиот лидер во Босна и Херцеговина, Милорад Додик, изјави дека нема да ја почитува одлуката на Уставниот суд на таа земја, кој го оспори изборниот закон за ентитетите и покрај тоа што неговата партија ќе учествува на претстојните локални избори, кои се одржуваат според одредбите на друг државен изборен закон.
„Изборниот закон на Република Српска е уставен и овој правен акт ќе се применува“, изјави Додик за Радио-телевизија на Република Српска реагирајќи на вчерашната одлука на Уставниот суд на Босна и Херцеговина.
Тој суд оцени дека со донесувањето на Изборниот закон на Република Српска е прекршен Уставот на Босна и Херцеговина. На овој начин се оспорува улогата на Централната изборна комисија на БиХ, која е задолжена за организирање и спроведување на изборите.
На ваков потег се одлучија откако високиот меѓународен претставник, Кристијан Шмит, наметна измени во Изборниот законик на Босна и Херцеговина.
Сепак, Додик тврди дека само ќе го почитува Изборниот законик за ентитетите бидејќи тој не бил оспорен од Уставниот суд на Република Српска. Но, државниот е.
И покрај приговорите и отфрлањето на одлуките на Уставниот суд на БиХ, кои властите на Република Српска ги нарекуваат скратени затоа што двајца српски судии не учествуваат во неговата работа, партиите на власт од тој ентитет сепак ќе учествуваат на претстојните локални избори организирани од државната Централна изборна комисија.
Овие избори ќе се одржат на 6 октомври, а ќе се изберат нови свикувања на градските и општинските совети и раководители на 141 општина и град.