Свет
Веќе пет дена трае штрајкот на вработените во Клиничкиот центар.
Средбата со премиерот Владо Бучковски, која требаше да се одржи денеска, е откажана, иако претходно од кабинетот имаше позитивен одговор
АНГЕЛЧО САЗДОВСКИ, ПРЕТСЕДАТЕЛ НА СИНДИКАТОТ НА КЛИНИЧКИОТ ЦЕНТАР
Министерот за здравство сака да внесе раздор во нашите редови
Средбата со премиерот Владо Бучковски, која требаше да се одржи денеска, е откажана, иако претходно од кабинетот имаше позитивен одговор. Образложението е дека “Владата не разговара под притисок, бидејќи во меѓувреме почнал штрајкот”. Д-р Ангелчо Саздовски, претседател на Синдикатот на Клиничкиот центар објаснува за натамошните чекори што ќе бидат преземени, по веста дека е откажана средбата со премиерот.
– Советот на Самостојниот синдикат на вработените во Клиничкиот центар денеска ќе одржи седница и ќе решиме што понатаму, односно дали штрајкот ќе продолжи. Очекувавме премиерот да има повеќе слух за нас, отколку министерот за здравство. Во штрајкот се единствени сите вработени, а има поддршка од многу професори, дури и од директори на клиники.
l Димов тврди дека барањето за двојно зголемување на платите е несериозно и надвор од реалните можности и дека вработените не се информирани за последиците и со целта на штрајкот.
– Овие тврдења се неточни и злонамерни, а со цел да се внесе раздор во нашите редови. Беше одржан состанок на кој им укажавме на последиците од штрајкот, кој е уредно најавен уште на 22 септември. Од каде толкава грижа што вработените пет дена ќе бидат без дневници? Подобро е министерот да обезбедеше пари за зголемување на платите, како што тоа го направи министерката за правда во својот ресор.
l Што велите на обвинувањата дека немате платформа за разговори?
– Јасни се нашите барања за 100 отсто зголемување на платите. Од 2001 година тие не се зголемени, а надоместоците за дежурства ги добиваме по старо, иако од декември 2003 година тие се зголемени за 50 отсто. Доколку на суд ги побараме овие права, Клинички ќе треба да ни исплати сума од 300.000 евра годишно, и тоа без камати!
l Министерот Димов Ве потсетува дека зголемување на платите е можно само со измени во колективниот договор, за што во минатата недела било предложено да почнат и разговори. Зошто никој од вашиот синдикат не се појавил на средбата?
– Поканата за колективно договарање укажува на непознавање на овој дел од законот од страна на министерот, а со тоа сакаат и да не стават “во скутот” на Самостојниот синдикат за здравство. Не е наша обврска да преговараме за гранковиот синдикат, туку тоа е на министерот за здравство и на мнозинскиот синдикат, кои договорно треба да го донесат гранковиот колективен договор. Ние треба да донесеме колективен договор на ниво на работодавач, односно договор склучен меѓу нашиот синдикат и управните одбори на нашите членки, што треба да следи по донесување на гранковиот колективен договор.
l Директорот Андреја Арсовски е категоричен дека Клинички нема пари за зголемување на платите на вработените, бидејќи буџетот што е одобрен од Фондот за здравство е ограничен. И министерот за здравство и директорот на Клинички центар велат дека евентуално зголемување на платите може да се очекува по Нова година, кога ќе заживеат буџетите?
– Замката е токму со буџетското финансирање на јавните здравствени организации и тогаш очекуваме не поголеми, туку и помали плати. Новиот буџет на Клиничкиот центар е пресметан врз просекот од последните три години, а дури е намален за 10 отсто. Клинички центар добива од буџетот на Фондот за здравство 50 милиони евра годишно или 20 отсто од вкупниот прилив пари во Фондот, а “покрива” до 70 отсто од услугите во секундарна и 100 отсто во терцијарната заштита. За плати на вработените одат само 6 отсто од парите во Фондот. Втората замка што ја носат буџетите и голема нелогичност е “врзување” на платите со материјалните трошоци, кои ќе се подмируваат од заеднички пари. Тоа ќе значи – поголеми трошоци во работењето – помали плати за вработените. На пример, за инсулински аналози, нов лек што е воведен во 2004 година, се потрошени 400.000 евра, а во 2003 година не било потрошено ништо. Тие се издаваат преку клиничката аптека, а ќе се плаќаат од буџетот. Ако продолжи вака, ќе треба и од дома пари да носиме за потребите на Клиничкиот центар.
l Зошто во 2001 година го потпишавте колективниот договор ако тој не бил поволен за вработените?
