Во САД во изминатите 24 часа се пријавени најмалку 52.898 новозаболени, што е најголем број од почетокот на пандемијата, покажуваат податоците објавени од Универзитетот „Џон Хопкинс“.

По овие нови случаи на инфекција, вкупниот број случаи на американско тло се искачува на 2,7 милиони. Во изминатите 24 часа од пандемијата, 706 луѓе починале во САД, или вкупно 128.028.

Бројот на новозаболени во САД е најголем од почетокот на Сарс-Ков-2, а бројот на хоспитализирани пациенти расте во неколку жаришта како Хјустон (Тексас) и Феникс (Аризона).

Така, Тексас го сруши својот дневен рекорд и пријави 8.076 нови случаи на Ковид-19, речиси 1.000 повеќе од претходниот ден.

Некои американски држави мораа да престанат да ги олеснуваат епидемиолошките мерки поради ширењето на инфекцијата.

Гувернерот на Калифорнија, Гевин Њузом, донесе одлука дека ќе ги забрани, како што стори и во екот на пандемијата, сите ресторански услуги во затворени простори во Лос Анџелес и во 18 други окрузи од најтешко погодените држави.

Забраната важи и за барови, кина и музеи и ќе важи најмалку три недели.

И гувернерот на Мичиген, на северот на земјата, рече дека ќе се затворат повеќето барови што се сметаат за понови жаришта, а Орегон, на северозапад и Пенсилванија, на северо-исток, им се придружија на државите каде што носењето маска е задолжително.

Русија ги објави новите податоци за бројот на починати и заразени од коронавирус.

Денеска се пријавени 6.760 нови случаи, со што е надмината бројката од 660.000 случаи на инфекција од почетокот на пандемијата. Сега тој број е 661.165.

Во изминатите 24 часа починале 147 лица, односно од почетокот на пандемијата во Русија се регистрирани вкупно 9.683 смртни случаи како последица од Ковид-19, пренесе „Ројтерс“.

Русите денеска ја отворија вратата за претседателот Владимир Путин да остане на власт до 2036 година, откако на организираниот референдум големо мнозинство гласачи го поддржа пакетот реформи што ќе му овозможат да се кандидира за претседател уште два пати, а критичарите предупредуваат дека исходот на референдумот е фалсификуван.

За првпат во Русија гласањето траеше една недела со цел да се зголеми излезноста на граѓаните, но и да се намалат толпите на избирачките места поради пандемијата.

Американскиот државен секретар, Мајк Помпео, ја повика Турција да не ја претворa поранешната базилика „Аја Софија“ во џамија, како што сака турскиот претседател, Реџеп Таип Ердоган.

„Ги повикуваме турските власти да продолжат да ја сочуваат ‘Аја Софија4 како музеј, како илустрација на нивната заложба за почитување на културните традиции и богатата историја што ја формирале турската република и да гарантираат дека таа ќе остане отворена за сите“, напиша Помпео.

Турскиот државен совет ќе го разгледа барањето на здруженијата кои сакаат поранешната базилика „Аја Софија“, која сега е музеј, да ја претворат во џамија.

„САД сметаат дека секоја промена на статусот на ‘Аја Софија’ би била ограничување на наследството на оваа исклучителна градба“, додаде Помпео.

Портпаролот на турското Министерство за надворешни работи, Хами Аксој, изјави дека Турција е изненадена од изјавите, додавајќи дека никој нема право да зборува со предупредувачки тон за нивните суверени права.