Во Варшава, украинскиот министер за надворешни работи Андриј Сибиха побара од Полска и западните сојузници да ја зголемат воената помош, особено за антиракетната одбрана на Украина, бидејќи најновите чекори на Русија водат кон ескалација на конфликтот и Москва може да биде принудена на мир само со сила.

„Русија презеде низа неприфатливи чекори кои ја зголемуваат агресијата. Ангажман на севернокорејската војска, напади врз постројки за нуклеарна енергија или напади со балистички ракети. Русија покажува дека не сака мир, сака само војна, што значи дека мирот може да се изнуди само со сила“, рече Сибиха на заедничката прес-конференција со шефот на полската дипломатија Радослав Шикорски.

Украинскиот министер предупреди дека за да ја принудат Русија да склучи мир, западните сојузници мора да ја зголемат помошта за Украина во областа на противракетната одбрана и противвоздушната одбрана, а исто така дека очекува 15-ти пакет санкции против Русија од Западот.

„Повторно ја покренувам темата Полска да и ги даде своите авиони МИГ-29 на Украина. Разбираме дека Полска мора да го брани своето небо и разговараме со сојузниците да помогнат во одбраната на источната граница на Полска. Ни требаат одлуките на сојузниците во врска со соборувањето на руски ракети над Украина“, рече Сибиха.

Украинскиот министер додаде дека помошта од Запад треба да оди и кон зајакнување на украинската воена индустрија за да не мора да зависи од испораките од сојузниците во критичните моменти.

Шефовите на дипломатиите на Украина и Полска денеска се согласија дека главна цел е сè уште Русија да ги врати окупираните територии, дека единствената гаранција за мир во Европа е Украина да влезе во НАТО и дека не може да се водат мировни преговори и компромиси, без согласност на Украинците.

„Украина мора да ги врати своите територии во меѓународно признатите граници. Во случај на почеток на мировни преговори, кои според нас не се на повидок кога гледаме сè побрутални напади од Русија, секое решение мора да биде прифатено од нашите украински пријатели“, рече Шикорски.

Полскиот министер потсети на историјата на својата земја дека договорите што ги направиле други зад грбот на Полјаците никогаш не донеле ништо добро.

Министерката за надворешни работи на Германија, Аналена Бербок денеска ја повика ЕУ да ја зголеми помошта за Украина пред Нова година и порача дека Германија ќе продолжи непоколебливо да стои покрај Украина заедно со своите партнери.

„Од почетокот на руската војна, само Германија насочи повеќе од 37 милијарди евра во целост за да и помогне на Украина, но и да се заштитиме себеси. Германија до крајот на оваа година ќе предаде уште два системи за противвоздушна одбрана ИРИС-Т“, изјави Бербок по состанокот на министрите за надворешни работи на Г7, пренесува Укринформ.

Таа истакна дека министерот за одбрана Борис Писториус јасно ставил до знаење дека веќе е започната работа на трансфер на дронови со вештачка интелигенција, од кои се ветени вкупно 4.000. Бербок укажа и на потребата да се погледне и провери што сè уште може да се направи до крајот на годината на национално, но и европско ниво и кои финансиски и други ресурси сè уште може да се насочат.

Шефицата на германската дипломатија повтори дека „агресивната руска војна против Украина“ е истовремено и напад на европскиот мировен поредок и на светскиот поредок воопшто, кој се заснова на закони и правила.

Таа тврди дека рускиот претседател Владимир Путин се обидел да ги искористи последните 1.000 дена за да го поврзе нападот на Украина со другите кризи во светот и да ги обедини оние сили кои сакаат да го уништат заедничкиот мир. Како што истакна таа, Путин не сака да зборува за праведен мир и да ја доведе во прашање ефикасноста на светските демократии.

„Неговата стратегија е намерно да ги дестабилизира и подели демократските општества, да ги сврти луѓето едни против други. И покрај тоа, да се лансираат илјадници ботови со пропаганда, да се спречи функционирањето на GPS сигналите, да се уништи кабелот за пренос на податоци на дното на морето. Сето ова не може да биде случајност“, кажала Бербок, пренесува Танјуг.

Петмина преживеани беа спасени, а четири тела извлечени од Црвеното Море откако потона туристичкиот брод, изјави локален претставник.

Се верува дека двајца Британци се меѓу исчезнатите.

Египетските воени сили, кои ги координираат операциите, сега спасија 37 лица од 44 на бродот. Тоа значи дека седум лица се уште се водат како исчезнати, а спасувачките тимови ги „интензивираат напорите“ за нивно пронаоѓање, пренесуваат светските медиуми.

Гувернерот на регионот на Црвеното Море, Амр Ханафи изјави дека во вторникот биле спасени двајца Белгијци, еден Швајцарец, еден Финец и еден Египќанец, а биле пронајдени четири тела, но нивната националност не е позната.

„На преживеаните им се пружа потребната медицинска нега“, рече тој во изјавата на Фејсбук, пишува „Скај њуз“.

Туристичкиот брод „Sea Story“ долг 34 метри потона во понеделникот јужно од египетскиот крајбрежен град Марса Алам. Меѓу странските државјани на бродот имало од Велика Британија, Ирска, САД, Германија, Полска, Белгија, Швајцарија, Финска, Кина, Словачка и Шпанија.

Според зборовите на лицата на бродот, „висок морски бран го погодил бродот и предизвикал да се преврти за околу пет или седум минути“, рече Ханафи.

Некои патници биле во кабините, поради што не можеле да излезат од бродот, се додава во неговата изјава.

„Sea Story“ го напушти Порт Галиб, 63 километри северно од Марс Алам, во неделата и требаше да пристигне на својата дестинација во Хургада на 29 ноември. Официјалните лица рекоа дека повикот за помош бил примен во 5:30 часот по локално време во понеделникот. Бродот потонал на 46 наутички милји од брегот на Марс Алам.