– Тој беше потпишан под притисок на Самостојниот синдикат за здравство. Парите кои ние ги предложивме, а кои требаше да ги задоволат потребите за таков колективен договор, под притисок на тој синдикат беа намалени, од 90 на 80 милиони денари месечно за потребите на Клиничкиот центар. Точно е дека имаме помали плати од колегите во другите установи во земјата, иако имаме највисока квалификациска структура – 752 доктори, од кои 220 се и професори. Има 780 медицински сестри, чиј просечен личен доход е 13.700 денари.
l Директорот Арсовски е категоричен дека ќе им бидат намалени платите на вработените поради штрајкот, бидејќи така гласела и одредбата од Законот за работни односи?
– Иако сме во штрајк, ние работиме и нема зошто да не им бидат исплатени дневниците на вработените. Во членот 240 од Законот стои одредбата дека во услови на штрајк придонесите се уплатуваат на најниска основица на плата, а никаде не ја пишува одредбата за неисплата на плати.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хезболах лансира ракети врз северен Израел
Хезболах лансира 140 ракети кон северниот дел на Израел, само еден ден откако лидерот на екстремистичката група, Хасан Насрала, најави одмазда за серијата експлозии во Либан во последните три дена.
Израелската армија објави дека ракетите паднале во три брана во петокот попладне, а цел биле места по должината на разурнатата граница со Либан, пренесува „Јутарњи“.
Хезболах соопшти дека цели биле неколку места по должината на границата со ракетите „Катјуша“, вклучително и неколку бази за противвоздушна одбрана, како и штабот на израелската оклопна бригада, која, според нив, била првиот погоден, пренесува „Н1 Загреб“.
Хезболах рече дека ракетите биле како одмазда за израелските напади врз села и домови во јужен Либан.
Свет
Камала Харис: Ако некој упадне во мојот дом, ќе биде застрелан
Потпретседателката на САД, Камала Харис, изјави дека е подготвена да употреби пиштол доколку натрапник упадне во нејзиниот дом.
„Ако некој упадне во мојата куќа, ќе биде застрелан“, рече Харис, гостинка на Опра Винфри.
„Веројатно не требаше да го кажам тоа, но мојот персонал подоцна ќе се справи со тоа“, додаде таа и се насмеа. Харис, која потврди дека поседува пиштол за време на неодамнешната претседателска дебата, ја повтори својата поддршка за забраната на автоматските пушки.
„Огненото оружје од овој тип е буквално дизајнирано да биде воено средство. За него нема место на улиците на граѓанското општество“, нагласи таа.
Рече дека е поддржувач на американскиот втор амандман, кој го штити правото на поседување оружје, но се осврна и на американскиот проблем со престрелките во училиштата.
Таа предупреди дека е вознемирувачко што децата мораат да поминат вежби за да се подготват за вакви инциденти. „Не мора да биде така“, убедена е таа. По едно од најновите масовни престрелки во САД, 14-годишно момче е обвинето за убиство на четири лица во средно училиште во Џорџија.
„Поседувам пиштол веројатно од истата причина како и многумина што го имаат – за лична безбедност. Бев обвинител“, рекла Харис во 2019 година, според Би-би-си.
За време на минатонеделната дебата со републиканскиот кандидат Доналд Трамп таа ги негира обвинувањата на Трамп дека „ќе им го одземе пиштолот на сите“ доколку биде избрана во Белата куќа.
Трамп поседуваше и три пиштоли, но мораше да предаде два од нив и да се соочи со ограничувања за третиот откога беше обвинет.
Регион
Додик: Нема да ја почитувам одлуката на Уставниот суд
Српскиот лидер во Босна и Херцеговина, Милорад Додик, изјави дека нема да ја почитува одлуката на Уставниот суд на таа земја, кој го оспори изборниот закон за ентитетите и покрај тоа што неговата партија ќе учествува на претстојните локални избори, кои се одржуваат според одредбите на друг државен изборен закон.
„Изборниот закон на Република Српска е уставен и овој правен акт ќе се применува“, изјави Додик за Радио-телевизија на Република Српска реагирајќи на вчерашната одлука на Уставниот суд на Босна и Херцеговина.
Тој суд оцени дека со донесувањето на Изборниот закон на Република Српска е прекршен Уставот на Босна и Херцеговина. На овој начин се оспорува улогата на Централната изборна комисија на БиХ, која е задолжена за организирање и спроведување на изборите.
На ваков потег се одлучија откако високиот меѓународен претставник, Кристијан Шмит, наметна измени во Изборниот законик на Босна и Херцеговина.
Сепак, Додик тврди дека само ќе го почитува Изборниот законик за ентитетите бидејќи тој не бил оспорен од Уставниот суд на Република Српска. Но, државниот е.
И покрај приговорите и отфрлањето на одлуките на Уставниот суд на БиХ, кои властите на Република Српска ги нарекуваат скратени затоа што двајца српски судии не учествуваат во неговата работа, партиите на власт од тој ентитет сепак ќе учествуваат на претстојните локални избори организирани од државната Централна изборна комисија.
Овие избори ќе се одржат на 6 октомври, а ќе се изберат нови свикувања на градските и општинските совети и раководители на 141 општина и град.